ق ر ءىىم اكىمشىلىك پوليسيا كوميتەتىنىڭ جاۋابىندا "توتەنشە جاعداي تۋرالى" زاڭ بويىنشا كومەندانتتىق ساعات ەرەجەلەرىن بۇزعان ادامداردى پوليسيا نەمەسە اسكەري پاترۋل جاساعى كومەندانتتىق ساعات اياقتالعانعا دەيىن، ال وزىمەن بىرگە قۇجاتتارى جوق ادامداردى – ولاردىڭ جەكە باسىن انىقتاعانعا دەيىن، ءبىراق 48 ساعاتتان اسىرماي ۇستاي الادى. ۇستالعان ادامداردىڭ جانىندا بولعان زاتتار مەن كولىك قۇرالدارى تەكسەرىلۋى مۇمكىن.
جالپى العاندا، توتەنشە جاعداي ەنگىزىلگەن كەزدە جەكە باستى كۋالاندىراتىن قۇجاتتاردى تەكسەرۋ، ءۇستى-باسىن ءتىنتۋ، ۇستالعان ادامداردىڭ زاتتارى مەن كولىگىن تەكسەرۋ سياقتى شارالار مەن ۋاقىتشا شەكتەۋلەر قاراستىرىلادى.
الماتى وبلىستىق ادۆوكاتتار القاسىنىڭ ادۆوكاتى الەكساندر ليسيچەنكونىڭ ايتۋىنشا، پوليسيا قىزمەتكەرلەرى، اسكەري قىزمەتشىلەر جانە ۇلتتىق ۇلان قىزمەتكەرلەرى توتەنشە جاعداي كەزىندە كوشەدەگى ادامداردى توقتاتىپ، ولاردىڭ قۇجاتتارىن تەكسەرىپ، ءتىنتۋ جۇرگىزە الادى.
بۇل بارلىق قۇرىلىمداردىڭ قىزمەتىن رەتتەيتىن سالالىق زاڭداردا قاراستىرىلعان. توتەنشە جاعداي كەزىندە وسى اتالعانداردىڭ بارلىعى كوشەدە ازاماتتاردى توقتاتىپ، تەكسەرۋگە قۇقىلى. تاجىريبە كورسەتىپ وتىرعانداي، توتەنشە جاعداي كەزىندە بىزدە قوعامدىق ءتارتىپتى قورعاۋمەن اينالىساتىن پاترۋلدەر ىشكى ىستەر ورگاندارىنىڭ وكىلدەرىنەن، نە اسكەري قىزمەتشىلەردەن، نە ۇلتتىق ۇلاننان قۇرالادى.
ادۆوكات الەكساندر ليسيچەنكو
ادۆوكاتتىڭ ايتۋىنشا، ەگەر توقتاتىلعان ادامنان قانداي دا ءبىر قۇقىقبۇزۋشىلىق جاساۋ بەلگىلەرى نەمەسە توتەنشە جاعدايدى بۇزۋ بەلگىلەرى، كومەندانتتىق ساعاتتى بۇزۋ جانە تاعى باسقاسىن بايقاسا، وندا وعان ءتىنتۋ جۇرگىزىلەدى. ال كوشەدە كورىنگەننىڭ بارلىعىن جاعالاي توقتاتۋ جانە وعان ەشقانداي كۇدىكسىز سەكەمدەنە قاراۋ زاڭسىز بولىپ تابىلادى.
ءىىم توتەنشە جاعداي كەزىندە جەرگىلىكتى اۋماقتىڭ كومەندانتى ءوز بۇيرىقتارى ءارى قاۋلىسىمەن تۇرعىندار ءۇشىن شەكتەۋلەر ەنگىزە الادى، مىسالى تۇرعىلىقتى جەرىنەن بەلگىلەنگەن مەرزىم ىشىندە كەتپەۋ تۇرىندە دەپ ءتۇسىندىردى.
سول ەلدى مەكەننىڭ تۇرعىندارى بولىپ تابىلمايتىن ءارى وسى تالاپتى بۇزۋشىلار ءوز شىعىنى ەسەبىنەن جىراققا شىعارىلادى. ەرەجەلەر مەن تىيىمداردى بۇزۋ اكىمشىلىك نەمەسە قىلمىستىق جاۋاپكەرشىلىككە اكەلىپ سوقتىرادى. سوندىقتان بەلگىلەنگەن رەجيمدى بۇزعان ادامدار ۇستالىپ، پوليسيا ورگاندارىنا زاڭدى تۇردە جەتكىزىلۋى مۇمكىن.
