مەملەكەت باسشىسى قاسىم-جومارت توقايەۆ مەكتەپ ءمۇعالىمى تاتيانا بەلوۋسوۆانى قۇتتىقتادى، - دەپ حابارلايدى aqshamnews.kz ءتىلشىسى.
پرەزيدەنت الماتى قالاسىنداعى №95 مەكتەپ-ليسەيى حيميا ءپانىنىڭ ءمۇعالىمى تاتيانا بەلوۋسوۆانى Global Teacher Prize حالىقارالىق بايقاۋىنىڭ قورىتىندىسى بويىنشا الەمدەگى ەڭ ۇزدىك 50 پەداگوگتىڭ قاتارىنا ەنۋىنە وراي قۇتتىقتادى.
"بۇل جوعارى باعا – ءسىزدىڭ وسكەلەڭ ۇرپاققا تاعىلىمدى تاربيە مەن وزىق ءبىلىم بەرۋ ىسىنە سىڭىرگەن ۇزاق جىلعى ەڭبەگىڭىزدىڭ جەمىسى. ءبىزدىڭ ماقساتىمىز – زياتكەر ۇلتقا اينالۋ. سوندىقتان مەملەكەت ءاردايىم مۇعالىمدەردىڭ مارتەبەسىن كوتەرىپ، ولاردى جان-جاقتى قولدايدى"، – دەدى قاسىم-جومارت توقايەۆ.
تاتيانا بەلوۋسوۆا تۋرالى نە بەلگىلى؟
الماتىداعى №95 مەكتەپ-ليسەيدىڭ حيميا ءپانى ءمۇعالىمى تاتيانا بەلوۋسوۆا Global Teacher Prize 2025-2026 حالىقارالىق بايقاۋىنىڭ قورىتىندىسى بويىنشا الەمنىڭ ەڭ ۇزدىك 50 پەداگوگىنىڭ قاتارىنا ەندى.
تاتيانا بەلوۋسوۆا - پەداگوگ-شەبەر، "قازاقستاننىڭ ۇزدىك ۇستازى – 2024" قۇرمەتتى اتاعىنىڭ يەگەرى. ونىڭ كانديداتۋراسى ساۋالناما مەن قوسىمشا ماتەريالداردى تاپسىرۋدان باستاپ، ساراپتامالىق باعالاۋ جانە فينالدىق ىرىكتەۋگە دەيىنگى كوپساتىلى كەزەڭنەن ءوتتى.
الەمنىڭ ەڭ ۇزدىك 50 ءمۇعالىمىنىڭ رەسمي ءتىزىمى 2025 جىلى 15 جەلتوقساندا Global Teacher Prize رەسمي سايتىندا جاريالاندى. فيناليستەردى ماراپاتتاۋ ءراسىمى 2026 جىلى 1-5 اقپان ارالىعىندا دۋبايدا حالىقارالىق ءبىلىم بەرۋ فورۋمى اياسىندا وتەدى.
ايتا كەتەيىك، قازاقستان Global Teacher Prize بايقاۋىنا بەسىنشى رەت قاتىسىپ وتىر. وسى ۋاقىتقا دەيىن ەل وكىلدەرى، بيىلعى ىرىكتەۋدى قوسقاندا، ءۇش مارتە الەمنىڭ ۇزدىك 50 پەداگوگىنىڭ قاتارىنا ەنگەن.