سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ مالىمدەمەسى.
قازاقستان كەوسايانعا «پەرسونا نون گراتا» ستاتۋسىن بەرۋ پروسەسىن باستادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىز سول كۇنى-اق كەوساياندى ەلىمىزگە كەلگەنىن قالامايتىن تۇلعالار تىزىمىنە كىرگىزۋ پروسەسىن باستاپ كەتتىك. ديپلوماتيالىق تاجىريبەدە مۇندايدى كەيدە قولدانامىز»، - دەدى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ.
ەسكە سالا كەتەيىك، ءبىز وسىعان دەيىن رەسەيلىك جۋرناليست كەوساياننىڭ قازاقستانعا كىرۋىنە تىيىم سالىنۋى مۇمكىن ەكەنىن حابارلاعان ەدىك.
«رەسەيلىك جۋرناليست تيگران كەوساياننىڭ قورلايتىن، وبەكتيۆتى ەمەس سوزدەرى نازارىمىزدى اۋدارىپ وتىر. مۇمكىن، ونىڭ مالىمدەمەسى رەسەي قوعامى مەن ساياسي يستەبليشمەنتتىڭ بەلگىلى ءبىر بولىگىنىڭ كوزقاراسىن كورسەتەتىن شىعار. ءبىراق ەلدەرىمىز اراسىنداعى ىنتىماقتاستىق رۋحى مەن مازمۇنىنا جانە مەملەكەت باسشىلارى دەڭگەيىندەگى كەلىسىمدەرگە مۇلدەم سايكەس كەلمەيدى. مۇنداي سوزدەر تاتۋ كورشىلىك قارىم-قاتىناسىمىزعا سەلكەۋ تۇسىرەدى جانە ستراتەگيالىق سەرىكتەستىگىمىزگە قارسىلارعا قولايلى بولماق. ول قازاقستانعا كەلۋى قۇپتالمايتىن ادامداردىڭ تىزىمىنە ەنگىزىلەدى دەپ ويلايمىن»، - دەدى ايبەك سمادياروۆ.