توقايەۆ باس پروكۋروردى قابىلدادى

پرەزيدەنت شەتەلگە زاڭسىز شىعارىلعان اكتيۆتەردى ىزدەۋگە جانە قايتارۋ ءۇشىن زاماناۋي تەحنولوگيالاردى كەڭىنەن قولدانۋ ءىسىن جالعاستىرۋدى تاپسىردى.

پرەزيدەنت باس پروكۋرور بەرىك اسىلوۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ. 
بەرىك اسىلوۆ: 

ەلىمىزدەگى زاڭدىلىقتىڭ جاي-كۇيى جانە قاداعالاۋ قىزمەتىنىڭ باسىم باعىتتارى بويىنشا جۇرگىزىلگەن جۇمىستاردىڭ نەگىزگى قورىتىندىسى جونىندە باياندادى؛ 

ەلىمىزدەگى كريمينوگەندىك احۋال جانە قىلمىستىق-قۇقىقتىق سالادا ازاماتتاردىڭ كونستيتۋسيالىق قۇقىقتارىنىڭ ساقتالۋى جونىندە مالىمەت بەردى:

– پروكۋرورلار تەرگەۋ ورىندارى زاڭسىز قاماۋعا العان 449 ادامدى بوساتقان؛ 
– 515 ادامعا قاتىستى شىققان ۇكىمدى قايتا قاراۋ جونىندە باستاما كوتەرگەن. ونىڭ ىشىندە 205 سوتتالۋشىنىڭ جاعدايى جاقسارىپ، 10 ادام اقتالعان؛ اكتيۆتەردى قايتارۋ جانە قىلمىسكەرلەردى ىزدەستىرۋ جۇمىستارى بارىسىندا پروكۋراتۋرا ورگاندارىنىڭ جاساندى ينتەللەكتىنى پايدالانۋى جونىندە باياندادى: 
– باس پروكۋراتۋرادا ەلدەن زاڭسىز شىعارىلعان اكتيۆتەردى ىزدەۋ جانە ىزىنە ءتۇسۋ ءۇشىن قولدانىلاتىن «اقىلدى» اناليتيكالىق پلاتفورمانى پيلوتتىق رەجيمدە سىناپ كورۋ جۇمىستارى باستالعان؛ 
– قازىرگى تاڭدا قابىلدانعان شارالاردىڭ، سونىڭ ىشىندە اقپاراتتىق جۇيەلەردى پايدالانۋدىڭ ناتيجەسىندە ىزدەۋدە جۇرگەن 605 قىلمىسكەر ۇستالعان؛ بۇگىندە پروكۋرورلار جۇزەگە اسىرىلىپ جاتقان 663 ينۆەستيسيالىق جوباعا قۇقىقتىق كەڭەس بەرىپ وتىرعانىن ايتتى.

بيىل ەل ەكونوميكاسىنا 2،4 تريلليون تەڭگە كولەمىندە ينۆەستيسيا سالعان 148 ينۆەستوردىڭ تۇيتكىلدى ماسەلەسى شەشىلگەن. 

پرەزيدەنت شەتەلگە زاڭسىز شىعارىلعان اكتيۆتەردى ىزدەۋگە جانە قايتارۋ ءۇشىن زاماناۋي تەحنولوگيالاردى كەڭىنەن قولدانۋ ءىسىن جالعاستىرۋدى تاپسىردى. مەملەكەت باسشىسى قىلمىستىق پروسەستە ازاماتتاردىڭ كونستيتۋسيالىق قۇقىقتارىن قورعاۋدىڭ جانە ينۆەستورلار مەن بيزنەس-قوعامداستىقتىڭ قۇقىقتارىن پروكۋرورلىق قاداعالاۋ شارالارىمەن ءتيىمدى قامتاماسىز ەتۋدىڭ ماڭىزدى ەكەنىن اتاپ ءوتتى.