سوڭعى ونجىلدىقتاردا ءومىر ايتارلىقتاي وزگەردى. جاڭا زامان – جاڭا تالاپتار مەن ۇعىمداردى قوسا اكەلدى. بۇرىن بولماعان تۇسىنىكتەر، تەرميندەر، سوزدەر تىلىمىزگە دەندەپ ەندى.
بۇگىندە جۇمىسقا ورنالاسۋ بارىسىندا نەمەسە كەز كەلگەن ۇجىمدا «رەزيۋمە»، «مەنەدجەر»، «تيمبيلدينگ»، «كورپوراتيۆتى مادەنيەت» سەكىلدى ۇعىمدارمەن ءجيى ۇشىراسامىز. بۇل سوزدەر تەك تىلدىك قورىمىزعا عانا ەمەس، ويلاۋ جۇيەمىزگە دە اسەر ەتە باستادى. الايدا ماسەلە – جاڭا سوزدەردى ۇيرەنىپ الۋدا ەمەس. ماسەلە – سول ۇعىمداردىڭ ارتىنداعى قوعامدىق جانە پسيحولوگيالىق شىندىقتى تۇسىنۋدە.
قازىرگى ادامنىڭ كۇندەلىكتى ءومىرى بۇرىنعىعا قاراعاندا الدەقايدا كۇردەلى. اقپارات اعىنى ۇزدىكسىز، باسەكەلەستىك جوعارى، تۇراقتىلىق سيرەك. مۇندايدا ادام تەك مامان رەتىندە ەمەس، جەكە تۇلعا رەتىندە دە دايىن بولۋى ءتيىس. جۇمىسقا تۇرۋ، ۇجىمعا ءسىڭۋ، ءوز ورنىڭدى تابۋ – ءبارى تەك بىلىكتىلىكپەن عانا ەمەس، پسيحولوگيالىق يكەممەن دە ولشەنەدى. وسىعان بايلانىستى، ءقازىر كىتاپ دۇكەندەرىندە «پسيحولوگيا» ايدارىمەن جارىق كورىپ جاتقان ادەبيەتتەر سانى كۇرت ءوستى. سورەلەردە جۇمىس تابۋ جولىنان باستاپ، تابىسقا جەتۋدىڭ، جۇرتپەن قارىم-قاتىناس جاساۋدىڭ، ءوز-وزىڭدى دامىتۋ مەن موتيۆاسيا الۋدىڭ سان الۋان تاسىلدەرىن ۇيرەتەتىن كىتاپتار سامساپ تۇر. ولاردىڭ تاقىرىبى دا، باعىتى دا ءارتۇرلى: «قالاي تەز بايۋعا بولادى؟»، «ماحابباتتا جەڭىسكە جەتۋدىڭ 5 قۇپياسى»، «ايەلدىڭ جۇرەگىن قالاي جاۋلاپ العان ءجون؟»، «تابىستى ەركەكتى ۋىسقا ءتۇسىرۋدىڭ تاسىلدەرى»،
«جەتىستىككە جەتۋدىڭ پسيحولوگياسى» دەگەن سياقتى ءتۇرلى «نۇسقاۋلىقتار» جەتىپ-ارتىلادى.
ءبىر قاراعاندا كوممەرسيالىق ءۇردىس سياقتى كورىنگەنىمەن، مۇنىڭ استارىندا تەرەڭ قوعامدىق احۋال جاتىر: بۇل – جۇيكەسى جۇقارعان، رۋحى قاجىعان، تورىعىپ، تارىعىپ جۇرگەن جانداردىڭ رۋحاني سۇيەنىش ىزدەۋى. قوعام قانشا دامىعانىمەن، بۇگىندە ادام ءوزىن جالعىز، ءالسىز سەزىنەتىن جاعداي كوبەيگەن. سودان دا بولار، پسيحولوگيا – كوپشىلىك ءۇشىن قارمانار تالعا، ىشكى كۇيزەلىستەن قورعان بولار تىرەككە اينالدى.
جالپى، پسيحولوگيا – ادام جانىن تانۋعا باعىتتالاتىن عىلىم دەسەك، وقىرماننىڭ بۇل باعىتتاعى ادەبيەتتەرگە قىزىعۋشىلىعى بۇگىنگى ۋاقىت تىنىسىنا وراي عانا ارتىپ وتىرعان جوق. ءوزىن-وزى تانىپ بىلۋگە، سونداي-اق وزگەنى تۇسىنۋگە ۇمتىلۋ – ەجەلدەن-اق ءار ادامعا ءتان قاسيەت. تەك وسى تۇرعىدان كەلگەندە، قاي ۇستانىمدى باسشىلىققا الاسىڭ، كىمنىڭ كەڭەسىنە جۇگىنەسىڭ، ماسەلە سوندا. ايتالىق، پسيحولوگيا سالاسىنا ارنايى مامانداناتىن ستۋدەنتتەردىڭ عانا كادەسىنە جارايتىنى بولماسا، قازىرگى تاڭدا جالپى كوپشىلىكتىڭ ق.جارىقبايەۆ، ءا.الدامۇراتوۆ، و.وزعانبايەۆ ەڭبەكتەرىنە قاناعاتتانا قويۋى ەكىتالاي. وقۋ قۇرالى ەسەبىندە ەكەنى ءوز الدىنا، ەرتەرەكتە شىققان پسيحولوگيالىق ادەبيەتتەردىڭ دەنى – اۋدارما. ءتىلى دە، تاقىرىپتىق جۇيەلەنۋى دە ءتۇپنۇسقاسىنان الشاق كەتە قويماعان، ۇلتتىق ساناعا، ويعا قونىمسىزداۋ دۇنيەلەر بولىپ كەلەدى.
