ماجىلىستە يپوتەكالىق تۇرعىن ءۇي قارىزدارىن بەرۋ شارتتارىن جەڭىلدەتۋ ۇسىنىلدى

ءماجىلىس دەپۋتاتى مۇقاش ەسكەندىروۆ جامبىل وبلىسىندا تۇرعىن ۇيمەن قامتاماسىز ەتۋ پروسەسى زاڭناماداعى وزگەرىستەر مەن ەلەكترون بازاعا بايلانىستى تەجەلىپ قالعانىن ايتىپ، پرەمەر-مينيستردىڭ ءبىرىنشى ورىنباسارى رومان سكليارعا دەپۋتاتتىق ساۋال جولدادى، - دەپ حابارلايدى aqshamnews.kz ءتىلشىسى.

دەپۋتاتتىڭ ايتۋىنشا، وڭىردە كوممۋنالدىق تۇرعىن ءۇي قورىنان پاتەر الۋعا 57 434 ادام كەزەكتە تۇر، ال كەزەكتەگىلەردىڭ مالىمەتتەرى بار بولعانى 10% دەڭگەيىندە عانا جاڭارتىلعان.

"الايدا ساتىپ الىنعان پاتەرلەردى وسال توپتاعى ازاماتتارعا ۇلەستىرۋ قولدانىستاعى زاڭناماعا ەنگىزىلگەن تولىقتىرۋلار مەن وزگەرىستەر كەدەرگى بولىپ وتىر. بۇرىندا جەرگىلىكتى اتقارۋشى ورگانداردا بولعان فۋنكسيالار "تۇرعىن ءۇي قۇرىلىسى جيناق" بانكىنە (بۇدان بىلاي بانك) بەرىلدى جانە باسپاناعا مۇقتاج ازاماتتاردى ەسەپكە قويۋ ەلەكتروندىق بازاسى ارقىلى اۆتوماتتى تۇردە  جۇزەگە اسىرىلىپ جاتىر. وسى سەبەپتەرگە بايلانىستى كوممۋنالدىق تۇرعىن ءۇي قورىنان بولىنەتىن تۇرعىنجايدى كەلىسۋ تۋرالى وتىنىشكە دەر كەزىندە جاۋاپ بەرمەۋىنە جانە كەزەكتە تىركەلگەن ازاماتتاردىڭ دەرەكتەرىنىڭ تۇزەتىلىپ جاڭارتىلماۋىنا بايلانىستى باسپانامەن قامتاماسىز ەتۋ جۇمىستارى سوزىلىپ كەتتى. بۇگىنگى كۇنى كوممۋنالدىق تۇرعىن ءۇي قورىنان پاتەر الۋ كەزەگىنە تۇرعان 57 434 ازاماتتىڭ نەبارى 10 پايىزىنىڭ دەرەكتەرى تۇزەتۋلەر ەنگىزىلىپ جاڭارتىلعان. بۇعان ءتيىستى دەڭگەيدە تۇسىندىرمە جۇمىستارىنىڭ بولماۋى، ەلەكتروندىق سيفرلىق قولتاڭبامەن دۇرىس پايدالانۋدى، ۋاقىتىلى قول قويا الماۋى سەبەپ بولىپ وتىر"، - دەدى ول. 

دەپۋتات ساۋالىندا 2025 جىلى الەۋمەتتىك وسال توپتارعا ارنالعان جالدامالى تۇرعىن ءۇي ساتىپ الۋعا رەسپۋبليكالىق بيۋدجەتتەن 21،5 ملرد تەڭگە ءبولىنىپ، 1 425 پاتەر الىنعانىن اتاپ وتەدى. الايدا ساتىپ الىنعان پاتەرلەردى ۇلەستىرۋ ءىسى ازاماتتاردىڭ دەرەكتەرىن ۋاقىتىلى تۇزەتۋ، وتىنىشتەردى كەلىسۋ جانە ەلەكترون سيفرلىق قولتاڭبانى قولدانۋ ماسەلەلەرىنە تىرەلىپ، ناقتى ناتيجەنى تەجەپ وتىر.

ەسكەندىروۆ بۇل جەردە نەگىزگى ءتۇيىن – ءتۇسىندىرۋ جۇمىستارىنىڭ السىزدىگى مەن جۇيەدەگى راسىمدەردىڭ اۋىرلىعىندا دەيدى. سونىڭ سالدارىنان تۇرعىن ءۇي "بەرىلۋگە دايىن تۇرسا دا"، قاعازسىز جۇيەنىڭ "پروسەدۋراسى" حالىقتى سارساڭعا سالعان.

ەكىنشى كوتەرىلگەن ماسەلە – جەڭىلدەتىلگەن يپوتەكا ارقىلى ساتىلاتىن ۇيلەردىڭ كۆوتاسى.

دەپۋتات ونەركاسىپ جانە قۇرىلىس ءمينيسترىنىڭ №187 بۇيرىعىنا سايكەس، يپوتەكالىق تۇرعىن ءۇي قورىنىڭ كەمىندە 70%-ى الەۋمەتتىك وسال توپتارعا، 20%-ى جەتىم بالالارعا، ال 10%-ى كەزەكتەگى باسقا ازاماتتارعا ۇسىنىلاتىنىن ەسكە سالادى. ءبىراق ءدال وسى 70% تالاپ پاتەرلەردىڭ ۋاقىتىلى ساتىلۋىنا كەدەرگى كەلتىرۋى مۇمكىن ەكەنىن العا تارتادى.

مىسال رەتىندە تاراز قالاسىن كەلتىرەدى: 2025 جىلى ساتىلىمعا شىققان 706 پاتەردىڭ تولەم قابىلەتى راستالماعاندىقتان 588ء-ى عانا بەرىلگەن. ال بيىل تارازدا 1 278 پاتەردەن تۇراتىن 29 كوپقاباتتى ءۇيدىڭ قۇرىلىسى اياقتالىپ، ساتىلىمعا شىعارىلماق. ەگەر ولاردىڭ 895 پاتەرى (70%) الەۋمەتتىك وسال توپتارعا ۇسىنىلسا، بىلتىرعى جاعداي قايتالانۋى ىقتيمال دەيدى دەپۋتات. ونىڭ ۇستىنە، كەزەكتە تۇرعانداردىڭ 31 055ء-ى (54%) – الەۋمەتتىك وسال توپ وكىلدەرى.

ەسكەندىروۆتىڭ ءۋاجى بويىنشا، تولەم قابىلەتىنىڭ تومەن بولۋى پاتەرلەردىڭ وتپەي قالۋىنا، تيىسىنشە جەرگىلىكتى اتقارۋشى ورگانداردىڭ وبليگاسيالىق قارىزدارىن ۋاقىتىندا وتەۋىنە كەرى اسەر ەتەدى. وسىعان بايلانىستى ول:

• وسال توپتارعا ساتىلاتىن پاتەر ۇلەسىن 70%-دان 50%-عا دەيىن تومەندەتۋ، جانە/نەمەسە

• يپوتەكالىق قارىز بەرۋ شارتتارىن جەڭىلدەتۋ مۇمكىندىگىن قاراستىرۋدى ۇسىنادى.