تولە بي كوشەسىن باتىس باعىتتا ۇزارتۋ جۇمىسىنىڭ ءبىرىنشى ۋچاسكەسى ياسساۋي كوشەسىنەن باستالىپ، ءاشىموۆ كوشەسىنە دەيىنگى ارالىقتى قامتيدى. 22 جەر تەلىمى ساتىپ الىندى، دەپ حابارلايدى اlmaty-akshamy.kz.
قالالىق اكىمدىكتىڭ باسپا ءسوز قىزمەتى، جوبانىڭ مەملەكەتتىك ساراپتامادان وتكەنىن ءمالىم ەتتى.
«بيۋدجەت قارجىسىنا جەر تەلىمدەرى ساتىپ الىندى. ءقازىر تولە بي كوشەسىن باتىس باعىتتا ۇزارتۋ جۇمىسى باستالىپ كەتتى. ءبىرىنشى ۋچاسكەسى ياسساۋي كوشەسىنەن باستالىپ، ءاشىموۆ كوشەسىنە دەيىنگى ارالىقتى قامتىماق. جوبانى 2023 جىلدىڭ جەلتوقسان ايىندا اياقتاۋ جوسپارلانىپ وتىر. قازىرگى ۋاقىتتا 270 جەر تەلىمىنىڭ 22 ۋچاسكەسى ساتىپ الىندى»، - دەپ جاۋاپ بەردى اكىمدىك قازاقپارات اگەنتتىگى جولداعان ساۋالعا.
2020 جىلى الماتى موبيلدىلىك باسقارماسىنىڭ تاپسىرىسىمەن قۇرىلىستىڭ جوبا-سمەتالىق قۇجاتتاماسى ازىرلەندى. ول تۇرعىنداردىڭ نازارىنا ۇسىنىلىپ، قوعامدىق تىڭداۋدان ءوتتى.
تولە بي كوشەسى جالپى 4،5 شاقىرىمعا ۇزارادى. جوبا ەكى ۋچاسكەگە بولىنگەن: ءبىرىنشى ۋچاسكە ياسساۋي كوشەسىنەن ءاشىموۆ كوشەسىنە دەيىن، ۇزىندىعى 2،2 شاقىرىم، ەكىنشى ۋچاسكەسى ءاشىموۆ كوشەسىنەن باستالىپ، قالانىڭ شەكاراسىنا دەيىن سوزىلادى. بۇل اۋماقتا ۇزىندىعى 2،3 شاقىرىم جول جاسالماق.
سونداي-اق اكىمدىك تاراتقان مالىمەتكە سايكەس، بيىل مامىر ايىنىڭ سوڭىنا دەيىن اۋەزوۆ كوشەسىن گوگول كوشەسىنەن رايىمبەك داڭعىلىنا دەيىنگى ۇزارتۋ جۇمىستارى اياقتالادى. ونىڭ ۇزىندىعى 0،8 كم، ەنى ءتورت جولاق بولماق.
سونىمەن قاتار، بيىل ن.تىلەندييەۆ كوشەسى مەن سولتۇستىك اينالما جولى سولتۇستىك باعىتتا ۇلكەن الماتى اينالما اۆتوموبيل جولىنا دەيىن ۇزارتىلادى.
جالپى 2030 جىلعا دەيىن الماتىدا 38 كوشە ۇزاراتىلادى.
ساراپشىلار جاڭا كوشەلەردى ەكى كەزەڭدە سالۋدى ۇسىنىپ وتىر. كوشەلەردىڭ ءبىر بولىگىن - 2025 جىلعا دەيىن، ال ەكىنشىسىن - 2030 جىلعا دەيىن.