توتەنشە جاعداي كەزىندە كومەندانتتىق ساعاتتى بۇزۋ، توتەنشە جاعدايعا بايلانىستى ەنگىزىلگەن ەرەجەلەر مەن شەكتەۋلەردى ەلەمەۋ ادامدى ۇستاۋعا قوسىمشا سەبەپتەر بولا الۋى مۇمكىن. مىسالى، ەگەر ادامنان قىلمىستىڭ قانداي دا ءبىر بەلگىلەرى سىرتتاي بايقالسا: اتىس نەمەسە سۋىق قارۋ نەمەسە ونىڭ كيىمىندە قاننىڭ ىزدەرى، قانداي دا ءبىر جاراقاتتار بولسا، وندا مۇنداي جاعدايلاردا ونى توقتاتىپ، ۇستاۋعا دا بولادى. پوليسيا وكىلدەرى، ىشكى اسكەر ساربازى، ۇلتتىق ۇلان جانە ۇلتتىق قاۋىپسىزدىك كوميتەتى قىزمەتكەرلەرى دە مۇنداي ازاماتتاردى ۇستاپ، قۇقىق قورعاۋ ورگاندارىنا جەتكىزە الادى.
الەكساندر ليسيچەنكو
قانداي دا ءبىر قۇقىق بۇزۋشىلىق-اكىمشىلىك نەمەسە قىلمىستىق بۇزۋشىلىق جاسادى دەپ بولجاۋعا نەگىز بولعان كەزدە عانا ادامدى ىشكى ىستەر ورگاندارىنا جەتكىزۋگە بولادى.
ق ر ءىىم اتاپ وتكەندەي، زاڭ بويىنشا ازاماتتاردىڭ جەكە ءومىرى، جەكە جانە وتباسىلىق قۇپياسى زاڭمەن قورعالادى. اركىمنىڭ جەكە سالىمى، جيناعان جيناعى، جازىسقان حاتتارى، تەلەفون ارقىلى سويلەسكەن سوزدەرى، پوشتا، تەلەگراف ارقىلى جولدانعان جانە وزگە دە حابارلارىنىڭ قۇپيالىلىعىنا قۇقىعى بار.
ءتىنتۋ مەن تاركىلەۋ سوتقا دەيىنگى تەرگەپ-تەكسەرۋ كەزىندە تەرگەۋ سۋدياسىنىڭ سانكسياسى، قاۋلىسى بويىنشا جۇرگىزىلۋى مۇمكىن.
ءبىراق تاركىلەۋگە جاتاتىن زات قىلمىستىق جانە باسقا دا زاڭسىز ماقساتتاردا پايدالانىلۋى مۇمكىن دەگەنگە ناقتى ءقاۋىپتى تانىتقان ەرەكشە جاعدايلاردا سوتقا دەيىنگى تەرگەپ-تەكسەرۋدى جۇزەگە اسىراتىن ادامنىڭ قاۋلىسى بويىنشا، ياعني تەرگەۋ سۋدياسىنىڭ سانكسياسىنسىز دا الىنۋى مۇمكىن، ءبىراق كەيىننەن بۇل ماتەريالدار تەرگەۋ سۋدياسىنا ءبىر تاۋلىك مەرزىمدە جولدانۋى ءتيىس. ەگەر بۇل پروسەسس زاڭسىز جاسالسا، وندا تاركىلەۋدەن كەيىن شىعارىلعان قورىتىندىلار ءىس بويىنشا دالەل رەتىندە قابىلدانبايدى.
