جاقىندا انشىلەردىڭ فونوگرامما قولدانۋىنا قاتىستى جاڭا تالاپتار تالقىلانىپ، قوعامدا "انشىلەر ەندى مۇلدە فونوگرامماعا سۇيەنە المايدى" دەگەن سىڭايداعى الىپ-قاشپا اڭگىمەلەر ءبىراز ايتىلدى. فونوگرامماعا تىيىم سالۋ كەرەكتىگىن دەپۋتاتتار جىل باسىنان بەرى كوتەرىپ كەلدى. ءماجىلىس فونوگراممامەن ءان ايتۋدى "تىياتىن" زاڭ جوباسىن قىركۇيەكتە ەكىنشى وقىلىمدا قابىلداعان ەدى. ال قاراشانىڭ باسىندا سەنات ءتيىستى قۇجاتتى جەتىلدىرىپ، ماجىلىسكە قايتاردى. ق ر مادەنيەت جانە اقپارات ءمينيسترىنىڭ ورىنباسارى ايبەك سىدىقوۆتىڭ تۇسىندىرۋىنشە:
"وسى كۇنگە دەيىن قولدانىستاعى زاڭناماعا سايكەس فونوگرامماعا تىيىم سالىنبادى. الايدا فونوگراممانى پايدالانعان جاعدايدا الدىن الا حابارلاۋ كەرەك دەگەن نورما بولعان. قازىرگى تاڭدا مادەني بۇقارالىق ءىس-شارالاردى وتكىزگەن جاعدايدا داۋىستىق-ۆوكالدىق فونوگرامماعا تىيىم سالىنۋ كوزدەلىپ وتىر".
بىرنەشە تۇزەتۋلەردەن كەيىن اقىرى ءماجىلىس داۋىس فونوگرامماسىن پايدالانعانى ءۇشىن ايىپپۇل كولەمىن بەكىتىپ، الداعى ۋاقىتتا 200 ادامنان كوپ جينالاتىن ءىس-شارالاردا فونوگرامماعا تولىق تىيىم سالىناتىنىن ايتتى. Aqshamnews.kz ءتىلشىسى وسى ماسەلەگە بايلانىستى مادەنيەت جانە اقپارات مينيسترلىگىنە رەسمي ساۋال جولداپ، ناقتى تۇسىندىرمە الدى.
ۆەدومستۆو تۇسىندىرگەندەي، جاڭا نورما تەك داۋىس (ۆوكال) فونوگرامماسىن پايدالانۋعا قاتىستى. ياعني، 200 ادامنان كوپ كورەرمەن جينالعان مادەني-بۇقارالىق ءىس-شارالاردا ءانشىنىڭ الدىن الا جازىلعان ۆوكالمەن ونەر كورسەتۋىنە تىيىم سالىنادى.
بۇل - ءانشىنىڭ مۋزىكالىق سۇيەمەلدەۋدى ەمەس، ءدال ءوزىنىڭ داۋىسىن جازىپ الىپ، سونى ساحنادا پايدالانۋىنا شەكتەۋ قويىلاتىندىعىن بىلدىرەدى.
"سوندا قانداي جاعدايدا فونوگرامماعا رۇقسات ەتىلەدى؟" دەگەن ناقتىلاۋ ساۋالىمىزعا مينيسترلىك بىرنەشە ەرەكشەلىكتى اتاپ كورسەتتى:
1. ارنايى تەحنيكالىق جابدىقتالماعان اشىق الاڭداردا فونورامما قولدانۋعا رۇقسات. ولار
- يپپودرومدار؛
- ساياباقتار؛
- دەمالىس ايماقتارى؛
- سكۆەرلەر؛
- الاڭدار؛
- كوشەلەر.
مۇنداي ورىنداردا ساپالى "جاندى" داۋىستى قامتاماسىز ەتۋ قيىن بولعاندىقتان، فونوگراممانى پايدالانۋ زاڭدى بولىپ قالا بەرەدى.
2. تەليەۆيزيالىق كونتەنت ءتۇسىرۋ كەزىندە دە فونوگرامماعا رۇقسات ەتىلەتىن جاعدايلار بار:
- كونسەرتتەردىڭ تەلەجازبالارى
- تەلەباعدارلامالار ءتۇسىرىلىمى
- جوبا جاساۋ كەزىندە
ياعني، دىبىستىڭ ساپالى جازىلۋىنا باعىتتالعان كاسىبي ستۋديالىق تۇسىرىلىمدەرگە تىيىم سالىنبايدى.
3. مەيرامحانالار، كافەلەر، كلۋبتار جانە تويلار
زاڭ نورماسى جەكە كاسىپكەرلىككە ارالاسۋعا تىيىم سالاتىن كاسىپكەرلىك كودەكسىنە بايلانىستى:
- مەيرامحانالار
- تۇنگى كلۋبتار
- مۋزىكالىق كافەلەر
- پابتار، بارلار
- تويلار مەن وتباسىلىق شارالار بۇل تالاپتان بوساتىلادى.
