20-28 قاراشا كۇندەرى الەم بىرىنشىلىگى وتەدى
2022 جىلدىڭ 20 قازان كۇنى استانا قالاسىندا قازاقستان رەسپۋبليكاسى ۇلتتىق سپورت تۇرلەرى قاۋىمداستىعى مەن دۇنيەجۇزىلىك توعىزقۇمالاق فەدەراسياسى اراسىندا ارىپتەستىك تۋرالى مەموراندۋمعا قول قويۋ ءراسىمى ءوتتى، دەپ حابارلايدى Almaty-akshamy.kz.
مەموراندۋم اياسىندا قازاقستاندىق توعىزقۇمالاق فەدەراسياسىنىڭ ۇلتتىق سپورت تۇرلەرى قاۋىمداستىعىنا قوسىلۋى تۋرالى حابارلاندى. سونداي-اق، ەكى ۇيىم اراسىنداعى ارىپتەستىك توعىزقۇمالاقتى دامىتۋدى، سالاۋاتتى ءومىر سالتىن قالىپتاستىرۋ بويىنشا ناقتى ءىس-شارالار جوسپارىن ازىرلەۋدى كوزدەيدى.
سالتاناتتى راسىمگە ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ پەن دۇنيەجۇزىلىك توعىزقۇمالاق فەدەراسياسىنىڭ پرەزيدەنتى ءاليحان بايمەنوۆ قاتىستى.
«بۇگىن قول قويىلاتىن قۇجاتتىڭ ءمانىسى – توعىزقۇمالاق فەدەراسياسى ۇلتتىق سپورت تۇرلەرى قاۋىمداستىعىنا قوسىلادى. ەندى بىرلەسە وتىرىپ، ۇلتقا پايدالى تالاي جوبالاردى جۇزەگە اسىرامىز دەپ ويلايمىن. بۇل كەزدەسۋ – ۇلتتىق سپورت سالاسىنداعى ۇلكەن وزگەرىستىڭ باسى. ءبىلىمدى، اقىلدى، پاراساتتى جاستار – ۇلت بولاشاعى. ال توعىزقۇمالاق ويىنى – جاس ۇرپاققا ۇشقىر ويلاۋدى، ستراتەگيالىق جوسپارلاۋدى جانە تاباندىلىقتى ۇيرەتەدى»، - دەدى يسلامبەك سالجانوۆ.
ءوز كەزەگىندە دۇنيەجۇزىلىك توعىزقۇمالاق فەدەراسياسىنىڭ باسشىسى ءاليحان بايمەنوۆ بۇل باسقوسۋدىڭ توعىزقۇمالاقتى دامىتۋداعى ماڭىزىن اتاپ ءوتتى:
«ۇلتتىق سپورت ءتۇرى رەتىندە توعىزقۇمالاقتى دامىتۋ ەكى ۇيىمنىڭ دا ماقساتىنا كىرەدى. ال وسى ىستە كۇش بىرىكتىرىپ، ءىس-قيمىلىمىزدى، شارالارىمىزدى ۇيلەستىرىپ وتكىزۋدەن، بىر-بىرىمىزگە قولداۋ كورسەتۋدەن ۇتاتىن – توعىزقۇمالاق»، - دەدى ول.
تاراپتار قاراشا ايىندا اقتوبەدە وتەتىن توعىزقۇمالاقتان 6ء-شى الەم چەمپيونىن ابىرويمەن وتكىزۋ كەرەكتىگىنە توقتالدى. ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ دوداعا قازاقستاندىق سپورتشىلاردىڭ دايىندىعىن جەتىلدىرۋ قاجەتتىلىگىنە توقتالدى.
20-28 قاراشا كۇندەرى وتەتىن الەم بىرىنشىلىگىنە ۇلىبريتانيا، چەحيا، گەرمانيا، لاتۆيا، اقش، كولۋمبيا، انتيگۋا مەن باربۋدا، ءۇندىستان، ەفيوپيا، رۋمىنيا، ۋكراينا، رەسەي، جۇڭگو، تۇركيا، موڭعوليا، وزبەكستان، قىرعىزستان، تۇرىكمەنستان، تاجىكستان، ازەربايجان مەن مولدوۆادان 80-گە جۋىق سپورتشى قاتىسادى دەپ كۇتىلۋدە.
توعىزقۇمالاق — قازاقتىڭ ۇلتتىق ءداستۇرلى ويىندارىنىڭ ءبىرى. توعىزقۇمالاق تۋرالى العاشقى مالىمەتتەر اۋىز ادەبيەتىندە كەزدەسسە، بۇگىنگى كۇنگە ونىڭ تاسقا قاشالعان بەينەسى جەتتى. ەلىمىزدە توعىزقۇمالاقپەن اينالىساتىندار سانى 200 مىڭنان استى، ونىڭ 9 مىڭدايى – كاسىبي سپورتشى.
ايتا كەتەيىك، ۇلتتىق سپورت تۇرلەرى قاۋىمداستىعىنىڭ باسشىلىعى اۋىسىپ، ي.سالجانوۆ قاۋىمداستىق پرەزيدەنتى لاۋازىمىنا سايلانعالى بەرى قاۋىمداستىق جۇمىسى جاندانا ءتۇستى.
ءقازىر ۇلتتىق سپورت تۇرلەرى قاۋىمداستىعىنىڭ قۇرامىندا كوكپار، جامبى اتۋ، اۋدارىسپاق، تەڭگە ءىلۋ، بايگە، ساداق اتۋ سياقتى فەدەراسيالار بار.
قاۋىمداستىقتىڭ ۇيىمداستىرۋىمەن وسى جىلدىڭ قىركۇيەك ايىندا ەلىمىزدىڭ 19 وڭىرىنەن 95 شاباندوز قاتىسقان «ۇلى دالا جورىعى» مارافون-بايگەسى وتكىزىلدى.
وتكەن اپتادا ۇلتتىق سپورت تۇرلەرى قاۋىمداستىعى ۇيىمداستىرۋىمەن جاڭاوزەن قالاسىندا ءداستۇرلى ساداق اتۋدان تۇڭعىش رەسپۋبليكالىق چەمپيونات ءوتتى.