قازاقستان رەسپۋبليكاسى وقۋ-اعارتۋ مينيسترلىگىنىڭ قولداۋىمەن قىسقا بەينەروليكتەردى ورنالاستىرۋعا ارنالعان جەتەكشى پلاتفورما TikTok-تا #قازاقستانمۇعالىمدەرى نەمەسە #ۋچيتەلياكازاحستانا بايقاۋى باستالدى، دەپ حابارلايدى Almaty-akshamy.kz.
TikTok-تاعى تانىمدىق كونتەنت قازاقستاندىق الەۋمەتتىك جەلى قولدانۋشىلارىنىڭ قىزىعۋشىلىعىن تۋدىرىپ، تانىمال بولىپ كەتەدى. ماسەلەن، #كىتاپتوك حەشتەگى بويىنشا تۇسىرىلگەن ادەبيەت تۋرالى بەينەروليكتەر ءقازىردىڭ وزىندە ەل ىشىندە 70 ميلليوننان استام قارالىم جيناپ ۇلگەرگەن.
بايقاۋعا TikTok-تا اككاۋنتى بار نەمەسە اشۋعا نيەتتى بارلىق مەكتەپ ۇستازدارى، كوللەدجدەر مەن جوعارۋ وقۋ ورىندارىنىڭ وقىتۋشىلارى قاتىسا الادى. وسى جىلدىڭ 1 قاراشاسى مەن 17 جەلتوقسانى ارالىعىندا وتەتىن بايقاۋ كەزىندە پەداگوگتەر قىسقاشا تانىمدىق بەينەروليكتەردى جۇكتەپ سالۋى قاجەت. بەينەماتەريالداردىڭ ۇزاقتىعى 30 سەكۋندتان كەم بولماۋى ءتيىس جانە ولاردى جاريالاۋ كەزىندە بايقاۋ حەشتەگتەرىن قولدانۋ قاجەت: #قازاقستانمۇعالىمدەرى نەمەسە #ۋچيتەلياكازاحستانا.
«تيكتوكپەن جاسالاتىن جوبامىزدىڭ ارقاسىندا قازاقستان پەداگوگتەرى جاستارمەن، ءتۇرلى جاستاعى ينتەرنەت پايدالانۋشىلارىمەن ءوز بىلىمدەرىن شىعارماشىلىق جانە ودان دا قىزىقتى ۇلگىدە ءبولىسۋ مۇمكىندىگىن اشادى دەپ ۇمىتتەنەمىز. ءبىر قۋانتارلىعى، پەداگوگتەر شەت قالماي، عىلىم مەن مەكتەپ پاندەرىن كەڭىنەن ناسيحاتتاۋدا ونلاين پلاتفورمالاردى ءوز يگىلىگىنە پايدالانۋدا. ءبىز ءقازىردىڭ وزىندە قازاقستانداعى TikTok ترەندتەرىندە كوپتەگەن دارىندى مۇعالىمدەردى كورىپ ءجۇرمىز. #قازاقستانمۇعالىمدەرى باستاماسىنىڭ ماقساتى – كوپ پەداگوگتەردى ءبىلىم بەرۋدە جاڭا شىعارماشىلىق ادىستەردى اشۋعا شابىتتاندىرۋ، وقۋدىڭ قىزىقتى ءارى كوڭىلدى ەكەنىن كورسەتۋ جانە ەلىمىزدەگى ءبىلىم بەرۋ مازمۇنىنا قىزىعۋشىلىقتى ارتتىرۋ بولىپ تابىلادى»، - دەدى وقۋ-اعارتۋ مينيسترلىگىنىڭ باسپا ءسوز حاتشىسى مەرەكە نۇرمۇحانوۆا.
قازىلار القاسىنىڭ مۇشەلەرى قۇرامىندا جوبانىڭ امباسسادورلارى، TikTok پلاتفورماسى مەن وقۋ-اعارتۋ مينيسترلىگىنىڭ وكىلدەرى بولادى، ولار بايقاۋ قاتىسۋشىلارىن ءتورت نوميناسيا بويىنشا باعالايدى:
•«تيكتوك ءمۇعالىمى 2023». مەكتەپتەر مەن كوللەدجدەردەگى مۇعالىمدەرگە ارنالعان نوميناسيا. بۇل نوميناسيا بويىنشا كۇردەلى عىلىمي يدەيانى، دەرەكتى نەمەسە تۇجىرىمدامانى انىق ءارى تۇسىنىكتى ەتىپ كورسەتكەن ەڭ كرەاتيۆتى روليك اۆتورى جەڭىمپاز بولا الادى.
• «تيكتوك وقىتۋشىسى 2023»
جوعارى وقۋ ورىندارىنىڭ وقىتۋشىلارىنا ارنالعان نوميناسيا. بۇل نوميناسيا بويىنشا كۇردەلى عىلىمي يدەيانى، دەرەكتى نەمەسە تۇجىرىمدامانى انىق ءارى تۇسىنىكتى ەتىپ كورسەتكەن ەڭ كرەاتيۆتى روليك اۆتورى جەڭىمپاز بولادى.
• «تيكتوكتاعى جاڭالىق». بايقاۋ اياسىندا جاريالانعان روليكتەرىنىڭ بارلىعى بويىنشا ەڭ كوپ قارالىم جيناعان ءمۇعالىم جەڭىمپاز اتانادى. وعان مەكتەپتەردىڭ، كوللەدجدەر مەن جوعارى وقۋ ورىندارىنىڭ وقىتۋشىلارى قاتىسا الادى.
•«ۇزدىك بەينەروليك». بايقاۋ اياسىندا جاسالعان بەينەروليگى ەڭ كوپ قارالىم جيناعان وقىتۋشى جەڭىمپاز اتانادى.
بايقاۋ جەڭىمپازدارىنا جاقسى تانىمدىق روليكتەر ءتۇسىرۋ جانە TikTok-تا دامۋى ءۇشىن iPhone 15 سمارتفوندارى سىيلىققا بەرىلەدى.