بىلتىر استانادا 3 جاسار قىزدارىنىڭ ءتىسىن ەمدەتۋگە اپارىپ، اتا-اناسى ودان قاپەلىمدە "ايىرىلىپ" قالعان. قايعىدان قان جۇتىپ وتىرعان وتباسى وسى كۇنى قىزىنىڭ ولىمىنە كىنالى كلينيكامەن سوتتاسىپ جاتىر.
بالاعا باستاپقىدا انەستەزيا جاسالىپ، بىردەن 18 تىسىنە ەم جاسالعان. الايدا "سيەۆوران" انەستەزياسىنان كىشكەنتاي زەرە سول كۇيى ويانباعان.
وقيعانىڭ ءمان-جايى
سوت بارىسىندا ساراپتاما دەرەكتەرى جاريالاندى. ساراپشىلاردىڭ قورىتىندىسى بويىنشا، مي ىسىگى "سيەۆوران" انەستەزياسى دۇرىس جۇرگىزىلمەگەننەن پايدا بولۋى مۇمكىن. سونىمەن قاتار، جەرگىلىكتى اۋىرسىنۋدى باساتىن ليدوكايننىڭ دوزاسى بالاعا تىم كوپ ەگىلگەن.
جارتىلاي قالپىنا كەلمەگەن وكپە فۋنكسياسى مەن قابىنۋ فونىندا "سيەۆوراندى" ءتورت جارىم ساعات بويى قولدانۋ وتكىر گيپوكسياعا (وتتەگىنىڭ جەتىسپەۋشىلىگىنە)، جۇرەكتىڭ توقتاۋىنا جانە مي ىسىگىنە اكەلۋى مۇمكىن، سول سەبەپتەن ءولىم ورىن الدى. ءبىر ەسكەرە كەتەتىن جايت، كىشكەنتاي قىز ءتىسىن ەمدەردىڭ الدىندا پنيەۆمونيامەن اۋىرعان، ءبىراق كلينيكا بۇل دەرەكتى ەسكەرمەگەن كورىنەدى.
"سەداسيادان بۇرىن ءبىز 7 اي بۇرىن اۋرۋحانادا جاتتىق. ەگەر ول تەك 2-3 اپتا بۇرىن بولسا، ءبىز مۇنداي انەستەزيا مەن ەمدەۋگە بارماس ەدىك. ولار ءبىزدى بولۋى مۇمكىن قاۋىپ-قاتەرلەر تۋرالى حاباردار ەتۋى ءتيىس ەدى"، - دەدى قىزدىڭ اكەسى تالعات قۇماروۆ.
پروكۋروردىڭ ايتۋىنشا، انەستەزيولوگ پەن ستوماتولوگ پەدياترمەن كەڭەسىپ، قان تالداۋىن (ايتۆ، گەپاتيت جانە باسقا ينفەكسيالار) جاساۋعا مىندەتتى بولعان. الايدا كلينيكا بۇل تالاپتاردى ورىنداماعان.
مامان نە دەيدى؟
اqshamnews.kz ءتىلشىسى وسى جاعدايعا قاتىستى "سيەۆوران" انەستەزياسىنىڭ ەرەكشەلىكتەرى جايلى ماماننان پىكىر الدى.
قازىرگى زاماناۋي ينگالياسيالىق بۇل پرەپارات ادامدى تەز ۇيىقتاتىپ، جىلدام وپەراسيا جاساۋعا مۇمكىندىك بەرەدى جانە دەنساۋلىعىنا زيان كەلتىرمەيدى. ونىڭ جوعارى قاۋىپسىزدىگى بالالارعا ءتىس ەمدەۋ سياقتى جاۋاپتى سالالاردا قولدانۋعا مۇمكىندىك بەرەدى. بالالارعا بۇل اۋىر پروسەدۋرانى ءتۇسىندىرۋ قيىن بولعاندىقتان، كوبىنە ناركوز – تىستەردى تەز ەمدەۋدىڭ ءتيىمدى ءتاسىلى بولىپ وتىر.
ستوماتولوگيادا كوپتەگەن جاعدايدا بالالاردان باستاپ ەرەسەك پاسيەنتتەرگە دەيىن كەڭەس بەرۋشى ءارى قاداعالاۋشى (كۋراتور) سالمان قانات ۇلى "سيەۆوران" ادەتتە ءقاۋىپسىز ەكەنىن، ءبىراق كەيبىر جاعدايلاردا ساقتىق قاجەت ەكەنىن اتاپ ءوتتى:
- پاسيەنتتە نەمەسە تۋىستارىندا قاتەرلى گيپەرتەرميا؛
- باۋىردىڭ اۋىر اۋرۋلارى؛
- وتە تومەن قان قىسىمى نەمەسە شوك جاعدايىندا؛
- جۇرەككە قاتىستى كۇردەلى پروبلەمالار نەمەسە اريتميا؛
- اعزانىڭ قاتتى سۋسىزدانۋى (قۇرعاۋى) نەمەسە كوپ قان جوعالتۋ؛
- باس ميىنىڭ ىشكى قىسىمى جوعارى بولسا؛
- اللەرگيالىق رەاكسيالار (وتە سيرەك).
