تالاي جاننىڭ ءومىرىن ءتىلسىز جاۋدان امان الىپ قالعان

تاۋەلسىزدىكتىڭ قۇرداسى دۋلات تولەۋبايەۆ 1991 جىلى 4 ناۋرىزدا جەزقازگان قالاسىندا دۇنيەگە كەلگەن، دەپ حابارلايدى almaty-akshamy.kz  ۇلىتاۋ وبلىسى تجد باسپا ءسوز قىزمەتىنە سىلتەمە جاساپ.

ەلىمىزدىڭ مىستى شاھارىندا ءوسىپ-ونىپ، وقۋىن ءبىتىرىپ، 2010 جىلى قازاقستان رەسپۋبليكاسىنىڭ قورعانىس كۇشتەرىنىڭ قاتارىنا شاقىرىلىپ، اسكەري بورىشىن الماتى وبلىسى ىلە اۋدانى كومسومول اۋىلىندا اتقاردى. 2012 جىلى جەزقازعان قالاسىنىڭ №1 مامانداندىرىلعان ءورت ءسوندىرۋ بولىمىنە جۇرگىزۋشى بولىپ جۇمىسقا ورنالاسىپ، 2017 جىلى وسى اتالعان ءبولىمىنىڭ بولىمشە كومانديرى لاۋازىمىنا تاعايىندالعان. بۇگىندە وسى قىزمەتىن جالعاستىرىپ جاتىر. دۋلات – بەيبىت كۇننىڭ باتىرى. 10 جىلدان اسا ازاماتتىق قورعاۋ ورگانىندا ەڭبەك ەتكەن ول تالاي جاننىڭ ءومىرىن ءتىلسىز جاۋدان ەرلىكپەن امان الىپ قالعان.

«2021 جىلى تۇنگى ۋاقىتتا 101 پۋلتىنە جەزقازعان قالاسى تۇرعىن ءۇيدىڭ پاتەر جانۋى تۋرالى حابارلاما كەلىپ تۇسەدى. ءورت ورنىنا جەتكەن كەزدە 4ء-شى قاباتتا پاتەردىڭ وتقا ورانعانى انىقتالادى. بارلاۋ كەزىندە 5ء-شى قاباتتا كويۋ ءتۇتىن سالدارىنان 2 ادام وزدىگىنەن شىعا الماعان ەكەن. ءوزىمنىڭ گاز تۇتىنىنەن قورعايتىن اپپاراتىمنىڭ ماسكاسىن شەشىپ، قويۋ ءتۇتىننىڭ اراسىندا قالعان ايەل ادامعا كيگىزىپ، سىرتقا شىعاردىم. ەكىنشى ادامعا ارىپتەسىم سپاساتەلنىي كالپاگىن بەرىپ قۇتقاردى. ءار شاقىرۋعا شىققان سايىن ءوز باسىمىزدى قاتەرگە تىگىپ، ادامداردى امان شىعارۋعا تىرىسامىز»، - دەيدى دۋلات تولەۋبايەۆ.

بولىمشە كومانديرىنىڭ سوزىنشە، بۇل سالاعا كەلۋىنە ءورت ءسوندىرۋ قىزمەتىندە جۇمىس ىستەگەن اكەسى مەن اعاسى ارقاۋ بولدى. وسىلايشا، بالا كۇنىنەن قىزىعۋشىلىعى ارتىپ، اسكەردەن كەلگەن سوڭ ءورت ءسوندىرۋشى ماماندىعىن تاڭداعان ەكەن. سونداي-اق قازىرگى تاڭدا دۋلات تولەۋبايەۆ – ادال جار، ەكى حانشايىمنىڭ مەيىرىمدى اكەسى.