پرەزيدەنت قاسىم-جومارت توقايەۆ جوعارى اۋديتورلىق پالاتا ءتوراعاسى ءاليحان سمايىلوۆتى قابىلدادى، - دەپ حابارلايدى اqshamnews.kz.
قاسىم-جومارت توقايەۆقا بيىلعى I جارتىجىلدىقتا 20 تريلليون تەڭگەنى قامتيتىن 12 مەملەكەتتىك اۋديت جۇرگىزىلگەنى تۋرالى باياندالدى. بۇل 2024 جىلدىڭ وسى كەزەڭىمەن سالىستىرعاندا 7،1 ەسەگە ارتىق.
ءاليحان سمايىلوۆتىڭ ايتۋىنشا، اۋديتورلىق تەكسەرىستەر ورتا ءبىلىم بەرۋ، دارى-دارمەكپەن قامتاماسىز ەتۋ، سيفرلىق دامۋ، ەلەكتر ەنەرگەتيكاسى جانە جوعارى جەتىستىكتەر سپورتىن قارجىلاندىرۋ سەكىلدى نەگىزگى سالالاردى قامتىعان.
ۇكىمەتكە جانە اۋديت جۇرگىزىلگەن نىساندارعا 60-تان استام ۇسىنىم مەن 450 تارماقتان تۇراتىن ۇيعارىم بەرىلدى. 20 فاكتى بويىنشا ءىس ماتەريالدارى قۇقىق قورعاۋ ورگاندارىنا جولداندى.
پرەزيدەنتكە جوعارى اۋديتورلىق پالاتانىڭ ۇسىنىسىمەن ازىرلەنگەن زاڭنامالىق باستامالار جونىندە ەگجەي-تەگجەيلى مالىمەت بەرىلدى. ماسەلەن، ەندى جوعارى اۋديتورلىق پالاتا بيۋدجەتتەن تىس قورلاردى تەكسەرۋ قۇزىرەتىنە يە بولدى.
مەملەكەت باسشىسىنىڭ تاپسىرمالارىن ورىنداۋ ماقساتىندا ۇلتتىق قور قارجىسىن مونيتورينگتەۋ جونىندەگى كوميسسيا جۇمىسى قايتا ۇيىمداستىرىلدى. بۇل قور قاراجاتىنىڭ جۇمسالۋىنا باقىلاۋدى كۇشەيتىپ، جاريالىلىقتى ارتتىرۋعا مۇمكىندىك بەرەدى.
بۇدان بولەك، جىلىتۋ ماۋسىمىنا دايىندىققا سالعىرت قاراعانى ءۇشىن جىلۋمەن قامتاماسىز ەتەتىن كاسىپورىندار مەن ولاردىڭ ءبىرىنشى باسشىلارىنىڭ جاۋاپكەرشىلىگىن كۇشەيتۋ، سونداي-اق نارىقتىڭ بارلىق سۋبەكتىلەرىنە ارنالعان تاۋارلى گازدىڭ بولشەك باعاسىنا مەملەكەتتىك باقىلاۋدى كەڭەيتۋ سەكىلدى ماڭىزدى باستامالار بار.
قاسىم-جومارت توقايەۆ مەملەكەتتىك اۋديت جۇيەسىن كەزەڭ-كەزەڭىمەن دامىتۋدى تاپسىردى. بۇل رەتتە ونىڭ تيىمدىلىگى مەن اشىقتىعىنا باسا ءمان بەرگەن ءجون.
پرەزيدەنت مەملەكەت قاراجاتىنىڭ جۇمسالۋىن باقىلاۋعا زاماناۋي سيفرلىق تەحنولوگيالاردى ەنگىزۋ ماڭىزدى ەكەنىن اتاپ ءوتتى. سونىمەن قاتار باسى ارتىق شىعىنداردى ازايتۋ، ۇلتتىق رەسۋرستاردان تۇسەتىن پايدانى بارىنشا ەسەلەۋ قاجەت ەكەنىنە نازار اۋداردى.