توتەنشە جاعدايلار مينيسترلىگىندە تج ۆيسە-مينيسترى باتىربەك ابدىشيەۆتىڭ توراعالىعىمەن توتەنشە جاعدايلاردىڭ الدىن الۋ جانە ولاردى جويۋ جونىندەگى ۆەدومستۆوارالىق مەملەكەتتىك كوميسسيانىڭ وتىرىسى ءوتتى.
وتىرىس بارىسىندا ەلىمىزدىڭ سەيسميكالىق قاۋىپسىزدىگىن قامتاماسىز ەتۋ ماسەلەلەرى قارالدى، دەپ حابارلايدى aqshamnews.kz ق ر تجم-گە سىلتەمە جاساپ.
وتىرىس بەينەسەلەكتورلىق رەجيمدە ورتالىق مەملەكەتتىك ورگاندار وكىلدەرىنىڭ، وبلىستار، الماتى جانە شىمكەنت قالالارى اكىمدەرى ورىنباسارلارىنىڭ، سەيسميكالىق ءقاۋىپتى وڭىرلەردەگى تجد باستىقتارىنىڭ قاتىسۋىمەن ءوتتى. قاتىسۋشىلاردىڭ باياندامالارىندا سەيسميكالىق قاۋىپسىزدىك جانە سەيسمولوگيالىق باقىلاۋ جەلىسىن جاڭعىرتۋ ماسەلەلەرى بويىنشا جۇمىستار قوزعالدى.
توتەنشە جاعدايلار، سيفرلىق دامۋ، عىلىم جانە جوعارى ءبىلىم، ونەركاسىپ جانە قۇرىلىس مينيسترلىكتەرىنىڭ، سونداي-اق جەرگىلىكتى اتقارۋشى ورگانداردىڭ باسشىلارى سەيسميكالىق قاۋىپسىزدىكتى كۇشەيتۋ جانە سەيسمولوگيالىق زەرتتەۋلەر ينفراقۇرىلىمىن دامىتۋ شارالارىن ۇسىندى.
تجم تج الدىن الۋ كوميتەتى ءتوراعاسىنىڭ ورىنباسارى ايبول اقپاروۆ اتاپ وتكەندەي: «ەلىمىزدىڭ رەسپۋبليكالىق ماڭىزى بار 2 قالاسى مەن 13 ءوڭىرى سەيسميكالىق ءقاۋىپتى. سەيسميكالىق قاۋىپسىزدىك پروبلەمالارىن كەشەندى شەشۋ ءۇشىن ق ر ۇكىمەتىنىڭ قاۋلىسىمەن سەيسمولوگيالىق سالانى دامىتۋدىڭ 2024-2028 جىلدارعا ارنالعان كەشەندى جوسپارى بەكىتىلدى. وسى جوسپار اياسىندا سەيسميكالىق تاۋەكەلىن باعالاۋ جانە جەر سىلكىنىستەرىنەن بولاتىن زالالدى بولجاۋ، مونيتورينگ جەلىسىن كەڭەيتۋ كوزدەلگەن».
سونىمەن قاتار تجم «ازاماتتىق قورعاۋ تۋرالى» زاڭىنا وزگەرىستەر ەنگىزۋ شەڭبەرىندە مەملەكەتتىڭ، كاسىپكەرلەردىڭ جانە حالىقتىڭ وسى سالاداعى ءوزارا قارىم - قاتىناسىن رەتتەيتىن جەكە تاراۋ ەنگىزۋدى ۇسىندى.
وتىرىس قورىتىندىسى بويىنشا ۆيسە-مينيستر باتىربەك ابدىشيەۆ مۇددەلى مەملەكەتتىك ورگاندار مەن ۇيىمدارعا جەتەكشىلىك ەتەتىن باعىتتار بويىنشا ادامداردىڭ قاۋىپسىزدىگىن قامتاماسىز ەتۋگە باعىتتالعان ۇيىمداستىرۋشىلىق جانە پراكتيكالىق ءىس-شارالار كەشەنىن جۇرگىزۋدى، سەيسميكالىق قۇبىلىستاردىڭ الدىن الۋ جانە اسەرىن ازايتۋ جونىندەگى جۇمىستى كۇشەيتۋدى تاپسىردى.
وتىرىس سوڭىندا حاتتامالىق شەشىم قابىلداندى.