ەل تاريحىندا پاراليمپياداعا ەڭ كوپ سپورتشى قاتىسادى
بۇگىن توكيودا XVI پاراليمپيادا ويىندارى باستالدى، دەپ حابارلايدى Almaty-akshamy.kz.
24 تامىز-5 قىركۇيەك ارالىعىندا وتەتىن پاراليمپياداعا ەلىمىزدىڭ اتىنان 7 سپورت تۇرىنەن 25 پارا سپورتشى قاتىسادى.
جاپونيانىڭ ۇلتتىق ستاديونىندا وتەتىن سالتاناتتى اشىلۋ راسىمىندە ەلىمىزدىڭ تۋىن تاەكۆوندودان ەكى دۇركىن الەم چەمپيونى، ءۇش دۇركىن ازيا چەمپيونى، ەۋروپا چەمپيوناتىنىڭ ءۇش دۇركىن جەڭىمپازى نۇرلان دومبايەۆ پەن پاۋەرليفتينگتەن ريو پاراليمپياداسىنىڭ كۇمىس جۇلدەگەرى راۋشان قويشىبايەۆا ۇستايدى.
اتالعان جولدامالاردىڭ جەتەۋى – سۋدا جۇزۋدەن، التاۋى – دزيۋدودان، بەسەۋى – پاۋەرليفتينگتەن، ۇشەۋى – تاەكۆوندودان، ەكەۋى – جەڭىل اتلەتيكادان. سونىمەن قاتار وتاندىق سپورتشىلار العاش رەت كانوەدە ەسكەك ەسۋ مەن وق اتۋدان جولداما يەلەندى.
بيىل قازاقستان تاۋەلسىز ەل رەتىندە التىنشى رەت پاراليمپياداعا قاتىسادى. وسىعان دەيىنگى كورسەتكىشتەر تومەندەگىدەي:
قازاقستان اتىنان 1996 جىلى اتلانتاداعى پاراليمپياداعا – 12، 2000 جىلى سيدنەيگە – 2، افيناعا – 8، بەيجىڭگە – 3، لوندونعا – 7، ريو-دە-جانەيروعا – 10 سپورتشى بارعان. قازاقستاندىق اتلەتتەر ريوداعى پاراليمپيادا العاش رەت جۇلدە الدى. برازيليا تورىندە زۋلفيا گابيدۋلينا چەمپيون اتانسا، راۋشان قويشىبايەۆا كۇمىس جۇلدەگە يە بولدى.
پاراليمپيادا باسەكەلەرىن توكيودا XXXII جازعى وليمپيادا جارىستارى وتكەن ءدال سول سپورت نىساندارى قابىلدايدى. جالپى توكيوداعى پاراليمپيادادا 136 مەملەكەتتەن 4400-گە جۋىق سپورتشى 22 سپورت تۇرىنەن سىنعا تۇسەدى.
بيىلعى ءتورت جىلدىقتىڭ باستى دوداسىنا بادمينتون مەن تاەكۆوندو سپورتى جاڭادان قوسىلدى. ەلىمىزدىڭ اتىنان 3 تاەكۆوندوشى جۇلدە ءۇشىن تالاسسا، بادمينتوننان سپورتشى اپارمايمىز. بۇل ەكى سپورت ءتۇرى كەيىنگى جىلدارى كەنجەلەپ قالعان جەلكەندى كەمە جارىسى مەن شاعىن فۋتبولدى اۋىستىرادى.