مەگاپوليس باسشىسى پرەزيدەنتكە الماتىنىڭ الەۋمەتتىك-ەكونوميكالىق دامۋىنىڭ الدىن الا قورىتىندىسى تۋرالى ەسەپ بەردى.
مەملەكەت باسشىسى الماتى قالاسىنىڭ اكىمى ەربولات دوسايەۆتى قابىلدادى، دەپ حابارلايدى aqshamnews.kz اقورداعا سىلتەمە جاساپ.
ەربولات دوسايەۆ:
بيىلعى ءبىرىنشى جارتىجىلدىقتاعى الماتى قالاسىنىڭ الەۋمەتتىك-ەكونوميكالىق دامۋىنىڭ الدىن الا قورىتىندىسى تۋرالى باياندادى:
– اتالعان كەزەڭدە الماتىدا ينۆەستيسيالىق وركەندەۋدىڭ جوعارى قارقىنى بايقالادى. نەگىزگى كاپيتالعا سالىنعان ينۆەستيسيا كولەمى 15،8 پايىزعا ءوسىپ، 714،8 ميلليارد تەڭگەگە جەتتى؛
– جەكە ينۆەستيسيانىڭ كولەمى 21،1 پايىزعا ۇلعايدى، ونىڭ ىشىندە IT-سەكتوردا، سونداي-اق تۋريزم، وڭدەۋ ونەركاسىبى، دەنساۋلىق ساقتاۋ جانە كولىك سالالارىندا ءوسىم بار؛
– جىل سوڭىنا دەيىن 2 تريلليون تەڭگە ينۆەستيسيا تارتىلادى دەپ جوسپارلانىپ وتىر؛
– 2024 جىلدىڭ باسىنان بەرى 32،7 مىڭ جۇمىس ورنى اشىلدى. ونىڭ 75 پايىزى تۇراقتى جۇمىس ورنى.
قوعامدىق كولىكتى جاڭارتۋ مەن ەكولوگيالىق تالاپتارعا سايكەستەندىرۋ بويىنشا قابىلدانىپ جاتقان شارالار تۋرالى مالىمەت بەردى:
– بيىل ەكولوگيالىق تازا قوعامدىق كولىكتىڭ ۇلەسى 70 پايىزعا دەيىن ارتادى. بىلتىر بۇل كورسەتكىش 53،7 پايىزدى قۇراعان؛
– جەرگىلىكتى بيۋدجەت ەسەبىنەن جىل سوڭىنا دەيىن گازبەن جۇرەتىن 600 اۆتوبۋس، 100 ەلەكترلى اۆتوبۋس، 112 تروللەيبۋس ساتىپ الىنادى. سونداي-اق قالانىڭ تروللەيبۋس پاركى تولىعىمەن جاڭارتىلادى.
قالانىڭ جوعارعى بولىگىن سۋمەن قامتۋدىڭ رەزەرۆتىك سحەماسىن جاساۋ جونىندەگى تاپسىرماسىنىڭ ورىندالۋى تۋرالى باياندادى:
– بۇل باعىتتاعى قۇرىلىس جۇمىستارى بيىلعى شىلدە ايىندا اياقتالىپ، 6 جاڭا ۇڭعىما جانە 1،5 شاقىرىم ماگيسترالدىق قۇبىر پايدالانۋعا بەرىلدى. ناتيجەسىندە قوسىمشا سحەمانىڭ قۋاتى 60 پايىزعا ارتتى. بۇل مەدەۋ اۋدانىنىڭ 50 مىڭ تۇرعىنىن سۋمەن ۇزدىكسىز قامتاماسىز ەتۋگە مۇمكىندىك بەرەدى.
الەۋمەتتىك ينفراقۇرىلىمدى دامىتۋعا ەرەكشە كوڭىل بولىنەتىنىن ايتتى:
– بيىل 4 مەديسينالىق-سانيتارلىق العاشقى كومەك ورتالىعىنىڭ قۇرىلىسى جانە 12 ەمحانانىڭ كۇردەلى جوندەۋ جۇمىستارى اياقتالادى؛
– جىل سوڭىنا دەيىن 11 جاڭا مەديسينالىق-سانيتارلىق العاشقى كومەك ورتالىعى مەن ەمحانا قۇرىلىسىنىڭ جوباسى جاسالادى؛
– وسى جىلى ماۋسىم ايىندا الماتى قالاسىنىڭ پەريناتولوگيا جانە بالالار كارديوحيرۋرگياسى ورتالىعىندا «فەتالدى حيرۋرگيا» پيلوتتىق جوباسى جۇزەگە استى. بۇل جوبا ەلىمىزدە العاش رەت قولعا الىنىپ وتىر.
مەكتەپتەردەگى ورىن تاپشىلىعىن ازايتۋ باعىتىندا جۇرگىزىلىپ جاتقان جۇمىستار جونىندە ايتتى:
– جىل سوڭىنا دەيىن جەرگىلىكتى بيۋدجەت ەسەبىنەن 3،7 مىڭ ورىندىق 8 نىسان پايدالانۋعا بەرىلەدى. سونىمەن قاتار 6،4 مىڭ ورىندىق 10 جەكەمەنشىك مەكتەپ اشىلادى.
پرەزيدەنت قاسىم-جومارت توقايەۆ وڭدەۋ ونەركاسىبىن دامىتۋعا، سونداي-اق الماتى ەكونوميكاسىن ءارتاراپتاندىرۋ اياسىندا شاعىن جانە ورتا بيزنەس ۇلەسىنىڭ ءوسۋى ەسەبىنەن كىرىستى ودان ءارى ارتتىرۋعا باسا نازار اۋدارۋدى تاپسىردى.