توقايەۆ جوعارعى سوت ءتوراعاسىن قابىلدادى

ءتوراعا سوت جۇيەسىنىڭ قازىرگى قىزمەتى جونىندە مالىمەت بەردى.

پرەزيدەنت جوعارعى سوت ءتوراعاسى اسلامبەك مەرعالييەۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.

اسلامبەك مەرعالييەۆ سوت جۇيەسىنىڭ قازىرگى قىزمەتى جونىندە مالىمەت بەردى:

پرەزيدەنتتىڭ دەربەس كاسساسيالىق ينستانسيا قۇرۋ ءۇشىن كونسۋلتاسيالار وتكىزۋ تۋرالى تاپسىرماسىنىڭ ورىندالۋ بارىسى تۋرالى باياندادى. زاڭگەرلەرمەن، عالىمدارمەن، بيزنەس-قوعامداستىق وكىلدەرىمەن جانە پارلامەنت پالاتالارىنىڭ دەپۋتاتتارىمەن بىرلەسە تالقىلاۋ جۇمىستارى جۇرگىزىلىپ، سونىڭ نەگىزىندە ەلوردادا (قىلمىستىق، ازاماتتىق جانە اكىمشىلىك ىستەر بويىنشا) ءۇش كاسساسيالىق سوت قۇرۋ مودەلىنە وڭ باعا بەرىلگەنىن ايتتى؛

جوعارعى سوت الدىن الا قاراۋ ينستيتۋتىن جويۋدى، «تولىق كاسساسيانى» قولدانۋدى، قارالۋى 6 ايدان اسپايتىن «اقىلعا قونىمدى مەرزىم» بەلگىلەۋدى، سونداي-اق تاراپتاردىڭ مىندەتتى تۇردە قاتىسۋىمەن سوت پروسەسىن جۇرگىزۋدى ۇسىندى. ءوز كەزەگىندە، جوعارى سوت ورگانى قاداعالاۋ ىسىنە جانە سوت پراكتيكاسىنىڭ ءبىرىڭعاي بولۋىن قامتاماسىز ەتۋگە باسا ءمان بەرەتىنىن جەتكىزدى؛

اكىمشىلىك ادىلەتتىڭ جۇمىسى مەن حالىقارالىق ىنتىماقتاستىقتى دامىتۋ ماسەلەسى جونىندە ايتتى. جوعارعى سوت ءتوراعاسى سيفرلاندىرۋ جانە سوت قىزمەتىنىڭ اشىقتىعى مەن سوت تورەلىگىنىڭ قولجەتىمدى بولۋىن جاقسارتۋ ماقساتىندا جاساندى ينتەللەكت ەلەمەنتتەرىن ەنگىزۋ تۋرالى حابارلادى.

مەملەكەت باسشىسى سوت جۇيەسىندە جۇرگىزىلىپ جاتقان رەفورمالاردىڭ ساپاسىنا جانە بارلىق ساتىداعى ىستەردى قاراۋ كەزىندە زاڭدىلىقتى قامتاماسىز ەتۋگە ەرەكشە نازار اۋداردى.