پرەزيدەنت قاسىم-جومارت توقايەۆ پەن باس حاتشى انتونيۋ گۋتەرريش الماتى قالاسىنداعى بۇۇ وڭىرلىك ورتالىعىنا باردى، - دەپ حابارلايدى اqshamnews.kz.
مەملەكەت باسشىسى مەن بۇۇ باس حاتشىسى قازاقستان ۇكىمەتى مەن ۇيىم اراسىندا بۇۇ-نىڭ ورتالىق ازيا مەن اۋعانستانعا ارنالعان ورنىقتى دامۋ ماقساتتارى جونىندەگى وڭىرلىك ورتالىعىن قۇرۋ تۋرالى كەلىسىمگە قول قويۋ راسىمىنە قاتىستى.
ەسكە سالايىق، بۇعان دەيىن مەملەكەت باسشىسى بۇۇ باس حاتشىسى انتونيۋ گۋتەرريشپەن كەلىسسوز جۇرگىزدى. كەزدەسۋ بارىسىندا پرەزيدەنت قاسىم-جومارت توقايەۆ قازاقستانعا ساپارمەن كەلگەن باس حاتشىعا ريزاشىلىعىن ءبىلدىردى.
مەملەكەت باسشىسى بۇۇ باس اسسامبلەياسىنىڭ 80ء-شى سەسسياسى قارساڭىنداعى تىعىز جۇمىس كەستەسىنە قاراماستان مارتەبەلى مەيماننىڭ الماتىعا ارنايى كەلگەنىن اتاپ ءوتتى. بۇل ساپاردىڭ ەلىمىز ءۇشىن ءمانى زور ءارى ۇيىمنىڭ ورنىقتى دامۋ كۇن تارتىبىنە بەيىلدىگىن كورسەتەدى.
قاسىم-جومارت توقايەۆتىڭ ايتۋىنشا، ورتالىق ازيادا ورنىقتى دامۋ ماقساتتارىنا ارنالعان العاشقى ورتالىقتىڭ اشىلۋى – بۇكىل ايماق ءۇشىن ايتۋلى جەتىستىك.
"وسى باستامانى قولداعانىڭىز ءۇشىن سىزگە جانە ءسىزدىڭ ۇجىمىڭىزعا ءوزىمنىڭ، سونداي-اق قازاقستان حالقىنىڭ اتىنان العىس ايتامىن. ءسىزدىڭ دەر كەزىندە قولعا العان ءارى كەلەشەكتى ويلاعان UN80 باستاماڭىزدى جوعارى باعالايمىن. قازاقستان ۇيىمدى رەفورمالاۋ جولىنداعى ىس-ارەكەتتەرىڭىزدى تولىق قولدايدى. وسى رەتتە ەلىمىزدىڭ ۇيىم قىزمەتىنىڭ نەگىزىندە جاتقان مۋلتيلاتەراليزم، ديپلوماتيا جانە ىنتىماقتاستىق قاعيداتتارىنا ءاردايىم بەيىل ەكەنىن تاعى دا راستايمىن"، – دەدى پرەزيدەنت.