جىل سوڭىنا دەيىن توتەنشە جاعدايلار مينيسترلىگىنىڭ قىزمەتكەرلەرى ءورت قاۋىپسىزدىگى ماقساتىندا 2 ملن ءۇيدى ارالاپ شىعادى. بۇل تۋرالى ق ر تجم ورتكە قارسى قىزمەت كوميتەتىنىڭ ءتوراعاسى نۇربولات دەربىسوۆ ايتىپ بەردى، دەپ حابارلايدى almaty-akshamy.kz قازاقپاراتقا سىلتەمە جاساپ.
«جىل سايىن جىلىتۋ كەزەڭى تۇرعىن ءۇي سەكتورىندا ورت-پروفيلاكتيكالىق ءىس-شارالارىنان باستالادى. وتكەن جىلدارى بۇل جۇمىسقا تەك تجم جانە پوليسيا قىزمەتكەرلەرى جۇمىلدىرىلدى. ال 2019 جىلدان باستاپ تجم باستاماسى بويىنشا حالىقتىڭ الەۋمەتتىك وسال توپتارىنىڭ، جەتىم بالالاردىڭ، كوپبالالى وتباسىلاردىڭ ۇيلەرىنە بارۋ اكىمدىكتەردىڭ الەۋمەتتىك قورعاۋ قىزمەتتەرىنىڭ وكىلدەرىمەن بىرلەسىپ جۇزەگە اسىرىلۋدا»، - دەدى ن. دەربىسوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، 15 تامىزدان 15 قىركۇيەككە دەيىن ءورت قاۋىپسىزدىگى اكسياسىنىڭ I-كەزەڭى وتكەن. وندا اكىمدىك وكىلدەرىمەن بىرلەسىپ، حالىقتىڭ الەۋمەتتىك وسال توپتارىنىڭ، كوپبالالى وتباسىلاردان شىققان بالالاردىڭ، جەتىم بالالاردىڭ ۇيلەرىنە بارىپ، قاجەتتى كومەك كولەمى انىقتالعان. ال 15 قىركۇيەكتەن 15 قازانعا دەيىن اكسيانىڭ II كەزەڭىندە تج تۋىنداۋ ءقاۋپى بار، ياعني اۆتونومدى جىلىتۋ جۇيەلەرى بار ۇيلەر الدىن الۋ جۇمىستارىمەن قامتىلدى.
«جالپى ارالاۋ بارىسىندا تجم قىزمەتكەرلەرى 764 مىڭنان استام ءۇيدى ارالادى، الايدا 51 مىڭ ءۇيدىڭ تۇرعىندارىن تەكسەرۋ مەن كەڭەس بەرۋدەن باس تارتتى. اكىمدىك وكىلدەرىمەن بىرلەسىپ 71 مىڭ ءۇي ارالانىپ، 747 مىڭ ازاماتقا نۇسقاۋ بەرىلدى. 118 مىڭعا جۋىق ۇيدە 158 مىڭ ءورت قاۋىپسىزدىگى تالاپتارىن بۇزۋ جاعدايى انىقتالدى، ونىڭ ىشىندە 40 مىڭنان استامى سول جەردە جويىلدى»، - دەدى ول.
سپكيەر بۇزۋشىلىقتاردىڭ 90%-ى ەلەكتر تەحنيكالىق جەلىلەر مەن ەلەكتر جابدىقتارىن جانە اۆتونومدى جىلىتۋ جۇيەلەرىن پايدالانۋمەن بايلانىستى ەكەنىن اتاپ ءوتتى.
«پروفيلاكتيكالىق جۇمىستار ءبىر رەت بارۋمەن جانە ۇگىت ماتەريالدارىن تاراتۋمەن شەكتەلمەيدى. ءورت قاۋىپسىزدىگى تالاپتارىن بۇزعان ۇيلەرگە قايتا بارادى. بيىل سوڭىنا دەيىن شامامەن 2 ملن جەكە ءۇيدى ارالاۋ جوسپارلانىپ وتىر»، - دەدى ن. دەربىسوۆ.