كۇزدىڭ سوڭعى ايى بولسا دا، كۇننىڭ سۋىقتىعى قىستىڭ ىزعارىنان كەم تۇسەر ەمەس. ەلىمىزدىڭ ءبىراز وڭىرىندە قار جاۋدى، كۇن سۋىتتى. كوشەدە قىدىرىپ جۇرەتىن كۇن جوق، دەگەنمەن جىلى ۇيدە وتىرىپ تا بويى جىلىمايتىن ادامدار بولادى. ولاردىڭ ەلدەن ەرەكشە توڭعاق بولۋىنا نە سەبەپ؟
توڭعاقتىقتىڭ سەبەبىن ادام اعزاسىنىڭ ەرەكشەلىگىنەن ىزدەۋدىڭ كەرەگى جوق. ول كەيدە دەنساۋلىققا قاتىستى ماسەلەدەن تۋىنداسا، كەيدە ءومىر سالتىنا دا بايلانىستى بولادى. سونىمەن ۇنەمى توڭىپ جۇرۋگە ءسىزدىڭ قانداي ادەتتەرىڭىز سەبەپ بولۋى مۇمكىن؟
1. ءسىز قاتاڭ ديەتا ۇستاناسىز
ۇنەمى. نەمەسە ۋاقىتشا. ەگەر ەكىنشىسى بولسا - ديەتادان شىققان كەزدە، اعزا وزىنە قاجەت دەڭگەيدە قايتادان قىزا باستايدى. ديەتا كەزىندە ءسىزدىڭ اعزاڭىز مايدىڭ تومەن پايىزىن ۇستاپ تۇرۋ جانە سىزگە ءومىر ءسۇرۋ ءۇشىن قۋات بەرۋ ءۇشىن زات الماسۋ پروسەسىن باياۋلاتادى. وسىنىڭ كەسىرىنەن توڭىپ جۇرەسىز.
2. مايدى از جەيسىز
ءبىرىنشى جانە ەكىنشى ادەتتەر بىر-بىرىنە سايكەس كەلۋى مۇمكىن. تابيعات ءبىز ءۇشىن ءبارىن ويلاستىرىپ قويعان - سۋىق مەزگىلدە مايلى نارسە جەگىمىز كەلۋى بەكەر ەمەس. ماي دەنەنى قىزدىرىپ تۇرادى. ءبىراق، مايلى ەكەن دەپ ءتاتتى بالىشتەرگە جۇگىرۋدىڭ قاجەتى جوق، پايدالى مايلاردى - جاڭعاقتار، بالىق، اۆوكادو، ءزايتۇن مايىن تۇتىنعان ءجون.
3. قيمىل-قوزعالىسىڭىز از
قاراپايىم تىلمەن ايتقاندا، ءسىز كوپ وتىراسىز (نەمەسە جاتا بەرەسىز). دەنە قيمىلىنىڭ ازدىعى قان تامىرلارعا عانا تەرىس اسەر ەتىپ قويماي، زات الماسۋدى دا باياۋلاتادى. سوندىقتان تىم بولماسا جاتتىعۋ جاساۋدى باستاڭىز.
4. از ۇيىقتايسىز
ۇيقىنىڭ ساپالى بولۋى وتە ماڭىزدى. ەگەر ۇيقىڭىز جەتكىلىكسىز بولسا، گيپوتالامۋسقا (ميدىڭ ەندوكريندىك جۇيەنىڭ جۇمىسىن باقىلايتىن بولشەگى) كوپ كۇش تۇسەدى جانە ول ءسىزدىڭ دەنە قىزۋىڭىزدى رەتتەۋگە جاۋاپتى بولعاندىقتان، ءسىز ىلعي توڭىپ جۇرەسىز.
5. اقۋىزدى از تۇتىناسىز
اقۋىز ادام اعزاسىنداعى تەرموگەنەزدى (اعزادان جىلۋدىڭ ءبولىنۋى) جۇزەگە اسىرۋعا كومەكتەسەدى - ول تاعامدى قورىتۋ كەزىندە پايدا بولاتىندىقتان دەنەنىڭ قىزۋى جوعارىلايدى. نەعۇرلىم كوپ اقۋىز جەسەڭىز، تەرموگەنەز سوعۇرلىم ۇزاعىراق بولادى. سوندىقتان ءار تاعامعا اقۋىز قوسۋعا تىرىسىڭىز.
