قانداستاردى قولداۋ ارتىپ كەلەدى
سولتۇستىك قازاقستان وبلىسىندا قانداستار مەن ەلدىڭ ەڭبەك كۇشى ارتىق ايماقتارىنان ازاماتتاردى قابىلداۋ جونىندەگى اقپاراتتىق كەڭەس ورتالىعى قۇرىلدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
پەتروپاۆلدا قانداستارعا جانە باسقا وڭىرلەردەن قونىس اۋدارۋشىلارعا اقپاراتتىق قولداۋ كورسەتۋ ماقساتىندا ارنايى ورتالىق اشىلدى. العاشقى ەكى اي بويى بۇل جوبا پيلوتتىق رەجيمدە جۇمىس ىستەيتىن بولادى. سۇرانىس بولىپ، قاجەتتىلىك ارتقان جاعدايدا قىزمەتىن جالعاستىرماق. اشىلعانىنا بىرەر كۇن بولعان ورتالىق ءقازىردىڭ وزىندە 70 شاقتى قوڭىراۋدى قابىلداپ ۇلگەرىپتى.
«حالىقتى الەۋمەتتىك قورعاۋ جانە جۇمىسپەن قامتۋ باسقارماسىنىڭ تاپسىرىسى بويىنشا اشىلىپ وتىر. بۇل جەردە جەتى ادام جۇمىس ىستەپ جاتىرمىز. ەكى قىزىمىز تەلەفون قوڭىراۋلارىن قابىلداپ، Call-ورتالىقتا وتىر. ولار دا وڭىرگە باعدارلامامەن كەلگەن. بىرەۋى - شىمكەنتتىڭ تۋماسى، ەكىنشىسى – قىتايدان ورالعان قانداسىمىز. سوندىقتان ولار كوشى-قون باعدارلاماسى جايىندا بۇگە-شىگەسىنە دەيىن بىلەدى. الەۋمەتىك جەلىدە پاراقشالارىمىز بار، ونىمەن ارنايى مامان اينالىسادى. سونداي-اق پسيحولوگ، زاڭگەر جۇمىس ىستەيدى، قاجەتتى كومەك بەرەدى»، - دەيدى قانداستار مەن ەلدىڭ ەڭبەك كۇشى ارتىق ايماقتارىنان ازاماتتاردى قابىلداۋ جونىندەگى اقپاراتتىق كەڭەس ورتالىعىنىڭ جەتەكشىسى ءانۋار توقپانوۆ.
ورتالىق مەملەكەتتىك-الەۋمەتتىك تاپسىرىس اياسىندا قۇرىلعان.
«وڭتۇستىك وڭىرلەردەن قونىس اۋدارعىسى كەلەتىندەر كوپ. ولارعا اقپاراتتىق كومەك بەرەمىز. قانداي قۇجاتتار جيناۋ كەرەك، كىمدەرگە باسىمدىق بەرىلەدى. قاي اۋدانداردا قونىس اۋدارۋشىلارعا ۇيلەر بار، ماسەلەن، قاي اۋىلدا ءمۇعالىم نەمەسە مال دارىگەرى كەرەك. كوشىپ كەلۋشىلەرگە قويىلاتىن تالاپتار بار، ارينە. ول - كوپ بالالى جانە ماماندىعىنىڭ بولۋى. دارىگەرلەرگە، مۇعالىمدەرگە، ۆەتەرينارلارعا باسىمدىق بەرىلەدى»، - دەيدى ءانۋار توقپانوۆ.
ورتالىق قىزمەتكەرلەرى سونداي-اق وڭتۇستىك وڭىرلەرگە ءىسساپارعا شىعىپ، تۇرعىندارمەن كەزدەسپەك. كەلەسى اپتادا تۇركىستان، قىزىلوردا وبلىستارىنا جول جۇرمەك.
«باسقارماداعىلار بىزگە بيىلدىققا كۆوتانىڭ بىتكەنىن ايتتى. ءبىز كەلەسى جىلعا كوشىپ كەلۋشىلەرمەن سويلەسەمىز. قونىس اۋدارۋشىلاردىڭ 90 %-ى ورنىعىپ قالىپ جاتىر. كەتكەندەر دە بار. بىرىنە اۋا رايى جاقپادى، دەنساۋلىعىنا، جۇمىسقا بايلانىستى قايتا كوشكەندەر بار. جالپى، ءبىز قانداستار، قونىس اۋدارۋشىلار اراسىندا ساۋالناما جۇرگىزەمىز. سونىڭ ناتيجەسى بويىنشا جىلدىڭ سوڭىندا باسقارماعا ۇسىنىس ازىرلەيمىز. قانداي ماسەلەلەر بار، نەگە باسا نازار اۋدارۋ كەرەك دەگەن سياقتى»، - دەيدى ورتالىق جەتەكشىسى.