كەلەلى كەڭەس!
ۇيلەستىرۋ كەڭەسىنىڭ كەزەكتى 31-وتىرىسىندا ادام قۇقىقتارىن قورعاۋ سالاسىنداعى وزەكتى ماسەلەلەر تالقىلانىپ جاتىر، دەپ حابارلايدى Almaty-akshamy.kz 24.kz-كە سىلتەمە جاساپ.
ونىڭ ىشىندە كاسىپكەرلەردىڭ قۇقىعىن قورعاۋ، سوتقا دەيىنگى تەرگەۋدى قاداعالاۋ، جوعارى تەحنولوگيالاردى ەنگىزۋ، سىبايلاس جەمقورلىقپەن جانە لاڭكەستىكپەن كۇرەس مىندەتتەرى بۇگىنگى جينالىس تاقىرىبىنا ارقاۋ بولدى. فەميدا وكىلدەرىنىڭ تاۋەلسىز مەملەكەتتەر دوستاستىعى اۋماعىندا تۇراقتىلىقتى قامتاماسىز ەتۋگە قوسىپ جاتقان زور ۇلەسى تۋرالى دا ءسوز بولدى.
سپيكەرلەر «زاڭ الدىندا جۇرتتىڭ ءبارى تەڭ» دەگەن قاعيدات اياسىندا پروكۋراتۋرا ورىنى اسا ماڭىزدى ەكەنىن ايتتى. قازاقستان كەڭەس جانىنداعى باقىلاۋ ورگاندارىنىڭ كوپ جىلدىق جۇمىسىن جوعارى باعالايدى.
شارا بارىسىندا ۆەدومستۆولار ءوزارا تاجىريبە ءبولىسىپ، سوڭعى جىلدارداعى جەتىستىكتەرىن ورتاعا سالدى. جاڭا باعىتتار ايقىندالدى.
«سىزدەردى تاۋەلسىز مەملەكەتتەر دوستاستىعىنا قاتىسۋشى ەلدەردىڭ باس پروكۋرورلارى ۇيلەستىرۋ كەڭەسىنىڭ 31-وتىرىسىنىڭ اشىلۋىمەن قۇتتىقتاپ، جۇمىستارىڭىزعا ساتتىلىك تىلەۋگە رۇقسات ەتىڭىزدەر. مەملەكەت باسشىسى قاسىم-جومارت توقايەۆ تا ۇيلەستىرۋ كەڭەسىنىڭ جۇمىسىنا ەرەكشە كوڭىل ءبولىپ كەلەدى»، - دەدى قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەربايەۆ.