تجم داۋىلدى ەسكەرتۋ كەزەڭىندە جولعا شىعۋدان باس تارتۋعا كەڭەس بەرەدى

جالپى ەكى تاۋلىك ىشىندە ەلىمىزدىڭ اۆتوجولدارىندا 5 مىڭنان استام ادام، ونىڭ ىشىندە 275 بالا قۇتقارىلدى. وتكەن تاۋلىكتىڭ وزىندە جولداردا 4 510 ادام، ونىڭ ىشىندە 225 بالا قۇتقارىلدى.

اۆاريالىق-قۇتقارۋ جۇمىستارىنا تجم، قورعانىس مينيسترلىگى، پوليسيا، قازاۆتوجول، شەكارا جاساعىنىڭ كۇشتەرى مەن قۇرالدارى جۇمىلدىرىلدى.

بۇدان باسقا، جامبىل وبلىسىنا ءوزارا ءىس-قيمىل شەڭبەرىندە جانە قىرعىز رەسپۋبليكاسىنا باراتىن 100-گە جۋىق اۆتوكولىكتىڭ ءجۇرىپ-تۇرۋىنا كومەك كورسەتۋ ءۇشىن قىرعىزستان تجم كۇشتەرى مەن قۇرالدارى كەلدى.

قولايسىز اۋا-رايىنا بايلانىستى قۇتقارۋ جۇمىستارى قيىندادى.

جامبىل وبلىسىنىڭ جۋالى جانە قورداي اۋداندارىندا 4096 ادام، ونىڭ ىشىندە 181 بالا، 39 شەتەل ازاماتى قۇتقارىلدى.

تاراز قالاسىنان شىمكەنتكە قاراي شىعابەرىستە 400-دەن استام اۆتوكولىك، قورداي اسۋىندا - 60 بىرلىك، بلاگوۆەششەنكادا-340 بىرلىك كولىك كەپتەلىستە تۇر. اۆتوجولداردى تازارتۋ جۇمىستارى تاۋلىك بويى جۇرگىزىلۋدە.

تۇركىستان وبلىسىندا 357 ادام، ونىڭ ىشىندە 40 بالا قۇتقارىلدى.

شىمكەنت-تاراز باعىتى بويىنشا شۇقىربۇلاق ەلدى مەكەنىنىڭ اۋدانىندا شامامەن 400 بىرلىك تەحنيكا، شاقپاق اۋىلىنىڭ اۋدانىندا شامامەن 230 بىرلىك تەحنيكا كەپتەلىستە تۇر. ولاردىڭ ىشىندە 1200-گە جۋىق ادام بار. ازاماتتار جىلىتۋ پۋنكتتەرىنە ورنالاستىرىلعان.

جامبىل جانە تۇركىستان وبلىستارى اكىمدەرىنىڭ شەشىمدەرىمەن قورداي، شۋ جانە تۇلكىباس اۋداندارىندا جەرگىلىكتى اۋقىمداعى تابيعي سيپاتتاعى توتەنشە جاعداي جاريالاندى.

جەتىسۋ وبلىسىندا «ءۇشارال-دوستىق»  اۆتوجولىندا قار قۇرساۋىنان 57 ادام، ونىڭ ىشىندە 4 بالا قۇتقارىلدى.

الماتى جانە قاراعاندى وبلىستارىندا ىزدەستىرۋ-قۇتقارۋ جۇمىستارى جۇرگىزىلدى.  قولايسىز اۋا-رايىندا مال جايۋعا جانە مال ىزدەۋگە شىققان ءۇش ادام امان-ەسەن تابىلدى.

جەدەل جەلى تەلەفوندارى جۇمىس ىستەيدى:

- تجم 8 717 2 70 41 14،

- جامبىل وبلىسى تجد 8 726 2 51 35 75، 51 41 67،

- تۇركىستان وبلىسى تجد 8 725 33 57 897.

تجم داۋىلدى ەسكەرتۋ كەزەڭىندە الىس ساپارلارعا شىقپاۋعا، الىس قاشىقتىققا جاياۋ جۇرۋدەن باس تارتۋعا كەڭەس بەرەدى.