مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە "ءقاۋىپسىز قالا" ۇلتتىق پلاتفورماسىن ىسكە قوسۋ كەرەگىن ايتتى، - دەپ حابارلايدى aqshamnews.kz ءتىلشىسى.
پرەزيدەنت سوزىنشە، جىل باسىنان بەرى پرەزيدەنت اكىمشىلىگىنە ءدال وسىنداي، ياعني سوتالدى ءىس جۇرگىزۋ ماسەلەسى بويىنشا ءۇش مىڭ شاعىم كەلىپ تۇسكەن. سوندىقتان سيفرلىق تەحنولوگيانىڭ مۇمكىندىگىن ءتيىمدى پايدالانۋ قاجەت.
"مىسالى، ءقازىر ەلىمىزدە ىسكە قوسىلعان "زاڭ مەن ءتارتىپ" پلاتفورماسىن ەلەكتروندى ۇكىمەت پەن تانىمال بانك قوسىمشالارى ارقىلى قولدانۋعا بولادى. وسى سيفرلىق پلاتفورمانىڭ ارقاسىندا ازاماتتارىمىز پوليسياعا تىكەلەي جانە جەدەل تۇردە حابارلاما جولداي الادى. وسىلايشا، كەز كەلگەن قۇقىق بۇزۋشىلىققا "مۇلدەم توزبەۋشىلىك" قاعيداتىن ءىس جۇزىندە جۇزەگە اسىرۋعا ىقپال ەتەدى.
مەن اقتوبە وبلىسىنا ساپارىم كەزىندە جەدەل باسقارۋ ورتالىعىندا بولدىم. ورتالىقتا جاساندى ينتەللەكتىنىڭ كومەگىمەن قالاداعى احۋالعا تاۋلىك بويى بەينەباقىلاۋ جۇرگىزىلەدى. پوليسيا قىزمەتىنىڭ تيىمدىلىگىن ارتتىراتىن وسىنداي ورتالىقتاردى ەلىمىزدىڭ بارلىق قالاسى مەن اۋدانىندا اشۋ قاجەت. اكىمدەر بۇل جۇمىسقا بەلسەندى تۇردە كىرىسۋگە ءتيىس.
بۇدان بولەك، "ءقاۋىپسىز قالا" ۇلتتىق پلاتفورماسىن ىسكە قوسۋ كەرەك. بۇل – قالاداعى بەينەباقىلاۋ قۇرالدارى ەندى ادامنىڭ بەت-جۇزىن انىقتاپ، ونىڭ ءجۇرىس-تۇرىسىنا تالداۋ جاساپ، كوشەدەگى كولىكتى دە ەسەپكە الادى دەگەن ءسوز. مۇنداي وزىق تەحنولوگيالار ءتۇرلى زاڭسىزدىقتىڭ الدىن الۋعا مۇمكىندىك بەرەدى، سول ارقىلى قوعامدىق ءتارتىپتى نىعايتا تۇسەدى"، - دەدى ول.