اۋىر رەاكسيالار كوبىنەسە پرەپاراتقا ەمەس، ورگانيزمنىڭ ەرەكشەلىكتەرىنە بايلانىستى. سوندىقتان ناركوزدان بۇرىن جۇرەك، تىنىس الۋ، زات الماسۋ جۇيەسى مەن تۇقىم قۋالايتىن تاۋەكەلدەردى تەكسەرۋ قاجەت. تەكسەرۋلەردەن كەيىن عانا انەستەزيولوگ ەڭ ءقاۋىپسىز ناركوز نۇسقاسىن، مولشەرىن تاڭدايدى.
بالالار ادەتتە تىنىش ويانادى، ءبىراق دارىگەرلەر نازار اۋدارۋى ءتيىس كەيبىر سيرەك بەلگىلەر دە بار ەكەن. ولار: قاتتى السىرەۋ، تىنىس الۋدىڭ بۇزىلۋى، قان قىسىمىنىڭ كەنەت تومەندەۋى نەمەسە جوعارىلاۋى، جۇرەك ىرعاعىنىڭ بۇزىلۋى، دەم الۋدىڭ قيىنداۋى، دەنە قىزۋىنىڭ جىلدام كوتەرىلۋى، سانانىڭ شاتاسۋى. بارلىق وياتۋ پروسەسى انەستەزيولوگتىڭ تۇراقتى باقىلاۋىمەن وتەدى.
سونىمەن بىرگە، ماماننىڭ ايتۋىنشا، ناركوز كەزىندە قاۋىپسىزدىك ءۇشىن كلينيكادا زاماناۋي ناركوز اپپاراتى، مونيتورلار (پۋلس، قان قىسىمى، تىنىس الۋ، پۋلسوكسيمەتر، ەكگ)، ءوجج اپپاراتى، ماسكالار، وتتەگى جۇيەسى، شۇعىل كومەك قۇرالدارى، دەفيبريللياتور، بىلىكتى انەستەزيولوگ پەن انەستەزيست مەيىربيكە جانە باقىلاۋ بولمەسى بولۋى كەرەك.
سالمان قانات ۇلى استانادا بولعان قايعىلى جاعدايعا بايلانىستى مامان رەتىندە ايتارى: "بۇل جەردە قايعىلى جاعداي دارىگەرلەردىڭ سالعىرتتىعىنان، بولۋى مۇمكىن ءقاۋىپتى جاعدايلاردى ەسكەرمەگەننەن بولعان سياقتى"، - دەيدى.
جالپى، "سيەۆوران - بالالار ءۇشىن ەڭ ءتيىمدى ءادىس. ول تەز اسەر ەتەدى، بارىنشا اللەرگيا تۋدىرمايدى، ينەكسيا قاجەت ەمەس جانە تىنىش ءارى ىڭعايلى ناركوز بەرەدى. تاجىريبەلى انەستەزيولوگتىڭ باقىلاۋىمەن بۇل پروسەدۋرا كىشكەنتاي جانە قوبالجعىش پاسيەنتتەر ءۇشىن دە ءقاۋىپسىز ءارى جەڭىل وتەدى"، - دەپ تۇيىندەدى مامان.
سالمان قانات ۇلى جۇمىس ىستەيتىن جەكەمەنشىك ستوماتولوگيا كلينيكاسى دا وسىنداي ادىسپەن ەمدەۋگە بەيىمدەلگەن. بالالاردى دا "سيەۆوران" انەستەتيگى ارقىلى ويداعىداي ەمدەپ جۇرگەنىن ايتادى. باستىسى، قاۋىپسىزدىك تالاپتارى مەن ءار پاسيەنتتىڭ دەنساۋلىعىنداعى ەرەكشەلىكتەرگە ساقتىقپەن جانە جاۋاپكەرشىلىكپەن قاراپ، ەسكەرىلۋى ءتيىس جايتتاردى ەستەن شىعارماۋ قاجەت دەيدى.
ايتا كەتەيىك، قالادا "سيەۆوران" ارقىلى ەمدەۋ قىزمەتىنىڭ ورتاشا باعاسى 50 مىڭ تەڭگەدەن باستالادى.
سونىمەن، "سيەۆوران" دەگەن نە؟
سيەۆوران - تىنىس الۋ ارقىلى بەرىلەتىن زاماناۋي انەستەزيا. ول پاسيەنتتى ۇيىقتاتىپ، اۋىرسىنۋدى مۇلدەم سەزدىرمەيدى.