سپورتشى پرەزيدەنتكە العىس ايتتى.
پرەزيدەنت قاسىم-جومارت توقايەۆ Australian Open، ينديان-ۋەللس جانە مايامي تۋرنيرلەرىندە كەرەمەت ونەر كورسەتكەن ەلەنا رىباكينانى قۇتتىقتاپ، شەبەرلىگى مەن جەڭىسكە دەگەن ەرىك-جىگەرى ءۇشىن ريزاشىلىعىن ءبىلدىردى، دەپ حابارلايدى Almaty-akshamy.kz اقورداعا سىلتەمە جاساپ.
مەملەكەت باسشىسى قازاقستاندىق تەننيسشىلەردىڭ جەتىستىگى وسكەلەڭ ۇرپاق اراسىندا وسى سپورت ءتۇرىنىڭ تانىمالدىلىعىن ارتتىرۋعا سەپتىگىن تيگىزەتىنىن اتاپ ءوتتى.
ەلەنا رىباكينا جەڭىس تۇعىرىنان كورىنگەن ساتتەرىندە قولداۋ بىلدىرگەنى جانە جۇرەكجاردى قۇتتىقتاۋلارىن جولداعانى ءۇشىن پرەزيدەنتكە العىس ايتتى. داڭقتى تەننيسشى الداعى ۋاقىتتا دا بەدەلدى حالىقارالىق جارىستاردا ءساتتى ونەر كورسەتۋگە بار كۇش-جىگەرىن جۇمسايتىنىن جەتكىزدى.
مەملەكەت باسشىسى قاسىم-جومارت توقايەۆ قازىرگى تاڭدا ەلىمىزدە 30 مىڭنان اسا ادام تەننيسپەن شۇعىلداناتىنىنا توقتالدى. ونىڭ 10 مىڭنان استامى – 10 جاسقا دەيىنگى بالالار. وسى سپورت تۇرىنە بۇقارالىق سيپات بەرۋ ماقساتىندا ەلىمىزدىڭ 17 ايماعىندا تەننيس كورتتارى سالىندى. سونداي-اق Baby tennis، «10 جاسقا دەيىنگى تەننيس» سەكىلدى جوبالار تابىستى جۇزەگە اسىرىلىپ جاتىر.
14-15 ءساۋىر كۇندەرى استانادا العاش رەت بيللي دجين كينگ كۋبوگىنىڭ ىرىكتەۋ ماچى وتەدى. تەننيستەن قازاقستاننىڭ ايەلدەر قۇراماسى پولشا كومانداسىنا قارسى وينايدى. بۇل كەزدەسۋدىڭ جەڭىمپازى الەم چەمپيوناتىنا جولداما الادى.
مەملەكەت باسشىسى حالىقارالىق دەڭگەيدەگى مۇنداي ءىس-شارالاردى ۇيىمداستىرۋ ەلىمىزدەگى تەننيستىڭ دامۋ دەڭگەيىن ارتتىرۋعا تىڭ سەرپىن بەرەتىنىن ايتتى. سونداي-اق پاريجدە وتەتىن جازعى وليمپيادا ويىندارىنا ليسەنزيا ۇتىپ العان وتاندىق تەننيسشىلەرگە ساتتىلىك تىلەدى.