پسيحولوگ قىزمەتىنىڭ اۋاداي قاجەت ەكەنىن ءقازىر ءومىردىڭ ءوزى كورسەتىپ وتىر. ويتكەنى جاڭارعان جۇيەگە كىرىگە الۋ، وزگەرگەن قۇندىلىقتاردى قايتا سالماقتاۋ، ورتاعا، ۋاقىتقا بەيىمدەلۋ ەكىنىڭ بىرىنە وڭايعا سوقپايدى. ونىڭ بەر جاعىندا جانۇياداعى قارىم-قاتىناس پەن بالا تاربيەسىنە قاتىستى قانشاما تۇيتكىلدەر بار! ايتسە دە ەلىمىزدە اتالمىش عىلىمنىڭ كەنجەلەپ وتىرعانىن بىلاي قويعاندا، پسيحولوگتىڭ كەڭەسىنە جۇگىنۋ دەگەن – حالقىمىزدىڭ سالتىنا دا، ساناسىنا دا ءالى سىڭىسە قويماعان نارسە. سول سەبەپتى، الدەبىر شەشىم قابىلداۋعا تۋرا كەلگەندە نەمەسە ءوزىن مازالاعان جايتتاردىڭ اق-قاراسىن اجىراتۋعا تىرىسقاندا قاراپايىم قازاق ماماننان كەڭەس العاننان گورى، كەرەكتى كىتاپتى دۇكەننەن الىپ وقىپ، وزىنشە وي قورىتقاندى ارتىق كورەدى. ال پسيحولوگيالىق ادەبيەتتەر ىرگەلەس ورىستى بىلاي قويىپ، بىزگە ەندى تىكەلەي باتىستان اۋىسا باستادى. الۋان ءتۇرلى تەستەر مەن ترەنينگتەر تامىر جايىپ تا ۇلگەردى. ءبىراق باتىس جۇرتىنىڭ مەنتاليتەتى مەن ءبىزدىڭ تابيعاتىمىز ەكى بولەك.
وكىنىشكە قاراي، بوگدە ادەبيەتتەردى بەتكە ۇستاعان پسيحولوگتەردىڭ كەيبىرى ءوزىنىڭ ءتىپتى قازاققا مۇلدە جات جات نارسە ايتاتىنىن سەزىنبەيدى دە. ال ادامنىڭ جاندۇنيەسىن زەرتتەيتىن پسيحولوگيا عىلىمىنىڭ ءاربىر تۇجىرىمى ايدالادان الىنباي، اركىمنىڭ جۇرەگىنە، كوڭىلىنە قوناتىنداي بولعانىنا نە جەتسىن! ءار نارسەگە ءوز كوزقاراسىمىز تۇرعىسىنان كەلىپ، ءتىپتى بولماعان جاعدايدا باتىستىق شيكىزاتتى ءوز جاعدايىمىزعا بەيىمدەي وتىرىپ پايدالانساق، ۇتىلماسىمىز انىق.
پسيحولوگيا – ەندى تەك عىلىم نە ماماندىق سالاسى عانا ەمەس. ول – قوعامنىڭ جان ايناسى، ادامنىڭ ىشكى كۇيى مەن سۇرانىسىنىڭ كورىنىسى. بىزگە ءقازىر ۇلتتىق دۇنيەتانىمى كەڭ، قازاقتىڭ جانىنا تەرەڭ بويلاي الاتىن، قازاقشا جان-جاقتى ويلاي الاتىن پسيحولوگ ماماندار اۋاداي قاجەت. وسىنداي جاعدايدا جۇسىپبەك ايماۋىتوۆتى ەرىكسىز ەسكە الاسىڭ. الاشتىڭ ايتۋلى ارىسى سوناۋ حح عاسىردىڭ باسىندا-اق «پسيحولوگيا» دەگەن ەڭبەك جازىپ، ۇلتىنىڭ جاندۇنيەسىن تانۋعا تالپىنعانىنىڭ ءوزى-اق تالاي جايتتى اڭعارتىپ تۇرعان جوق پا؟!