بىشكەك قالاسىنداعى «الا-ارچا» مەملەكەتتىك رەزيدەنسياسىندا تاۋەلسىز مەملەكەتتەر دوستاستىعى ەلدەرىنىڭ ۇكىمەت باسشىلارى كەڭەسىنىڭ كەزەكتى وتىرىسى ءوتتى، دەپ حابارلايدى almaty-akshamy.kz
وتىرىس بارىسىندا ءسوز العان ءاليحان سمايىلوۆ جاھاندىق سىن-قاتەرلەرگە قاراماستان، قاتىسۋشى ەلدەر اراسىنداعى ءوزارا ساۋدادا وڭ سەرپىن ساقتالىپ وتىرعانىن اتاپ ءوتتى. بۇل كوبىنە دوستاستىقتىڭ ينتەگراسيالىق بايلانىستارىن دامىتۋعا نەگىز بولعان ەركىن ساۋدا ايماعى تۋرالى شارتتى بىرلەسە ىسكە اسىرۋ ناتيجەسىندە مۇمكىن بولدى.
«تمد ەلدەرى باسشىلارىنىڭ قازان ايىنداعى سامميتىندە قازاقستان پرەزيدەنتى قاسىم-جومارت توقايەۆ ساۋدا-ساتتىقتاعى كەدەرگىلەردى جويۋعا، قولايلى تاريفتىك جاعدايلار جاساۋعا جانە اكىمشىلىك راسىمدەردى جەڭىلدەتۋگە ەرەكشە نازار اۋدارۋ قاجەتتىگىن اتاپ ءوتتى. بۇل تۇرعىدا قىزمەتتەردىڭ ەركىن ساۋداسى تۋرالى كەلىسىمنىڭ تەزىرەك كۇشىنە ەنۋى ماڭىزدى بولىپ وتىر. بۇل قۇجات اراداعى ءوزارا ءىس-قيمىلدى جاڭا ساپالى دەڭگەيگە شىعارۋعا مۇمكىندىك بەرەدى»، — دەدى پرەمەر-مينيستر.
سونىمەن بىرگە، ۇكىمەت باسشىسىنىڭ پىكىرىنشە، بىرلەسكەن جۇمىستىڭ نەگىزگى ماقساتى ونەركاسىپتىك كووپەراسيانى كەشەندى تۇردە كۇشەيتۋ بولۋعا ءتيىس.
«ونەركاسىپتىك كووپەراسيا تۇجىرىمداماسىن جانە ونى تمد-عا مۇشە مەملەكەتتەردە دامىتۋ جونىندەگى شارالار كەشەنىن ىسكە اسىرۋ ءبىزدىڭ ەلدەرىمىزدىڭ ەكونوميكالارىنا تىڭ سەرپىن بەرىپ، بەلگىلەنگەن جوسپارلاردى تولىق كولەمدە جۇزەگە اسىرۋعا ىقپال ەتەدى»، — دەدى پرەمەر-مينيستر.
سونداي-اق ءاليحان سمايىلوۆ ترانزيتتىك-كولىك باعىتتارىن بىرلەسىپ دامىتۋ سەرپىندى جانە ءوزارا ءتيىمدى ەكونوميكالىق ىنتىماقتاستىقتىڭ كورسەتكىشى ەكەنىن ايتتى. وسىعان بايلانىستى ترانسكاسپيي حالىقارالىق كولىك باعىتى مەن «سولتۇستىك-وڭتۇستىك» ءدالىزىن دامىتۋدىڭ ماڭىزى جوعارى.
«بۇل ترانزيتتىك ماگيسترالداردى جاھاندىق “ءبىر بەلدەۋ، ءبىر جول” جوباسىمەن توعىستىرۋدىڭ ماڭىزدى زور. قازاقستان ءوز تاراپىنان بىرلەسكەن جۇمىسقا دايىن»، — دەدى ءاليحان سمايىلوۆ.
ونىڭ ايتۋىنشا، ەكونوميكالىق كۇن ءتارتىبىن ىلگەرىلەتۋمەن قاتار، مادەني-گۋمانيتارلىق بايلانىستاردى دامىتۋ دا ماڭىزدى. بۇگىندە بۇل باعىتتا ءتيىستى باعدارلامالار مەن تۇجىرىمدامالار قابىلدانىپ، تمد-نىڭ اۋقىمدى مادەني جوبالارى ىسكە اسىرىلۋدا.
«بۇگىنگى وتىرىستا ءبىز 2024 جىلى تمد-دا ۆولونتەرلىك قوزعالىس جىلىن وتكىزۋ جونىندەگى ءىس-شارالار جوسپارىن قابىلدايمىز. وسىنداي يگى باستامالار تمد-نىڭ جاقسى ءيميدجىن قولداۋعا، ەلدەر اراسىنداعى بۇرىننان قالىپتاسقان دوستىق بايلانىستاردى نىعايتۋعا ىقپال ەتەتىنىنە سەنىمدىمىن»، — دەپ تۇيىندەدى پرەمەر-مينيستر.
ءىس-شارالارعا بەلارۋس ۇكىمەت باسشىسى رومان گولوۆچەنكو، قىرعىزستان مينيسترلەر كابينەتىنىڭ ءتوراعاسى اقىلبەك جاپاروۆ، رەسەي پرەمەر-مينيسترى ميحايل ميشۋستين، تاجىكستان ۇكىمەتىنىڭ باسشىسى كوحير راسۋلزودا جانە وزبەكستاننىڭ ۇكىمەت باسشىسى ابدۋللا اريپوۆ، ازەربايجان پرەمەر-مينيسترىنىڭ ورىنباسارى شاحين ابدۋللا وگلى مۋستافايەۆ، ارمەنيا ۆيسە-پرەمەرى مگەر گريگوريان، تۇرىكمەنستان مينيسترلەر كابينەتى ءتوراعاسىنىڭ ورىنباسارى حودجامۋرات گەلدىمۋرادوۆ قاتىستى.
تمد ەلدەرى ۇكىمەت باسشىلارىنىڭ كەڭەسى وتىرىسىنىڭ قورىتىندىسى بويىنشا ءبىرقاتار قۇجاتقا قول قويىلدى، اتاپ ايتقاندا، ولار گەودەزيا، كارتوگرافيا جانە گەواقپاراتتىق تەحنولوگيالار، تاۋ-كەن مەتاللۋرگيا سالاسى، IT-سەكتور جانە ت.ب. سالالارداعى ىنتىماقتاستىقتى نىعايتۋعا باعىتتالعان.