مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە پوليسەيلەر مەن مەملەكەتتىك قىزمەتكەرلەردى قۇتتىقتادى، - دەپ حابارلايدى aqshamnews.kz ءتىلشىسى.
پرەزيدەنت بۇگىن ەلىمىزدە پوليسيا كۇنى جانە مەملەكەتتىك قىزمەتشى كۇنى اتالىپ وتەتىنىن ايتىپ، ولاردى قۇتتىقتادى.
"مەملەكەتكە قىزمەت ەتۋ – ەڭ قۇرمەتتى ءارى اسا جاۋاپتى مىندەت. سىزدەر زاڭ مەن ءتارتىپتى ساقتاۋعا جانە ازاماتتاردىڭ قۇقىعىن قورعاۋعا زور ۇلەس قوسىپ جۇرسىزدەر. ءقازىر دۇنيە ءجۇزى الماعايىپ، بۇلىڭعىر، ياعني، وتە كۇردەلى كەزەڭدى باستان وتكەرىپ جاتىر. وسىنداي قۇبىلمالى ۋاقىتتا قوعامدىق قاۋىپسىزدىكتى ساقتاۋ، زاڭنىڭ مۇلتىكسىز ورىندالۋىن قامتاماسىز ەتۋ – ايرىقشا ماڭىزدى مىندەت. سول سەبەپتى بۇگىن ءبىز العاش رەت وسىنداي قۇراممەن جينالىپ وتىرمىز. قۇقىق قورعاۋ جۇيەسىندەگى بارلىق جاۋاپتى قۇرىلىمدار جۇمىلا جۇمىس ىستەۋى قاجەت"، - دەدى پرەزيدەنت.
سونداي-اق، ول ەلىمىزدە "زاڭ مەن ءتارتىپ" قاتاڭ ساقتالۋىنا قوعام وكىلدەرىنىڭ قوسار ۇلەسى دە وراسان زور ەكەنىن ەسكە سالدى.
"ءقازىر وسى جيىنعا ورتالىق جانە جەرگىلىكتى اتقارۋشى ورگان باسشىلارى، دەپۋتاتتار، ساراپشىلار جانە بەلسەندى ازاماتتار قاتىسىپ وتىر. كۇشتىك قۇرىلىمداردى جاڭعىرتۋ ىسىندە جاڭا بۋىننىڭ اتقاراتىن ءرولى ەرەكشە. سول سەبەپتى، بۇگىنگى باسقوسۋعا اكادەميالاردىڭ كۋرسانتتارى دا ارنايى شاقىرىلدى. ترانسۇلتتىق قىلمىستىق توپتارمەن كۇرەسۋ ءۇشىن حالىقارالىق ىنتىماقتاستىقتى دامىتۋ وتە ماڭىزدى. وسى جەردە بۇگىن شەتەلدىك پوليسيا اتتاشەلەرى وتىر. قۇقىق قورعاۋ ورگاندارىمەن جۇرگىزىپ جاتقان حالىقارالىق ىنتىماقتاستىق جۇمىسى ءۇشىن سىزدەرگە ەرەكشە ريزاشىلىعىمدى بىلدىرەمىن"، - دەدى توقايەۆ.