ياعني، مەرەكەلىك، توي-دۋمان فورماتىنداعى شارالاردا فونوگرامما قولدانۋعا رۇقسات.
4. ويىن-ساۋىق ورتالىقتارىنداعى ارتىستەر
ويىن-ساۋىققا باعىتتالعان ورىندار مۋزىكالىق-ەستەتيكالىق ماقساتقا جاتپايتىندىقتان، مۇنداعى ارتىستەرگە دە شەكتەۋ قويىلمايدى.
فونوگرامما قولدانۋعا تولىق تىيىم سالىناتىن جاعدايلار
- 200 ادامنان كوپ كورەرمەن جينالعان كاسىبي كونسەرتتەر
- تەاتر-كونسەرت ۇيىمدارىنىڭ رەسمي مادەني ءىس-شارالارى
- وتاندىق جانە شەتەلدىك ەسترادا ارتىستەرىنىڭ كوممەرسيالىق كونسەرتتەرى
بۇل تالاپ بۇزىلعان جاعدايدا، 1000 اەك مولشەرىندە(3 ملن 700 مىڭ تەڭگە) ايىپپۇل تولەۋ قاراستىرىلعان.
ال ايىپپۇلدى وتەۋ يۆەنت-ۇيىمدارعا، جەكە كاسىپكەرلەرگە (ونەر كورسەتۋدى ۇيىمداستىرۋشىلار)، ورىنداۋشىلارعا، شىعارماشىلىق ۇجىمدارعا قولدانىلماق.
مينيسترلىك بۇل شارا ەلدەگى كونسەرتتەردىڭ ساپاسىن ارتتىرۋعا، ورىنداۋشىلاردىڭ كاسىبي شەبەرلىگىن كوتەرۋگە جانە كورەرمەنمەن اشىق ءارى ءادىل قارىم-قاتىناس ورناتۋعا باعىتتالعانىن اتاپ ءوتتى.
باقىلاۋدى كىم جۇرگىزەدى؟
ۆەدومستۆو وكىلىنىڭ جاۋابىنا قاراعاندا:
"زاڭ نورمالارىنىڭ ورىندالۋىنا باقىلاۋ جۇرگىزۋ تەتىگى جەرگىلىكتى اتقارۋشى ورگاندار ارقىلى جۇزەگە اسىرىلادى، سەبەبى اكىمدىكتەر وبلىستار، قالالار، اۋداندار مەن اۋىلدىق وكرۋگتەر دەڭگەيىندە مەملەكەتتىك باسقارۋدى اكىمشىلىك-اۋماقتىق ءبولىنىس شەگىندە جۇزەگە اسىرادى".
سونىمەن قاتار، كونسەرت ۇيىمداستىرۋشىلارمەن جاسالاتىن كەلىسىمشارتتارعا "فونوگرامما قولدانۋعا تىيىم" دەگەن ارنايى تارماق ەنگىزۋ جوسپارلانىپ وتىر.
بۇدان بولەك، اكىمدىكتەر جانىندا ويىن-ساۋىق، مادەني-كوپشىلىك ءىس-شارالاردى وتكىزۋگە وتىنىمدەردى قاراۋ جونىندەگى ۇيىمداستىرۋ كوميتەتتەرى جۇمىس ىستەيدى. اتالعان كوميتەتتەر اياسىندا يۆەنت-ۇيىمدارعا ءتيىستى ۇسىنىمدار بەرىلمەك.
سونىمەن قاتار، مەملەكەتتىك تەاتر-كونسەرتتىك ۇيىمداردا كوركەمدىك كەڭەستەر جۇمىس ىستەيدى، سونداي-اق اكىمدىكتەر جانىندا وڭىرلىك كوركەمدىك كەڭەستەر قىزمەت اتقارادى. وسى كەڭەستەردىڭ اياسىندا تەاتر-كونسەرتتىك ۇيىمداردىڭ جانە وتاندىق شوۋ-بيزنەس وكىلدەرىنىڭ كونسەرتتىك باعدارلامالارى قارالادى.
فونوگرامما قولدانىلۋىن جاۋاپتى كونسەرتتىك مەكەمەنىڭ باسشىلىعى مەن ءتيىستى جەرگىلىكتى اتقارۋشى ورگاندار قاداعالايتىن بولادى.
جاڭا تالاپتار كاسىبي كونسەرتتەردەگى فونوگرامماعا شەكتەۋ قويۋ ارقىلى كونسەرتتەردىڭ دەڭگەيىن كوتەرۋدى، جاندى داۋىستى ناسيحاتتاۋدى، وتاندىق ەسترادا ساپاسىن جاقسارتۋدى، كورەرمەن الدىنداعى ادىلدىكتى قامتاماسىز ەتۋدى ماقسات ەتەدى.
ال تويلار، مەيرامحانالار، كلۋبتار، اشىق الاڭدار جانە تەليەۆيزيالىق تۇسىرىلىمدەر بۇل تالاپتان تىس قالادى.