بۇل تۋرالى "قازاق ءتىلى" قوعامىنىڭ راۋان كەنجەحان ۇلى ايتتى.
پرەزيدەنت قورعا ءوز قالتاسىنان 7 ملن تەڭگە اۋداردى، دەپ حابارلايدى Almaty-akshamy.kz
قوردىڭ باستى مىندەتى – مەملەكەتتىك ءتىلدى قولداۋ جانە دامىتۋمەن اينالىساتىن "قازاق ءتىلى" قوعامىنىڭ تۇراقتى ءارى ۇزاقمەرزىمدى دامۋىن قامتاماسىز ەتۋ
قازاقستان پرەزيدەنتى قاسىم-جومارت توقايەۆ مەملەكەتتىك ءتىلدى دامىتۋعا ارنالعان Qazaq tili قورىنا العاشقى بولىپ 7 ميلليون تەڭگە اۋداردى. بۇل تۋرالى "قازاق ءتىلى" قوعامىنىڭ پرەزيدەنتى، ۇلتتىق قۇرىلتايدىڭ مۇشەسى راۋان كەنجەحان ۇلى حابارلادى.
راۋان كەنجەحان ۇلى پرەزيدەنتتىڭ قابىلداۋىندا بولعاندا مەملەكەتتىك ءتىلدى دامىتۋعا ارنالعان ەنداۋمەنت قورىن قۇرۋدى ۇسىنعانىن ەسكە سالدى. ايتۋىنشا، پرەزيدەنت ۇسىنىستى قولداعان.
"QAZAQ TILI Endowment قورىن قۇرۋ، تىركەۋ، راسىمدەۋ شارالارى جاقىندا اياقتالىپ، بۇگىن قاسىم-جومارت كەمەل ۇلى سول قورعا ءبىرىنشى بولىپ 7 ميلليون تەڭگە كولەمىندە جەكە جارنا اۋداردى. پرەزيدەنت كورسەتكەن ۇلگىنى ەل ازاماتتارى، ءتىل جاناشىرلارى، كاسىپكەرلەر كەڭىنەن قولدايدى دەپ سەنەمىز"، - دەپ جازدى ول الەۋمەتتىك جەلىدەگى پاراقشاسىندا.
"قازاق ءتىلى" قوعامىنىڭ پرەزيدەنتى توقايەۆقا انا تىلىمىزگە دەگەن ادال ازاماتتىق ۇستانىمى، كورسەتكەن زور قۇرمەتى، جەكە ۇلگىسى ءۇشىن العىس ءبىلدىردى.
قوردىڭ باستى مىندەتى – مەملەكەتتىك ءتىلدى قولداۋ جانە دامىتۋمەن اينالىساتىن ەلىمىزدەگى ەڭ ءىرى ۇيىم "قازاق ءتىلى" قوعامىنىڭ تۇراقتى ءارى ۇزاقمەرزىمدى دامۋىن قامتاماسىز ەتۋ. ەنداۋمەنت قورىنىڭ ەرەكشەلىگى – قورعا جينالعان قارجى جۇمسالمايدى. قورداعى قاراجات باسقارۋعا بەرىلەدى جانە ينۆەستيسياعا قۇيىلادى. ينۆەستيسيالىق قىزمەتتەن تۇسكەن تابىس "قازاق ءتىلى" قوعامىنىڭ جارعىلىق مىندەتتەرىنە جۇمسالادى.
راۋان كەنجەحان ۇلى الەم ەلدەرىندە ءبىلىم بەرۋ مەن الەۋمەتتىك باعىتتا جۇمىس ىستەيتىن قوعامدىق ۇيىمداردىڭ تۇراقتى ءارى ۇزاقمەرزىمدى قىزمەتىن قامتاماسىز ەتۋ ءۇشىن ەنداۋمەنت قورىن قۇرۋ تاجىريبەسى كەڭ تارالعانىن اتاپ ءوتتى.
ءقازىر جاپونياداعى عىلىم مەن تەحنولوگيا قورى، سونىمەن قاتار، ستەنفورد، گارۆارد ۋنيۆەرسيتەتتەرىنىڭ قورلارى دۇنيە جۇزىندەگى ەڭ ءىرى ەنداۋمەنت قورلارىنىڭ قاتارىنا كىرەدى. قازاقستاندا دا ءىرى ۋنيۆەرسيتەتتەر، مەكتەپتەر مەن كوممەرسيالىق ەمەس ۇيىمداردىڭ ەنداۋمەنت قورلارى ءساتتى جۇمىس ىستەپ كەلەدى.
ونىڭ ايتۋىنشا، Qazaq tili Endowment قورىن بەدەلدى قوعام قايراتكەرلەرى، عالىم-لينگۆيستەر مەن مەملەكەت وكىلدەرىنەن قۇرالعان تاۋەلسىز قامقورشىلار كەڭەسى باقىلايدى.
مەملەكەت باسشىسى "قازاق ءتىلى" قوعامىنا قازاق تىلىندەگى مەديا جانە باسپا كونتەنتىن كوبەيتۋ ءۇشىن ناقتى جوبالار مەن شارالار كەشەنىن جۇزەگە اسىرۋ، ءتىلدى وقىتۋ مەن ۇيرەتۋ ادىستەمەسىن جەتىلدىرۋ، وقۋ ساۋاتتىلىعى مەن جازۋ مادەنيەتىن دامىتۋ، سونىمەن قاتار، قازاق ءتىلىن قولداۋ مەن ءتىلدى قولداناتىن قاۋىمداستىق اياسىن كەڭەيتۋ ماقساتىندا زاماناۋي تەحنولوگيالىق شەشىمدەردى كەڭىنەن پايدالانۋدى تاپسىرعان.