كەزدەسۋ بارىسىندا وبلىستىڭ اگروونەركاسىپ كەشەنىن دامىتۋ شارالارىنا باسا نازار اۋدارىلدى.
مەملەكەت باسشىسىنا ءوڭىردىڭ 2022 جىلعى الەۋمەتتىك-ەكونوميكالىق دامۋ كورسەتكىشى تۋرالى ەسەپ بەرىلىپ، الداعى كەزەڭگە ارنالعان جوسپارى تانىستىرىلدى، دەپ حابارلايدى Almaty-akshamy.kz اقوردانىڭ تەلەگرامداعى كانالىنا سىلتەمە جاساپ.
اتاپ ايتقاندا، يگەرىلمەي جاتقان جەرلەردى قايتارىپ، اۋىل شارۋاشىلىعى اينالىمىنا قوسۋ، يرريگاسيا جۇيەلەرىن قالپىنا كەلتىرۋ جانە يننوۆاسيالىق اگروتەحنولوگيالاردى قولدانۋ ارقىلى ەگىن ونىمدىلىگىن ارتتىرۋ ماسەلەلەرى تالقىلاندى.
بەيبىت يسابايەۆتىڭ ايتۋىنشا، قانت ءوندىرىسى سالاسىنىڭ دامۋى ۇدايى باقىلاۋدا. اقسۋ قانت زاۋىتىن ىسكە قوسۋ جۇمىستارى اياقتالۋعا جاقىن. بيىل كاسىپورىن 40 مىڭ تونناعا دەيىن قانت قۇراعىن ءوندىرۋدى جوسپارلاپ وتىر.
جالپى، وڭىردە وسى جىلى 132 مىڭ تونناعا دەيىن قانت وندىرىلەدى. بۇل وبلىستىڭ قانتقا دەگەن قاجەتتىلىگىن تولىق وتەپ قانا قويماي، ءونىمدى باسقا وڭىرلەرگە دە جەتكىزۋگە مۇمكىندىك بەرەدى. 2026 جىلعا قاراي قانت قىزىلشاسى القابىن ەكى ەسە ۇلعايتۋ كوزدەلىپ وتىر.
سونىمەن قاتار مەملەكەت باسشىسىنا تۇرعىن ءۇي قۇرىلىسى، شاعىن جانە ورتا كاسىپكەرلىكتى قولداۋ، جول ينفراقۇرىلىمىنىڭ، تۇرعىن ۇي-كوممۋنالدىق شارۋاشىلىعىنىڭ جاي-كۇيى، ونىڭ ىشىندە ءوڭىردىڭ گازبەن قامتاماسىز ەتىلۋى جونىندە مالىمەت بەرىلدى. بۇگىندە جەتىسۋ وبلىسىنداعى 22 ەلدى مەكەنگە گاز قۇبىرى تارتىلىپ، 288 مىڭ تۇرعىن كوگىلدىر وتىنعا قول جەتكىزدى. جىل سوڭىنا دەيىن تاعى 20 ەلدى مەكەن گازعا قوسىلادى.
بۇدان بولەك، 2025 جىلعا دەيىن وبلىستا 23 مەكتەپ سالۋ جوسپارلانىپ وتىر. سونىڭ ىشىندە 10 مەكتەپ «جايلى مەكتەپ» ۇلتتىق جوباسى اياسىندا پايدالانۋعا بەرىلمەك. «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى بويىنشا 59 مەديسينا نىسانىن سالۋ، سونداي-اق جەرگىلىكتى بيۋدجەت ەسەبىنەن 57 بلوكتى-مودۋلدى بولىمشەلەردى پايدالانۋعا بەرۋ كوزدەلگەن. پرەزيدەنتكە «قورعاس – شىعىس قاقپاسى» ارنايى ەكونوميكالىق ايماعىنىڭ دامۋ بارىسى جونىندە باياندالدى. ونىڭ اۋماعىندا يندۋستريالىق پاركتىڭ قۇرىلىسىن جۇرگىزۋ جوسپارلانىپ وتىر.
قاسىم-جومارت توقايەۆ بەيبىت يسابايەۆقا ينۆەستيسيا تارتۋ ءۇشىن تۋريزم، كولىك جانە لوگيستيكا سالالارىنىڭ الەۋەتىن بارىنشا ءتيىمدى پايدالانۋدى تاپسىردى. مەملەكەت باسشىسى وڭىردە اگروونەركاسىپ كەشەنى مەن قانت ءوندىرۋ سالاسىن دامىتۋ، سونداي-اق يگەرىلمەگەن اۋىل شارۋاشىلىعى جەرلەرىن مەملەكەتكە قايتارۋ ءىسىن جالعاستىرۋ ماڭىزدى ەكەنىن ايتتى.