مەملەكەت باسشىسى قازاقستان حالقىن ناۋرىز مەرەكەسىمەن قۇتتىقتادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
الماتى قالاسىنا جۇمىس ساپارىمەن كەلگەن پرەزيدەنت «استانا» الاڭىندا ءوتىپ جاتقان مەرەكەلىك شاراعا ارنايى باردى.
قاسىم-جومارت توقايەۆ قازاقستان حالقىن ۇلىستىڭ ۇلى كۇنىمەن قۇتتىقتاپ، ناۋرىزدىڭ ەجەلدەن جاقسىلىق پەن جاسامپازدىقتى دارىپتەيتىن مەرەكە ەكەنىن اتاپ ءوتتى.
ءاز ناۋرىز – بەرەكە-بىرلىكتىڭ، شىنايى جاناشىرلىقتىڭ جانە ءوزارا قامقورلىقتىڭ مەيرامى. مەن بۇگىن ۇلىس كۇنىن وزدەرىڭىزبەن بىرگە قارسى الۋ ءۇشىن الماتى قالاسىنا ارنايى كەلدىم. الماتى – تاۋەلسىزدىگىمىزدىڭ التىن بەسىگى. حالقىمىزعا قايتا ورالعان ۇلىس تويىن مەرەكەلەۋ وسى قاستەرلى مەكەننەن باستالعان. الماتى – قازاق ەلىنىڭ رۋحاني، مادەني جانە ىسكەرلىك ورتالىعى، – دەدى مەملەكەت باسشىسى.
پرەزيدەنت زيالى قاۋىمنىڭ جانە ونەر، ءبىلىم، عىلىم، بيزنەس سالالارى وكىلدەرىنىڭ الماتى شاھارىندا شوعىرلانعانىنا توقتالىپ، قاڭتار وقيعاسى كەزىندە قالا تۇرعىندارىنىڭ زور قاۋىپ-قاتەرگە توتەپ بەرگەنىنە ەرەكشە ءمان بەردى.
سىن ساعاتتا تۇرعىندار ناعىز وتانشىلدىقتىڭ ۇلگىسىن كورسەتتى. ءبىز اۋىزبىرشىلىكتىڭ ارقاسىندا مەملەكەتىمىزدى ساقتاپ قالدىق. مەن شاھاردى قالپىنا كەلتىرۋ ءۇشىن قۇزىرلى ورگاندارعا ناقتى تاپسىرمالار بەردىم. الماتىنى وركەندەتۋ جانە جەرگىلىكتى جۇرتتىڭ تۇرمىس ساپاسىن جاقسارتۋ مەنىڭ ايىرىقشا نازارىمدا. ءقازىر ءبىزدىڭ الدىمىزدا زور مىندەتتەر مەن اۋقىمدى جۇمىستار تۇر. ونى جۇزەگە اسىرۋعا الماتىلىقتار بارىنشا اتسالىسادى دەپ سەنەمىن، – دەدى قاسىم-جومارت توقايەۆ.
مەملەكەت باسشىسى دامۋدىڭ جاڭا كەزەڭىنە قادام باسقانىمىزعا توقتالىپ، ءوزىنىڭ حالىققا جولداۋىندا ايتىلعان كولەمدى رەفورمالار ەلىمىزدى تۇبەگەيلى جاڭعىرتۋعا باعىتتالعانىن اتاپ ءوتتى.
پرەزيدەنت بۇگىنگى مەرەكەلىك كۇننىڭ جاڭا وزگەرىستەرگە باستاۋىنا، تۇعىرى مىعىم، بىرلىگى بەكەم ەلىمىزدىڭ جاساي بەرۋىنە تىلەكتەستىك ءبىلدىردى. قاسىم-جومارت توقايەۆ قۇتتىقتاۋ سوزىنەن كەيىن جينالعان جۇرتشىلىقپەن بىرگە مەرەكەلىك كونسەرتتى تاماشالادى.