مەملەكەت باسشىسى قاسىم-جومارت توقايەۆ البانيا پرەزيدەنتى بايرام بەگايمەن اقوردادا وتكەن كەزدەسۋدە ەكى ەل استانالارى اراسىندا تىكەلەي رەيس اشۋدى ۇسىندى، دەپ حابارلايدى Almaty-akshamy.kz.
«قازاقستانعا قوش كەلدىڭىز! تۋريزم، ەنەرگەتيكا، كولىك سياقتى كەز كەلگەن سالاداعى قولدا بار مۇمكىندىكتەر تۋرالى ايتساق، بىزگە استانالارىمىزدىڭ اراسىندا تىكەلەي رەيستەردى ىسكە قوسۋ تۋرالى ويلانۋ كەرەك»، - دەدى پرەزيدەنت.
قاسىم-جومارت توقايەۆ قازاقستان البانيامەن بايلانىستى بارىنشا دامىتۋعا مۇددەلى ەكەنىن اتاپ ءوتتى.
«قازاقستان ارىپتەستىگىمىزدى دامىتۋعا بارىنشا مۇددەلى ەكەنىن تاعى قايتالاپ ايتقىم كەلەدى جانە ەلەۋلى ناتيجە الۋعا بارىنشا كۇش سالامىز. مەملەكەت باسشىسى رەتىندە ارامىزدا جەكە بايلانىس بار ەكەنىنە، تانىسقانىمىزعا وتە قۋانىشتى ەكەنىمدى تاعى دا بىلدىرگىم كەلەدى»، - دەدى مەملەكەت باسشىسى.