زارداپ شەككەن حالىقتى شۇعىل ەۆاكۋاسيالاۋ ءۇشىن «قازاۆياقۇتقارۋ» اق اۋە كەمەلەرى دايىن
ەلىمىزدە كوكتەمگى سۋ تاسقىنى ءقاۋپىنىڭ الدىن الۋ جانە كۇرەسۋ شارالارى جالعاسىپ جاتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سۋ تاسقىنى قاۋپىنە بايلانىستى مەملەكەتتىك قۇزىرلى ورگانداردىڭ قاتىسۋىمەن رەسپۋبليكالىق جانە وبلىستىق جەدەل شتابتار جۇمىس ىستەپ تۇر. سۋ تاسقىنىنا بايلانىستى ەسكەرتۋ تۋرالى 5 397 سمس-حابارلاما جانە «دارمەن» ءموبيلدى قوسىمشاسى ارقىلى 884 حابارلاما جىبەرىلدى. جەدەل جەلىگە اقپاراتتىق سيپاتتاعى 350-دەن استام قوڭىراۋ ءتۇستى. سۋ تاسقىنىن تۋدىرعان نەگىزگى سەبەپتەر – سۋ وتكىزۋ ارنالارىنىڭ بولماۋى، ارىقتاردىڭ، ەلدى مەكەندەر ماڭىنداعى قورعانىش ۇيىندىلەرىنىڭ زارداپ شەگۋى. سول سياقتى كەنتتەردە ارىق جۇيەسىنىڭ بولماۋى، وزەن ارنالارىنىڭ تولىپ كەتۋى مەن شوگۋى جانە تۇرعىن ۇيلەردى سۋ قورعاۋ بەلدەۋلەرىنە جاقىن ماڭدا سالۋ دا سەبەپ»، - دەدى تجم توتەنشە جاعدايلاردى جويۋ دەپارتامەنتىنىڭ باستىعى قاھارمان ورازالين وكق-دە وتكەن بريفينگىدە.
تجم وكىلى كەلتىرگەن اقپاراتقا سايكەس، سۋ تاسقىنى ءقاۋپىنىڭ الدىن الۋ جانە كۇرەسۋ ءۇشىن 35 مىڭنان استام ادام (35 945) جانە شامامەن 11 مىڭ بىرلىك تەحنيكا ۇيىمداستىرىلدى.
«توتەنشە جاعدايدا ماماندار مەن قۇرالداردى جەدەل تاسىمالداۋ، سونداي-اق زارداپ شەككەن حالىقتى شۇعىل ەۆاكۋاسيالاۋ ءۇشىن «قازاۆياقۇتقارۋ» اق اۋە كەمەلەرى دايىن. ودان بولەك، ازاماتتىق قورعانىستىڭ اسكەري بولىمدەرى دە قۇتقارۋ وپەراسيالارىنا قاتىسۋعا بەكەم وتىر»، - دەيدى ول.
سونداي-اق، توتەنشە جاعدايلاردى جويۋ دەپارتامەنتىنىڭ باستىعى كەلەسى قاۋىپسىزدىك ەرەجەلەرىن ەسكە سالدى:
- توتەنشە جاعدايلار قىزمەتى جانە جەرگىلىكتى اتقارۋشى ورگانداردىڭ ۇسىنىستارىن ورىنداۋ؛
- ءۇي اۋماعىن قاردان ۋاقىتىلى تازارتۋ؛
- ينەرتتى ماتەريالداردى جانە قاپتاردى الدىن الا دايىنداۋ؛
- جەرگىلىكتى اتقارۋشى ورگاندارىنان ەۆاكۋاسيالاۋ پۋنكتتەرىن جانە وعان جەتۋدىڭ جولىن ءبىلۋ؛
- ۇيلەردىڭ جانىندا ورنالاسقان ارىقتار مەن سۋ وتكىزۋ قۇبىرلارىن تازارتۋ؛
- سۋ قويمالارىندا بالالاردى قاراۋسىز قالدىرۋعا بولمايدى، اسىرەسە، مۇز ەرىپ جاتقاندا.