«ءتىل جانە تۇلعا» كىتابى جارىققا شىقتى

ءتىل عىلىمىنا قاتىستى قۇندى دۇنيەلەر ءبىر جيناققا توپتاستى

قازاقستان ۇلتتىق عىلىم اكادەمياسىنىڭ 75 جىلدىعىنا وراي «ءتىل جانە تۇلعا» جاڭا كىتابى جارىققا شىقتى، دەپ حابارلايدى Almaty-akshamy.kz «حابار 24» سايتىنا سىلتەمە جاساپ.

اۆتورى – فيلولوگيا عىلىمدارىنىڭ دوكتورى، پروفەسسور كارىمبەك قۇرمانالييەۆ. جيناققا قازاق ءتىل ءبىلىمى مەن تيۋركولوگيا دامۋىنا ولشەۋسىز ۇلەس قوسقان عالىمدار مەن لينگۆيستەردىڭ ەڭبەكتەرى ەنگەن.

ولاردىڭ قاتارىندا ىسمەت كەڭەسبايەۆ، ماۋلەن بالاقايەۆ، عانەتدين مۇسابايەۆ، احمەدي ىسقاقوۆ، ءرابيعا سىزدىقوۆا سياقتى ەلىمىزگە تانىمال تۇلعالار بار. كىتاپ مىڭ دانامەن باسىلدى. سونداي-اق ونى ۇلتتىق كىتاپحانانىڭ سايتىنان وقۋعا بولادى.

كارىمبەك قۇرمانالييەۆتىڭ ايتۋىنشا، جيناق سالا ماماندارىنا جانە كوپشىلىك قاۋىمعا ارنالعان. كىتاپتا عالىمداردىڭ جۇرتشىلىق بىلە بەرمەيتىن قىرلارى قوسا باياندالادى.

«ماعان اقىل بەرگەن، ءتىل ءبىلىمى كورسەتكىشىنىڭ التى تومىن جازعان اكادەميك شورا سارىبايەۆ وسىلاردىڭ ەڭبەكتەرىن ەل ءبىلۋ كەرەك قوي. بۇل ەنسيكلوپەديالىق ەڭبەك ەمەس. مۇندا ونىڭ جۇمىستان تىس كەزىندەگى حوببيلەرىن دە جازدىم. سونىمەن بىرگە جۇمىس ىستەگەن اعا بۋىندارى وكىلدەرى بار، بەلگىلى ادامداردىڭ بەلگىسىز قىرلارىن قوسىپ شىعاردىم. سوعان قاراعاندا، جالپى عالىمدارعا عانا ەمەس، جالپى جۇرتشىلىققا جاعىمدى وقيعا بولادى دەگەن پىكىرىم بار»، - دەيدى ق ر ۇعا اكادەميگى، فيلولوگيا عىلىمدارىنىڭ دوكتورى كارىمبەك قۇرمانالييەۆ.