قازاقستان 2024 جىلى V دۇنيەجۇزىلىك كوشپەندىلەر ويىندارىن وتكىزۋگە ءوتىنىم بەرگەن.
مەملەكەت باسشىسى قاسىم-جومارت توقايەۆ ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
قاسىم-جومارت توقايەۆقا قاۋىمداستىقتىڭ بىلتىر اتقارعان جۇمىستارىنىڭ قورىتىندىسى مەن الداعى كەزەڭگە ارنالعان جوسپارى تۋرالى باياندالدى.
يسلامبەك سالجانوۆتىڭ ايتۋىنشا، كوكپار، جامبى اتۋ، اۋدارىسپاق، تەڭگە ءىلۋ، بايگە، قۇسبەگىلىك، ءداستۇرلى ساداق اتۋ، توعىزقۇمالاق جانە اسىق اتۋ سەكىلدى ۇلتتىق سپورت تۇرلەرىنىڭ فەدەراسيالارى قاۋىمداستىق اياسىنا بىرىكتىرىلگەن. سونىمەن قاتار ۇلتتىق سپورتتىڭ دامۋىنا ساراپتاما جاسالىپ، جەكە-جەكە رەسپۋبيكالىق فەدەراسيالارمەن ينستيتۋسيونالدىق تۇرعىدا جۇمىس جۇرگىزىلە باستاعان.
2024 جىلى V دۇنيەجۇزىلىك كوشپەندىلەر ويىندارىن وتكىزۋگە بەرگەن قازاقستاننىڭ ءوتىنىمىن بىلتىر قىركۇيەك ايىندا بۇكىلالەمدىك ەتنوسپورت كونفەدەراسياسى ءبىراۋىزدان قولدادى.
كەزدەسۋدە قاسىم-جومارت توقايەۆ كەلەسى جىلى ەلىمىزدە وتەتىن اۋقىمدى شارانى ساپالى ءارى جوعارى دەڭگەيدە ۇيىمداستىرۋ جونىندە ناقتى تاپسىرمالار بەردى. مەملەكەت باسشىسىنىڭ ايتۋىنشا، V دۇنيەجۇزىلىك كوشپەندىلەر ويىندارى ۇلتتىق سپورت شارالارىمەن شەكتەلمەۋى كەرەك. اتالعان حالىقارالىق سپورت سايىسى قولونەر، تۋريزم، قىزمەت كورسەتۋ سالاسى سياقتى شاعىن جانە ورتا بيزنەس وكىلدەرى ءۇشىن دە ءتيىمدى ۇيىمداستىرىلىپ، كاسىپتەرىن ىلگەرلەتۋگە جاعداي جاسالۋى قاجەت.
سونىمەن قاتار قازاقستان پرەزيدەنتى ۇلتتىق سپورت تۇرلەرىنىڭ دامۋ تۇجىرىمداماسىن ازىرلەۋ قاجەت ەكەنىن جانە ات سپورتى ويىندارىنداعى قاۋىپسىزدىك ماسەلەسىن قاراستىرۋدى تاپسىردى.