قۇرىلعى دوعا ءتارىزدى پىشىنگە يە.
WindowsUnited نەمىس باسىلىمىنىڭ مالىمەتىنشە، Microsoft كورپوراسياسى جينالمالى كومپيۋتەر ءتىنتۋىرىن شىعارادى، دەپ حابارلايدى Almaty-akshamy.kz Lenta.ru سايتىنا سىلتەمە جاساپ.
امەريكالىق كورپوراسيانىڭ پاتەنتىندە قۇرىلعى بولاشاقتىڭ ءتىنتۋىرى رەتىندە سيپاتتالعان. قۇرىلعى دوعا ءتارىزدى پىشىنگە يە جانە العاشقى نۇسقاسى 2008 جىلى شىققان Arc تىنتۋىرىنە ۇقسايدى. اكسەسسۋاردىڭ كىرىكتىرىلگەن توپساسى بار، ونىڭ ارقاسىندا ونى وڭاي الىپ ءجۇرۋ ءۇشىن بۇكتەۋگە بولادى.
جۋرناليستەر بۇل ءتىنتۋىردى ءقازىر تانىمال بولا باستاعان جينالمالى سمارتفوندارمەن سالىستىردى. قۇرىلعىنىڭ قۇجاتتاماسىندا ونىڭ اينالدىرۋ دوڭگەلەگى بولاتىن-بولمايتىنى كورسەتىلمەگەن. جۋرناليستەردىڭ بولجاۋىنشا، Microsoft كورپوراسياسى كومپيۋتەرلىك تىشقانداردىڭ وسى ءبىر كلاسسيكالىق ەلەمەنتىنەن باس تارتۋى مۇمكىن. پاتەنت 2021 جىلدىڭ ناۋرىزىندا بەرىلدى جانە 4 قاراشادا جاريالاندى. وسىدان كەيىن اۆتورلار اكسەسسۋار جاقىن ارادا شىعارىلۋى مۇمكىن دەگەن قورىتىندىعا كەلىپ وتىر.
2020 جىلدىڭ تامىز ايىنىڭ باسىندا اقش-تا 92 جاستاعى العاشقى كومپيۋتەرلىك ءتىنتۋىردى جاساۋشىلاردىڭ ءبىرى ۋيليام ينگليش قايتىس بولدى. ول 1964 جىلى دۋگلاس ەنگەلبارتپەن بىرلەسە جۇمىس ىستەپ، كومپيۋتەرلىك ءتىنتۋىردىڭ ۇلگىسىن جاساعان بولاتىن.