كومپانيا سايتىندا بۇعان دەيىن ونىڭ زەرتتەۋ جانە كوممەرسيالىق قىزمەتىن توقتاتقانى تۋرالى حابارلاما جاريالانعان بولاتىن.
«تيتان» باتيسكافىن يەلەنۋشى OceanGate كومپانياسى بارلىق الەۋمەتتىك جەلىدەگى پاراقشالارىن ءوشىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇعان دەيىن OceanGate Expeditions كومپانياسىنىڭ Facebook، Instagram، Twitter جانە LinkedIn جەلىلەرىندە پاراقشالارى بولعان ەدى. 14 شىلدە كۇنى ونىڭ ءبارى وشىرىلگەن.
19 ماۋسىم كۇنى «تيتانيك» كەمەسى سۋعا باتقان ايماققا ساپار جاسايتىن «تيتان» سۇڭگۋىر اپپاراتى اتلانت مۇحيتىندا جوعالىپ كەتكەن.
22 ماۋسىمدا اقش-تىڭ جاعالاۋ قىزمەتى جوعالعان «تيتان» باتيسكافىن ىزدەۋ اۋماعىندا قيراندىلار تابىلعانىن ءمالىم ەتتى. كەيىن سۇڭگۋىر اپپاراتى تيەسىلى OceanGate كومپانياسى مالىمدەمە جاساپ، باتيسكافتا بولعان ەكيپاج قازا بولعانىن حابارلادى.
باتيسكاف بورتىندا 5 ادام بولدى: 58 جاستاعى بريتاندىق بيزنەسمەن ءارى زەرتتەۋشى حەميش حاردينگ، 48 جاستاعى بيزنەسمەن، پاكىستاندىق شاحزادا داۆۋد پەن ونىڭ 19 جاستاعى ۇلى سۋلەمان، OceanGate كومپانياسىنىڭ 61 جاستاعى ديرەكتورى ستوكتون راش جانە 77 جاستاعى فرانسۋزدىق زەرتتەۋشى پول-انري نارجولە.