توپار كەنتىندە ءسىبىر جاراسىنىڭ وشاعى انىقتالدى، دەپ حابارلايدى almaty-akshamy.kz
توپار كەنتىندە ءسىبىر جاراسىنىڭ وشاعى انىقتالدى. جەكە اۋلادا قوجايىندارى 8 ايلىق بۇقانى سويۋعا ءماجبۇر بولعان. مال يەلەرىنىڭ ايتۋىنشا، مال اۋرۋ كۇيدە بولعان، ەتىن ساتۋدى جوسپارلاماعان. سول اۋلاداعى ءۇش ادامنان ءسىبىر جاراسى انىقتالدى، تاعى ەكى ادام دارىگەرلەر باقىلاۋىندا. سونداي-اق، ولارمەن بايلانىستا بولعان 30 ادام انىقتالىپ، ولارمەن پروفيلاكتيكالىق ءىس-شارالار تۋرالى تۇسىندىرمە اڭگىمە جۇرگىزىلىپ، مەديسينالىق باقىلاۋ ورناتىلدى.
ماجبۇرلىكتەن سويىلعان مالدىڭ ەتى تاركىلەنىپ، مورلەنىپ، ۆەتەريناريالىق زاڭناماعا سايكەس جويىلاتىن بولادى.كەنتتە ىندەتتى وقشاۋلاۋ جانە جويۋ ءۇشىن بارلىق قاجەتتى سانيتارلىق-ۆەتەرينارلىق ەپيزووتياعا جانە ەپيدەمياعا قارسى ءىس-شارالار جۇرگىزىلۋدە. بارلىق تەكسەرىلگەن وشاقتاردا دەزينفەكسيا جۇرگىزىلدى، ۆەتەريناريا ماماندارى ۇيلەردى ارالاپ، مالداردى كلينيكالىق تەكسەرۋ جانە تەرمومەتريامەن ءماجبۇرلى ەگۋ جۇمىستارىن جۇرگىزۋدە. اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتى ارقىلى ۆەتەريناريالىق پرەپاراتتاردىڭ رەسپۋبليكالىق قورىنان ۆاكسينالار مەن دەزينفەكسيالىق قۇرالدارمەن تولىق قامتاماسىز ەتتى.
كەنتكە اباي قالاسىنان كىرە بەرىستە كولىكتەردى سانيتارلىق وڭدەۋدەن وتكىزۋ ءۇشىن بەكەت ورناتىلدى. كارانتيندىك شارالاردى ساقتاۋ ءۇشىن جارتاس كەنتىنەن توپار كەنتىنە ەكىنشى كىرەبەرىس ۋاقىتشا جابىلدى.تۇرعىنداردىڭ قوزعالىسىنا شەكتەۋ قويىلعان جوق. سونداي-اق كەنتتەن مال اكەتۋگە جانە اكەلۋگە، ونى شارۋاشىلىقتار ىشىندە ساۋدالاۋعا، اۋرۋ مالدىڭ ءسۇتىن پايدالانۋعا، مال سويۋعا جانە سول اۋماقتان جەم مەن جەمشوپ قوسپالارىن پايدالانۋعا تىيىم سالىندى.
جاعداي ۋاكىلەتتى قىزمەتتەردىڭ تولىق باقىلاۋىندا. وقيعا ورنىندا سانيتارلىق-ەپيدەميولوگيالىق باقىلاۋ، دەنساۋلىق ساقتاۋ، ۆەتەريناريالىق باقىلاۋ كوميتەتىنىڭ اۋماقتىق ينسپەكسياسى مەن ۆەتەريناريا باسقارماسىنىڭ، رەسپۋبليكالىق ەپيزووتياعا قارسى توپتىڭ ءبىر توپ قىزمەتكەرلەرى جۇمىس ىستەۋدە.