بۇل ماسەلە قۇقىقتىق تۇرعىدان العاندا ءبىرشاما كۇردەلى. ۇيالى تەلەفوندى جانە ىشىندەگىسىن تەكسەرۋ تەك تەرگەۋ سوتىنىڭ سانكسياسىمەن نەمەسە ادامنىڭ كەلىسىمىمەن جۇرگىزىلۋى كەرەك. دەمەك، تەكسەرۋدى جۇرگىزەتىن قىزمەتكەردىڭ تالاپ ەتۋگە قۇقىعى جوق، ول سۇراۋعا قۇقىلى. ەگەر ازامات ونىڭ بۇل وتىنىشىنەن باس تارتسا، قىزمەتكەر ءوز ەركىمەن شەشىم قابىلدايدى. ءبىراق ول تەلەفوندى تارتىپ الىپ، ونى ماجبۇرلەپ تەكسەرە المايدى. ۇيالى تەلەفوندى الۋ تەك تەرگەۋ سوتىنىڭ سانكسياسىمەن جۇزەگە اسىرىلۋى كەرەك.
الەكساندر ليسيچەنكو
باسا نازار اۋدارۋدى قاجەت ەتەتىن زاڭنامالىق جايتتار بار. ۇيالى تەلەفوندى الۋ ناقتى قىلمىستىق ءىس بويىنشا سوتقا دەيىنگى تەرگەۋ اياسىندا قاراستىرىلادى. ءبىراق توتەنشە جاعداي رەجيمىندە تەكسەرۋ جۇرگىزىلىپ جاتقان ادامعا قاتىستى ناقتى قىلمىستىق ءىس تەرگەلمەيدى. ياعني، ىس-ارەكەتتەر اكىمشىلىك زاڭناما ارقىلى جۇزەگە اسىرىلادى.
سوندىقتان تج رەجيمى جاعدايىندا ادام ۇيالى تەلەفونىن كورسەتۋدەن باس تارتسا، قىزمەتكەر باسقا سەبەپتەرگە بايلانىستى، مىسالى ەگەر كولىكتە باسقا دا تاركىلەۋگە جاتاتىن زاتتار ءارى ونىڭ قۇقىق بۇزۋشى ەكەنىن راستايتىن قۇجاتتار بولسا، ول ادامدى تەكسەرۋ ءۇشىن جانە ودان ۇيالى تەلەفوندى الۋ ءۇشىن زاڭدا بەلگىلەنگەن تارتىپپەن ىشكى ىستەر ورگاندارىنا جەتكىزە الادى.
الەكساندر ليسيچەنكو
ەگەر ادام پوليسيا قىزمەتكەرىنىڭ ارەكەتى زاڭسىز دەپ ساناسا، وعان ۇيالى تەلەفونىن كورسەتپەۋگە قۇقىلى. ءبىراق ەگەر قىزمەتكەردىڭ ىس-ارەكەتى انىق زاڭدى بولىپ، سونىمەن قاتار ازامات وعان قارسى تۇرسا، وندا ونىڭ ىس-ارەكەتتەرىندە بيلىك قىزمەتكەرىنە قارسىلىق كورسەتۋ تۇرعىسىندا قۇقىقبۇزۋشىلىق بەلگىلەرى بوي كورسەتكەن بولادى.
جاپپاي تارتىپسىزدىكتەرگە، زاڭسىز ارەكەتتەر جاساۋعا جانە تاعى باسقاسىنا شاقىراتىن قانداي دا ءبىر حابارلامالاردى تاراتۋمەن اينالىسقانىن ايعاقتايتىن مالىمەتتەر ازاماتتىڭ ۇيالى تەلەفونىن تەكسەرۋگە نەگىز بولا الادى. مىسالى، سول سەكىلدى كولىكتى تەكسەرۋ كەزىندە وندا قارۋ-جاراق دۇكەنىنەن ۇرلانعان بولۋى مۇمكىن قارۋ تابىلعان جاعدايدا. تيىسىنشە، ونىڭ كىمدەرمەن بايلانىستا بولعانىن تەكسەرۋ كەرەك بولادى. مۇمكىن ول بۇل قارۋدى بىرەۋگە بەرۋ ءۇشىن الىپ بارا جاتقان شىعار. بۇل جاعداي دا ۇيالى تەلەفوندى تەكسەرۋگە نەگىز بولا الادى.
الەكساندر ليسيچەنكو
ەگەر ازامات ۇيالى تەلەفونىن بەرۋدەن باس تارتسا، قىزمەتكەرلەر ونى ۇستاپ، ودان ارى تەكسەرۋ ءۇشىن ىشكى ىستەر ورگاندارىنا جەتكىزۋگە قۇقىلى. توتەنشە جاعداي كەزىندە كومەنداتۋراعا اپارادى.