بۇعان دەيىن قازاقستاندا TikTok جەلىسىنە كىرەتىندەردىڭ جاسىن شەكتەۋ ۇسىنىلعان ەدى.
TikTok، YouTube جانە Snapchat جەلىلەرىنە قاتىستى تەرگەۋ باستالدى، دەپ حابارلايدى aqshamnews.kz Euronews باسىلىمىنا سىلتەمە جاساپ.
ەۋروپالىق وداق ءوز ازاماتتارىنا جالعان جاڭالىقتار مەن وزىنە زيان كەلتىرۋدى ناسيحاتتايتىن كونتەنتتەردىڭ ۇسىنىلۋىنا بايلانىستى الەۋمەتتىك جەلىلەرگە تەرگەۋ باستادى.
ەندى TikTok، YouTube جانە Snapchat جەلىلەرى ەۋروپالىق كوميسسيانىڭ ۆيدەولاردى ۇسىنۋ الگوريتمدەرىنىڭ قالاي جۇمىس ىستەيتىنى تۋرالى سۇراقتارىنا جاۋاپ بەرۋى كەرەك.
“وداقتىڭ سيفرلىق قىزمەتتەر تۋرالى زاڭى (DSA) بويىنشا جۇرگىزىلگەن تەرگەۋ ادامدارعا نەلىكتەن سايلاۋعا قاتىستى جالعان جاڭالىقتاردى نەمەسە دەپرەسسيا مەن ناشاقورلىقتى دارىپتەيتىن كونتەنت ۇسىنىلاتىنىن تۇسىنۋگە باعىتتالعان” -دەلىنگەن رەسمي حابارلامادا.
كوميسسيا ۆيدەولاردى اۆتوماتتى ويناتۋ جانە شەكسىز اينالدىرۋ سياقتى مۇمكىندىكتەردىڭ اسەرىن، زياندى كونتەنتتىڭ تارالۋىن بولدىرماۋ ءۇشىن پلاتفورمالار قانداي ساقتىق شارالارىن قولداناتىنىن زەرتتەمەك.
15 قاراشاعا دەيىن ءتيىستى قۇجاتتاردى ۇسىنباعان نەمەسە جالعان اقپارات بەرگەن جەلىلەرگە ەۋرووداق زاڭى بويىنشا ايىپپۇل سالىنادى.