توقايەۆ: "ساۋاتسىز، اسىرەسە اشكوز، كورسەقىزار، جەمقورلىققا بەيىم ادام ەشقاشان پاتريوت بولا المايدى"

مەملەكەت باسشىسى قاسىم-جومارت توقايەۆ قارجى مونيتورينگى اگەنتتىگىندە جيىن وتكىزدى، - دەپ حابارلايدى aqshamnews.kz ءتىلشىسى.

پرەزيدەنت سالا ماماندارىن كاسىبي مەرەكەسىمەن قۇتتىقتاپ، وسىدان بەس جىل بۇرىن، ەل ىشىندە اۋقىمدى وزگەرىستەر قولعا الىنىپ جاتقان تاريحي كەزەڭدە قۇرىلعان قارجىلىق مونيتورينگ اگەنتتىگى وزىنە جۇكتەلگەن جاۋاپكەرشىلىك پەن مىندەتتى ابىرويمەن ورىنداپ كەلە جاتقانىنا نازار اۋداردى. 

"قارجىلىق بارلاۋ قىزمەتكەرلەرىنەن ناعىز جاۋاپكەرشىلىك پەن جاسامپازدىق تۇرعىسىنان قارايتىن وتانشىلدىقتى تالاپ ەتەمىن. مۇنداي قاسيەتكە يە ادامدار جەمقورلىقتان، اشكوزدىكتەن، ساۋاتسىزدىقتان ادا بولۋعا ءتيىس. ساۋاتسىز، اسىرەسە اشكوز، كورسەقىزار، جەمقورلىققا بەيىم ادام ەشقاشان پاتريوت بولا المايدى. ارينە، ول ءوزىن پاتريوت ساناۋى، الاۋلاتىپ، جالاۋلاتىپ سويلەۋى مۇمكىن. الايدا ول پاتريوت ەمەس جانە ونى ءبارى بىلەدى. سوندىقتان بۇل ارادا وتانشىلدىقتى دۇرىس تۇسىنە بىلگەنىمىز ابزال. مەن بۇل جونىندە قىزىلوردادا وتكەن ۇلتتىق قۇرىلتاي وتىرىسىندا ايتتىم. قازىرگى ۋاقىتتا جاڭا كونستيتۋسيانىڭ مازمۇنىن قاراپ جاتىرمىز. ءبىز وسى وزگەرىستەر اياسىندا پاتريوتيزم تۋرالى ۇعىمدى ناقتىلاپ، جاۋاپكەرشىلىككە ءارى جاسامپازدىققا قۇرىلعان وتانشىلدىقتى ايقىنداي الامىز دەپ ويلايمىن. ناعىز پاتريوت بارلىق جەردە، ول قارجىلىق مونيتورينگ اگەنتتىگى نەمەسە مەملەكەتتىك مەنشىكتەگى كاسىپورىن بولسىن، جەكە كاسىپكەرلىك نىسانى، ۋنيۆەرسيتەت، مەكتەپ بولسىن، ادال ەڭبەك ەتۋگە ءتيىس. اركىم ءوز جۇمىسىن جاقسى اتقارسا، ونى پاتريوت دەپ سانايمىز. جالپى، تەكسەرۋ شارالارى مەملەكەتتىڭ الەۋمەتتىك مىندەتتەمەلەرىنە قاتىستى جۇمىسقا كەسىرىن تيگىزبەۋى كەرەك. بيۋدجەت قاراجاتىن ۋاقتىلى يگەرۋگە دە كەدەرگى كەلتىرمەۋى قاجەت. اقپاراتتىق، كوممەرسيالىق قاۋىپسىزدىكتى جانە جەكە دەرەكتەردى قورعاۋ ماسەلەسىن نازاردا ۇستاعان ءجون"، – دەدى قاسىم-جومارت توقايەۆ.