قۇنى 500 ميلليون دوللاردان اسادى.
قازاقستان پرەزيدەنتى سيرەك كەزدەسەتىن مەتالدار بويىنشا وڭىرلىك زەرتتەۋ ورتالىعىن قۇرۋدى ۇسىندى، دەپ حابارلايدى aqshamnews.kz
بۇگىن اقوردادا ورتالىق ازيا مەملەكەتتەرى باسشىلارى مەن گەرمانيا فەدەرالدىق كانسلەرىنىڭ كەزدەسۋى ءوتتى. سول جەردە قازاقستان پرەزيدەنتى گەرمانيا كومپانيالارىن سيرەك كەزدەسەتىن مەتالداردى گەولوگيالىق بارلاۋ جانە يگەرۋ جۇمىستارىن بىرگە جۇرگىزۋگە شاقىردى. ال سەرىكتەستىك بايلانىستاردى "شيكىزاتتى تەحنولوگياعا ايىرباستاۋ" قاعيداتى بويىنشا ورناتۋعا بولادى.
"وسى ورايدا HMS Bergbau كومپانياسىنىڭ شىعىس قازاقستان وبلىسىندا ءليتييدى يگەرۋ جانە وڭدەۋ بويىنشا ينۆەستيسيالىق جوبانى ىسكە اسىرۋىن قۇپتايمىز. ونىڭ قۇنى 500 ميلليون دوللاردان اسادى. ءبىز ەلىمىزدىڭ اۋماعىندا باعالى جانە ءتۇستى مەتالداردىڭ كەن ورنىن بارلاپ، يگەرۋ ءۇشىن گەرمانيالىق ينۆەستورلارعا قولايلى جاعداي جاساۋعا دايىنبىز. ەۋروپالىق سەرىكتەستەرىمىزدىڭ قولداۋىمەن قازاقستاننىڭ تەحنولوگيالىق بولجاۋ ورتالىعى بازاسىنان سيرەك كەزدەسەتىن مەتالدار بويىنشا وڭىرلىك زەرتتەۋ ورتالىعىن قۇرعان ءجون دەپ سانايمىز"،-دەدى توقايەۆ.
قازاقستان كولىك-لوگيستيكا سالاسىنداعى بايلانىستى نىعايتۋ ماسەلەسىنە دە باسا ءمان بەرىپ وتىر. "ورتا ءدالىزدى" ودان ءارى دامىتۋدىڭ ينۆەستيسيالىق تۇرعىدان بولاشاعى زور.
"قازاقستان Global Gateway باعدارلاماسى اياسىندا "ورتا ءدالىزدى" دامىتۋ ءۇشىن ەۋروپالىق سەرىكتەستەردىڭ 10 ميلليارد ەۋرو ءبولۋ تۋرالى شەشىمىن قۇپتايدى. وسى باعىتتى ترانسەۋروپالىق كولىك جەلىسىمەن جانە Global Gateway ستراتەگياسىمەن ۇشتاستىرۋدا گەرمانيا تاراپى قولداۋ كورسەتەدى دەپ سەنەمىز"، -دەدى پرەزيدەنت.