ماقسات – بۇرىنعى پوليگون ماڭىندا تۇراتىن حالىقتىڭ رادياسيالىق قاۋىپسىزدىگىن كۇشەيتۋ.
مەملەكەت باسشىسى قاسىم-جومارت توقايەۆ "سەمەي يادرولىق قاۋىپسىزدىك ايماعى تۋرالى" قازاقستان رەسپۋبليكاسىنىڭ زاڭىنا قول قويدى، دەپ حابارلايدى Almaty-akshamy.kz
سونداي-اق مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە سەمەي يادرولىق قاۋىپسىزدىك ايماعى، ەكولوگيا جانە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى.
21 ماۋسىمدا ءماجىلىستىڭ جالپى وتىرىسىندا دەپۋتاتتار "سەمەي يادرولىق قاۋىپسىزدىك ايماعى تۋرالى" زاڭ مەن وعان ىلەسپە تۇزەتۋلەردى قابىلداپ، سەناتقا جولدادى.
زاڭ جوباسى رادياسيالىق جانە ەكولوگيالىق قاۋىپسىزدىكتىڭ ءتيىستى دەڭگەيىن قامتاماسىز ەتۋ، بۇرىنعى يادرولىق پوليگوننىڭ جەرلەرىن پايدالانۋ جانە ونىڭ اۋماعىن وڭالتۋ ماسەلەلەرىندە مەملەكەتتىك باقىلاۋدى كۇشەيتۋ اۋماقتى وڭالتۋ، ەلدىڭ عىلىمي الەۋەتىن دامىتۋ، يادرولىق ەنەرگيانى بەيبىت ماقساتتا پايدالانۋ ماسەلەلەرىندە قازاقستاننىڭ ۇستانىمىن نىعايتۋ ماقساتىندا ازىرلەنگەن.
زاڭ بويىنشا راديواكتيۆتى ۋچاسكەلەر انىقتالىپ، وندا سەمەي يادرولىق قاۋىپسىزدىك ايماعى قۇرىلادى. سول جەرلەردى قالپىنا كەلتىرۋ ءۇشىن جۇيەلى جۇمىس اتقارىلادى.
"ماقسات – بۇرىنعى پوليگون ماڭىندا تۇراتىن حالىقتىڭ رادياسيالىق قاۋىپسىزدىگىن كۇشەيتۋ. ال تابيعاتى لاستانباعان، ەكولوگيالىق احۋالى جاقسى جەرلەر ەل يگىلىگىنە قىزمەت ەتەدى. ءسويتىپ، جەرگىلىكتى تۇرعىندار جايىلىم جەرلەردى پايدالانا الادى. وسىلايشا قىرىق جىل يادرولىق سىناقتان زارداپ شەككەن كيەلى ولكە دامۋدىڭ جاڭا كەزەڭىنە قادام باسۋدا"، - دەدى ق ر پارلامەنتى ءماجىلىسىنىڭ ءتوراعاسى ەرلان قوشانوۆ.