تمد ەلدەرىنىڭ ىىم-تەرىمەن بىرگە ىزدەۋدە جۇرگەن ادامداردى ۇستاۋ، سونداي-اق حابار-وشارسىز كەتكەندەردى انىقتاۋ بويىنشا جەدەل-پروفيلاكتيكالىق ءىس-شارا وتكىزىلدى، دەپ حابارلايدى aqshamnews.kz Polisia.kz-كە سىلتەمە جاساپ.
قىرعىز رەسپۋبليكاسىنىڭ ىىم-مەن ءوزارا ءىس-قيمىل بارىسىندا بىشكەك قالاسىندا 39 جاستاعى قازاقستاندىق ازامات ۇستالدى. ول 13 جىل بۇرىن جامبىل وبلىسىندا جاسالعان توپتىق زورلاۋعا قاتىسقانى ءۇشىن ىزدەۋدە جۇرگەن.
رەسەي فەدەراسياسى ءىىم قىلمىستىق ىزدەستىرۋ باس باسقارماسىمەن ىنتىماقتاستىق ناتيجەسىندە سوچيدە 22 جاستاعى قازاقستاندىق ازامات قۇرىقتالدى. ول جەتىسۋ وبلىسىنىڭ اۋماعىندا ءبىرقاتار ينتەرنەت-الاياقتىق جاساعاننان كەيىن جاسىرىنىپ كەلگەن.
پاۆلودار وبلىسى پد جەدەل-ىزدەستىرۋ توبى رەسەيلىك ارىپتەستەرىمەن بىرگە گروزنىيدا 52 جاستاعى ەر ادامدى ۇستادى. ول 1996 جىلى پاۆلودار وبلىسىنىڭ بوبروۆكا اۋىلىندا جەرگىلىكتى تۇرعىنعا قاراقشىلىق شابۋىل جاساعان.
جامبىل وبلىسى قورداي اۋدانىنىڭ اۋماعىندا وزبەكستاننىڭ 47 جاستاعى ازاماتى قۇرىقتالدى. ول ءوز جۇبايىن ءولتىرىپ، جاسىرىنىپ جۇرگەن.
ەلوردادا گەرمانيانىڭ 58 جاستاعى ازاماتى ۇستالدى. كۇدىكتى گامبۋرگتە اسا ءىرى كولەمدە الاياقتىق جاساعانى ءۇشىن ءوز ەلىنىڭ ينتەرپولىمەن ىزدەۋدە جۇرگەن.
ودان بولەك، ادام ومىرىنە قاستاندىق جاساعانى ءۇشىن تۇركيانىڭ قۇقىق قورعاۋ ورگاندارىمەن ىزدەستىرىلىپ جۇرگەن 33 جاستاعى شەتەلدىك قۇرىقتالدى.
وزبەكستان ىىم-مەن بىرگە جامبىلدىق پوليسەيلەر بايزاق اۋدانىندا كورشى ەلدىڭ 46 جاستاعى ازاماتىن ۇستادى. ول 2009 جىلدىڭ قاڭتارىنان باستاپ ادام ساۋداسى ءۇشىن ىزدەۋدە بولعان.
الماتى وبلىسى پد قىزمەتكەرلەرى وتكىزگەن ءىس-شارالاردىڭ ناتيجەسىندە ەڭبەكشىقازاق اۋدانىندا كىسى ءولتىرۋ قىلمىستارى ءۇشىن ىزدەۋدە جۇرگەن اتالعان اۋداننىڭ 33 جاستاعى جانە 27 جاستاعى تۇرعىندارى ۇستالدى.
حابار-وشارسىز كەتكەن 56 ادامنىڭ، ونىڭ ىشىندە 10 كامەلەتكە تولماعان بالانىڭ جۇرگەن جەرى انىقتالدى. مىسالى، تۇركىستان جانە ماڭعىستاۋ وبلىستارىنىڭ پد قىزمەتكەرلەرىنىڭ بىرلەسكەن جۇمىسىنىڭ ارقاسىندا 31 ناۋرىز كۇنى ۇيىنەن شىعىپ كەتكەن 15 جاسار قىز اقتاۋدا تابىلدى.
جەدەل ءىس-شارانىڭ ەكى كۇنىنىڭ قورىتىندىسى بويىنشا ىزدەۋدە جۇرگەن 284 قىلمىسكەر ۇستالدى: كىسى ولتىرگەنى ءۇشىن – 7؛ دەنساۋلىققا اۋىر زيان كەلتىرگەنى ءۇشىن – 9؛ قاراقشىلىق شابۋىلدار ءۇشىن – 6؛ توناۋ ءۇشىن – 5؛ ەسىرتكى قىلمىستارى ءۇشىن - 13. ونىڭ ىشىندە رەسپۋبليكادان تىس جەرلەردە 32، باسقا ەلدەر ءۇشىن 164 قىلمىسكەر قۇرىقتالدى.