توقايەۆ پەن ەردوعان ترانسكاسپيي ءدالىزىن دامىتۋ ماسەلەسىن تالقىلادى

انكارا سوڭعى 15 جىلدا قازاقستانعا 4،35 ملرد دوللار ينۆەستيسيا قۇيدى

قازاقستان مەن تۇركيا اراسىنداعى ساۋدا اينالىمىن 10 ملرد دوللارعا جەتكىزۋ كەرەك. بۇل تۋرالى قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ 4ء-شى وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«بۇگىن شاعىن قۇرامدا بولعان كەلىسسوزىمىز باۋىرلاستىق رۋحىندا ءوتتى. سىزبەن ەكىجاقتى جانە كوپجاقتى ىنتىماقتاستىقتى، سونداي-اق ماڭىزدى حالىقارالىق ماسەلەلەردى تالقىلادىق. ىقپالداستىقتىڭ باسىم باعىتتارىنا تىڭ سەرپىن بەرۋگە كەلىستىك. ساۋدا-ەكونوميكالىق جانە ينۆەستيسيالىق ىنتىماقتاستىق قارقىندى دامىپ جاتقانىن اتاپ وتتىك. ەندى الدىمىزدا تۇرعان ماقسات - ساۋدا اينالىمىن 10 ملرد دوللارعا جەتكىزۋ»، - دەدى قاسىم-جومارت توقايەۆ تۇركيا پرەزيدەنتى رەجەپ تاييپ ەردوعانعا قاراتا.

مەملەكەت باسشىسىنىڭ دەرەگىنشە، انكارا سوڭعى 15 جىلدا قازاقستانعا 4،35 ملرد دوللار ينۆەستيسيا قۇيدى.

ال قازاقستان تۇركياعا 1،13 ملرد دوللار قارجى سالدى. تۇركيا قازاقستاننىڭ ەڭ ءىرى 10 ينۆەستورىنىڭ قاتارىندا تۇر.

«جالپى، ەكىجاقتى ساۋدا-ساتتىق الەۋەتىن ارتتىرۋ جولىندا ترانزيتتىك تاسىمال باعىتتارى ماڭىزدى ءرول اتقارادى. ءبىز تاسىمال شىعىنىن ازايتىپ، جەتكىزۋ مەرزىمىن قىسقارتۋ ءۇشىن ترانسكاسپيي ءدالىزىن دامىتۋعا شاقىرامىز. بۇل ماسەلە بويىنشا ءبىز بۇگىن پىكىر الماستىق. كوزقاراسىمىز بىردەي»، - دەدى ق ر پرەزيدەنتى.