ءتيىستى جۇك تاسىمالى اعىنىن قالىپتاستىرۋ ءۇشىن كۇش جۇمىلدىرۋ ماڭىزدى
مەملەكەت باسشىسى قاسىم-جومارت توقايەۆ ماسكەۋدەگى جوعارى ەۋرازيالىق ەكونوميكالىق كەڭەس وتىرىسىنداعى سوزىندە ينتەگراسيالىق دامۋدىڭ تاعى ءبىر ماڭىزدى باعىتى جاڭا حالىقارالىق كولىك ارتەريالارىن قۇرۋ بولۋى مۇمكىن ەكەنىن ايتتى، دەپ حابارلايدى Zakon.kz.
"ءبىزدىڭ ەكونوميكالىق وداق، سايىپ كەلگەندە، ەۋروپا مەن ازيا، جاھاندىق وڭتۇستىك پەن سولتۇستىك اراسىنداعى بايلانىستىرۋشى بۋىنعا اينالاتىندىعىنا سەنىمدىمىن. ءبىز رەسەي فەدەراسياسىنىڭ قحر، ءۇندىستان، پاكىستان، يران، تاياۋ شىعىس جانە وڭتۇستىك-شىعىس ازيا مەملەكەتتەرى باعىتىندا دالىزدەردى قالىپتاستىرۋ جونىندەگى نيەتتەرىن قۇپتايمىز. ترانسكاسپيي باعىتىمەن ۇشتاستىرا وتىرىپ، سولتۇستىك – وڭتۇستىك كولىك ءدالىزىن دامىتۋ قاجەتتىلىگى تۋرالى وي-پايىم ابدەن-پىسىپ جەتىلدى دەپ سانايمىن"، - دەدى ق ر پرەزيدەنتى قاسىم-جومارت توقايەۆ.
مەملەكەت باسشىسى وسى رەتتە قازاقستان ءوزىنىڭ بارلىق مۇمكىندىكتەرى مەن رەسۋرستارىن جۇمىلدىرا وتىرىپ، ەاەو-نىڭ سەنىمدى لوگيستيكالىق حابى بولاتىنىن باسا اتاپ ءوتتى. سونداي-اق ول ۇلگىلى باستاما رەتىندە "چەليابينسك-بولاشاق-يران" تەمىرجول ماگيسترالى بويىنشا جۇردەك جۇك پويىزدارىن ىسكە قوسۋدى ۇسىناتىندىقتارىن جەتكىزدى.
"بۇل ءۇشىن چەليابينسكىدە جۇك جيناقتايتىن ورتالىق اشا وتىرىپ، "سولتۇستىك – وڭتۇستىك" كولىك ءدالىزىنىڭ قولدانىستاعى ينفراقۇرىلىمىن پايدالانۋعا بولادى. ءبىز ءوزىمىزدىڭ بەينەۋ – ماڭعىستاۋ تەمىر جول جەلىسىندەگى جانە بەينەۋ – شالقار اۆتوموبيل جولىنداعى تالاپقا ساي كەلمەيتىن ۋچاسكەلەردى قايتا سالۋعا ءازىرمىز. ءتيىستى جۇك تاسىمالى اعىنىن قالىپتاستىرۋ ءۇشىن كۇش جۇمىلدىرۋ ماڭىزدى. سول سەبەپتى قازاقستان مۇنى ءسوزسىز ىسكە اسىرادى"، - دەدى توقايەۆ.
پرەزيدەنتتىڭ ايتۋىنشا، باقتى – اياگوز تەمىر جولىنىڭ قۇرىلىسىن ءوزارا ءتيىمدى ىنتىماقتاستىعىمىزدىڭ ناقتى مىسالى دەۋگە بولادى. ونىڭ ىسكە قوسىلۋى قازاقستاننىڭ دا، رەسەيدىڭ دە جۇڭگو باعىتىنا جونەلتەتىن جۇك كولەمىن ايتارلىقتاي ارتتىرۋعا مۇمكىندىك بەرەدى.