مەملەكەت باسشىسى قاسىم-جومارت توقايەۆ اوسشك باس حاتشىسى قايرات سارىبايدى قابىلدادى، دەپ حابارلايدى Almaty-akshamy.kz
كەزدەسۋ بارىسىندا مەملەكەت باسشىسىنا ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ قازىرگى قىزمەتى جانە الداعى دامۋ پەرسپەكتيۆاسى تانىستىرىلدى، دەلىنگەن اقوردا حابارلاماسىندا.
باس حاتشى قايرات سارىباي پرەزيدەنتكە ۇيىمنىڭ 2022 جىلعى 6-شى سامميتىندە قابىلدانعان اوسشك ترانسفورماسياسى جونىندەگى استانا مالىمدەمەسىندە كورسەتىلگەن نەگىزگى باعىتتاردىڭ ورىندالۋ بارىسى تۋرالى مالىمەت بەردى.
بۇدان بولەك، فورۋمنىڭ تۇراقتى ينستيتۋتتارىنىڭ جۇمىسى، ورنىقتى ءوزارا بايلانىس، قارجىلىق سەرىكتەستىك، ەكولوگيا سالالارىنداعى باستامالاردى بەلسەندى جۇزەگە اسىرۋ، سونداي-اق ازيا ەلدەرى كەڭىستىگىندە جاستار اراسىنداعى جانە ءبىلىم سالاسىنداعى تاجىريبە الماسۋ پەرسپەكتيۆالارى جونىندە باياندالدى.
كەزدەسۋ سوڭىندا قاسىم-جومارت توقايەۆ اوسشك ماقساتتارى مەن مىندەتتەرىن، سونداي-اق ۇيىمنىڭ استانادا وتكەن 6-شى سامميتىندە كوتەرىلگەن باستامالاردى ىسكە اسىرۋ ماڭىزدى ەكەنىنە نازار اۋداردى.