6. تەمىرى بار تاعامداردى از جەيسىز
تەمىردىڭ قان جاسۋشالارىنا وتتەگىن اعزاعا تاسىمالداۋعا كومەكتەسەتىنىن جانە قورەكتىك زاتتارمەن بىرگە اياق-قولعا جىلۋ بەرەتىنىن بىلەسىز بە؟ قول-اياعىڭىز ۇنەمى جىلىماي ما؟ مۇنىڭ سەبەبى تەمىردىڭ جەتىسپەۋشىلىگى بولۋى مۇمكىن. قاراقۇمىق، باۋىر، شپينات، بروككولي، قىزىلشا جەڭىز. ال تەمىر جەتىسپەۋشىلىگىنەن زارداپ شەكسەڭىز (ونى قان تالداۋى ارقىلى بىلۋگە بولادى)، قۇرامىندا تەمىرى بار دارى-دارمەكتەرمەن ەمدەلۋگە تۋرا كەلەدى.
7. سۋدى دا از ىشەتىن بولۋىڭىز مۇمكىن
ادام اعزاسىندا سۇيىقتىقتىڭ جەتكىلىكتى مولشەردە بولۋى زات الماسۋ جىلدامدىعىنا اسەر ەتىپ، دەنەدەگى جىلۋدى ساقتاپ تۇرادى.
8. كوفەنى كوپ ىشەتىن بولارسىز؟
كۇندەلىكتى ىشەتىن كوفەڭىزدىڭ سانى شەكتەۋلى بولۋى كەرەك (كوپ دەگەندە 2-3 شىنىاياق)، ويتكەنى كوفەيننىڭ كوپ مولشەرى قان تامىرلارىنىڭ تارىلۋىنا اكەلەدى، وسىنىڭ اسەرىنەن بويىڭىز جىلي المايدى. الكوگول تۇتىنۋدىڭ دا ناتيجەسى وسىنداي.
9. ۆ12 دارۋمەنى بار تاعامداردى جەمەيسىز
بۇل دارۋمەن قالىپتى دەنە قىزۋىن ساقتاۋعا كومەكتەسەتىن ەريتروسيتتەردىڭ (قاننىڭ قىزىل تۇيىرشىكتەرى) تۇزىلۋىنە سەبەپشى بولادى. تيىسىنشە، وسى دارۋمەننىڭ جەتىسپەۋشىلىگىنەن ەريتروسيتتەر دە از بولادى. تاماقتانۋىڭىزعا ەت، تاۋىق، بالىق، جۇمىرتقا جانە ءسۇت ونىمدەرىن قوسىڭىز.
ەندى بۇل ادەتتەردەن باسقا توڭعاقتىققا تاعى نە اسەر ەتەتىنىن ايتايىق.
قان قىسىمىنىڭ تومەن بولۋى
گيپوتونيا (قان قىسىمىنىڭ تومەن بولۋى) تۇقىم قۋالاۋى نەمەسە تۋا بىتكەن بولۋى، كەيدە جۇرە پايدا بولۋى مۇمكىن. قان قىسىمىنىڭ تومەن بولۋىنا بايلانىستى قان اينالىمى ناشارلايدى جانە سونىمەن بىرگە تەرمورەگۋلياسيا (اعزانىڭ جىلۋدى ساقتاۋ قابىلەتى) دا ناشارلايدى. جالپى جۇرەك-قان تامىرلارى اۋرۋلارى توڭعاقتىققا سەبەپ بولۋى مۇمكىن - كەز كەلگەن جاعدايدا دارىگەردىڭ كەڭەسى قاجەت.
قالقانشا بەزىنىڭ بۇزىلۋى
توڭعاقتىقتىڭ تاعى ءبىر سەبەبى وسى بولۋى مۇمكىن، ويتكەنى گيپوتيرەوز - گورموننىڭ جەتكىلىكتى بولىنبەۋى. مۇنداي جاعدايدا زات الماسۋ پروسەسى باياۋلايدى. اۋرۋ سيمپتومسىز دا باستالىپ كەتۋى مۇمكىن، سوندىقتان باسقا ەندوكرينولوگ دارىگەرگە كورىنىپ قويعان دۇرىس.
ۆەگەتوتامىرلىق ديستونيا
بۇل رەسمي تۇردە تىركەلگەن اۋرۋ ەمەس، شارشاۋ، السىزدىك، باس اينالۋ، باس اۋرۋى، ۇيقىسىزدىق جانە سۋىق تيۋ سياقتى سيمپتومداردىڭ جيىنتىعى.
بۇيرەك اۋرۋى
بۇيرەك جۇمىسىنداعى بۇزىلىستار كەسىرەنەن دەنە ىسىنەدى، بۇل قان تامىرلارىنىڭ قىسىلۋىنا اكەلىپ سوقتىرادى. ءبىرىنشى بولىپ، ادەتتە، اياق-قول مۇزدايتىن بولادى.