ەكىباستۇزدا كاسىپورىندار 971 ملن تەڭگە سالىقتى بيۋدجەتكە تولىق قايتاردى، - دەپ حابارلايدى aqshamnews.kz.
پروكۋراتۋرا جۇزدەگەن ميلليون تەڭگەگە سالىقتىڭ تومەندەتىلگەنىن انىقتادى. ەكىباستۇز قالاسىنىڭ پروكۋراتۋراسى قاداعالاۋ قىزمەتى بارىسىندا وڭىردەگى ءىرى كاسىپورىنداردىڭ سالىقتى تولىق ءارى ۋاقىتىلى تولەمەگەنىن انىقتادى.
«ب. نۇرجانوۆ اتىنداعى ەكىباستۇز گرەس-1» ءجشس-ى جابدىقتاردى جوندەۋ كەزىندە كىرىس اكەلەتىن قىزمەتكە قاتىسى جوق تاۋارلار، جۇمىستار مەن قىزمەتتەر بويىنشا سومالاردى شەگەرىمگە جاتقىزعان. ناتيجەسىندە 421 ملن تەڭگە كولەمىندە سالىق تولەنبەگەن.
سونداي-اق، «قازاقستاندىق ۆاگون جاساۋ كومپانياسى» ءجشس-نىڭ قىزمەتىندە ءونىمدى وتكىزۋ اينالىمىنىڭ تومەندەگەنى انىقتالىپ، بۇل دا بيۋدجەتكە تۇسەتىن تۇسىمگە اسەر ەتكەن — تولەنبەگەن سالىق سوماسى 550 ملن تەڭگە بولدى.
قاداعالاۋ اكتىسى نەگىزىندە سالىق ورگاندارى كامەرالدىق باقىلاۋ جۇرگىزىپ، سالىق تولەۋشىلەردىڭ قاتىسۋىمەن اكىمشىلىك تىڭداۋلار ۇيىمداستىرىلدى.
جۇرگىزىلگەن جۇمىستاردىڭ ناتيجەسىندە انىقتالعان بارلىق بۇزۋشىلىقتار جويىلىپ، كاسىپورىندار سالىق مىندەتتەمەلەرىن ءوز ەركىمەن ورىنداپ، جەتىسپەيتىن سوما تولىق كولەمدە مەملەكەتتىك بيۋدجەتكە اۋدارىلدى.