الماتى قالالىق پوليسيا دەپارتامەنتىنىڭ مالىمەتىنشە، جالعان اقپارات بەرگەن ازاماتتارعا قاتىستى قىلمىستىق ىستەر قوزعالىپ، بەس ءىستىڭ بەتى اشىلعان، دەپ حابارلايدى aqshamnews.kz
قۇقىق قورعاۋ ورگاندارى قازاقستان رەسپۋبليكاسىنىڭ قىلمىستىق كودەكسىنىڭ 273-بابى بويىنشا تەرروريزم اكتىسى تۋرالى كورىنەۋ جالعان حابارلاعانى ءۇشىن بەس مىڭ ايلىق ەسەپتىك كورسەتكىشكە (14،5 ملن تەڭگە) دەيىن ايىپپۇل سالىناتىنىن نەمەسە سول مولشەردە تۇزەۋ جۇمىستارى، سونداي-اق بەس جىلعا دەيىن باس بوستاندىعىنان ايىرۋ جازاسى قاراستىرىلعانىن ەسكەرتەدى.
جالعان قوڭىراۋلاردىڭ سالدارىنان بارلىق شۇعىل قىزمەتتەر بوسقا جۇمىلدىرىلىپ، مەملەكەت قاراجاتى شىعىندالادى. سوت تارتىبىمەن بۇل شىعىنداردى وتەپ بەرۋ مىندەتى قۇقىق بۇزۋشىعا جۇكتەلەدى. ەگەر كىنالى تۇلعا 14 جاسقا دەيىنگى بالا بولسا، وندا ونىڭ اتا-اناسى نەمەسە زاڭدى وكىلدەرى زالالدى وتەيدى. مۇنداي جاعدايدا 20 اەك-كە (73 840 تەڭگە) دەيىن ايىپپۇل سالىنادى نەمەسە 10 تاۋلىككە دەيىن اكىمشىلىك قاماۋعا الىنادى. سونىمەن قاتار، جاسوسپىرىمدەر كامەلەتكە تولماعانداردىڭ ىستەرى جونىندەگى بولىمشەلەرگە ەسەپكە الىنادى.
ىشكى ىستەر مينيسترلىگىنىڭ دەرەكتەرى بويىنشا، ەلىمىزدە تەرروريزم اكتىسى تۋرالى جالعان حابارلاما تاراتقان ازاماتتارعا قاتىستى 168 قىلمىستىق ءىس قوزعالىپ، 31 ادام ۇستالعان. ولاردىڭ 12ء-سى كامەلەتكە تولماعان بالالار. سوت ۇكىمىمەن 13 ادام جازالانىپ، ونىڭ ىشىندە ەكى ءجاسوسپىرىم سوتتالعان. التى اتا-اناعا ايىپپۇل سالىنعان.
ءىىم رەسمي وكىلى شىڭعىس الەكەشيەۆ: – ءاربىر جالعان حابارلاما قوعامدا ۇرەي تۋعىزىپ، مەكەمەلەردىڭ جۇمىسىن توقتاتادى. سونىمەن بىرگە شۇعىل قىزمەتتەردىڭ ۋاقىتى مەن رەسۋرستارىن بوسقا جۇمسايدى. مۇنداي قىلمىس ءۇشىن 14 جاستان باستاپ قىلمىستىق جاۋاپكەرشىلىك قاراستىرىلعان. كامەلەتكە تولماعان بالالاردىڭ اتا-انالارىنا بالالارىنىڭ مىنەز-قۇلقىنا ەرەكشە نازار اۋدارىپ، وسىنداي ارەكەتتەردىڭ سالدارىن ءتۇسىندىرۋ قاجەت. تەرروريزم اكتىسى تۋرالى جالعان حابارلاما تاراتقاندار قاتاڭ جازالاناتىنىن ەستە ساقتاڭىزدار. قوعامدىق ءتارتىپ – بارلىعىمىزدىڭ ورتاق مىندەتىمىز. بىرلەسىپ قانا، ءبىز بالالارىمىز ءۇشىن ءقاۋىپسىز ورتا قۇرا الامىز، – دەدى.