ەلىمىزدە قولما-قول جانە ءبولىپ تولەيتىندەر ءۇشىن ەكى ءتۇرلى باعا ەنگىزىلمەك، دەپ حابارلايدى aqshamnews.kz
قارجى نارىعىن رەتتەۋ اگەنتتىگىنىڭ ءتورايىمى ءمادينا ءابىلقاسىموۆا تاۋارلاردى قولما-قول جانە ءبولىپ تولەپ ساتىپ الاتىندار ءۇشىن ەكى ءتۇرلى باعا كورسەتۋ باستاماسىن قولدادى.
ءابىلقاسىموۆانىڭ سوزىنشە، ءبولىپ تولەۋ — بۇل بانك ارقىلى راسىمدەلەتىن نەسيەنىڭ ءبىر ءتۇرى. سوندىقتان ساتىپ الۋشى قانشا ارتىق تولەيتىنىن ناقتى ءبىلۋى كەرەك. بۇل باعانى سالىستىرىپ، سانالى شەشىم قابىلداۋعا مۇمكىندىك بەرەدى دەيدى.
«ەگەر تاۋاردى قولما-قول اقشاعا السا — ءبىر باعا، ال ءبولىپ تولەۋمەن السا — قانشا قوسىمشا ۇستەمە اقى قوسىلاتىنى ناقتى كورسەتىلۋى كەرەك. ءدال نەسيە العانداعى سياقتى. پايىزى مەن جالپى ارتىق تولەم مولشەرىن ءبىلۋ قاجەت»، - دەدى.
اگەنتتىك مۇددەلى مەملەكەتتىك ورگاندارمەن بىرلەسىپ، تۇتىنۋشىلاردى اقپاراتتاندىرۋ جانە جاسىرىن ۇستەمە باعالاردى بولدىرماۋ ءۇشىن ديففەرەنسيالدى باعا جۇيەسىن ەنگىزۋ باعىتىندا جۇمىستى جالعاستىرماقشى. وسىعان قاتىستى زاڭعا وزگەرىس ەنگىزۋ ماسەلەسى جىل سوڭىندا شەشىلمەك.