تەرگەۋ حاتتامالارى بەينەجازبامەن بەكىتىلۋى مۇمكىن

مۇنداي ءتاسىل ۇلىبريتانيا، نورۆەگيا سياقتى ەلدەردە قولدانىلادى.

ق ر باس پروكۋرورىنىڭ ورىنباسارى ەرلىك كەنەنبايەۆ تەرگەۋ حاتتامالارىن بەينەجازبامەن بەكىتۋ ءتاسىلىن ەنگىزۋدى ۇسىندى، دەپ حابارلايدى Almaty-akshamy.kz

«ءبىز دامىعان ەلدەردىڭ حالىقارالىق تاجىريبەسىن مۇقيات زەرتتەپ جاتىرمىز. ەۋروپا ەلدەرىندە پوليسيانىڭ ۇستالعاندارمەن قارىم-قاتىناسىن رەتتەيتىن ارنايى ستاندارتى بار. ساقشىلار سول ستاندارتتى ساقتاي وتىرىپ جۇمىس ىستەيدى. ول ستاندارتتار بويىنشا پوليسيا وكىلىنىڭ ءاربىر قادامى رەت-رەتىمەن كورسەتىلگەن. ياعني، ءبىر قادامدى ىستەمەي تۇرىپ، ەكىنشى قادامىن جاساي المايدى. مۇنداي ءتاسىل ۇلىبريتانيا، نورۆەگيا سياقتى ەلدەردە قولدانىلادى»، - دەدى باس پروكۋراتۋرا وكىلى.

ايتۋىنشا، اتالعان تاسىلدەردى قازاقستانعا دا ەنگىزۋ كەرەك.

«تەرگەۋ تۋرالى ايتساق، ول بەينەكامەرامەن جابدىقتالعان ارنايى كابينەتتە قورعاۋشىنىڭ قاتىسۋىمەن ءوتۋى كەرەك. قىلمىستىق پروسەستەردىڭ اشىقتىعى ءۇشىن تەرگەۋ ارەكەتتەرىنىڭ بەينەحاتتاماسىن ەنگىزۋدى بەكىتۋ ورىندى بولادى. بەينەحاتتاما تەرگەۋ شاراسىنىڭ قورىتىندىسى مەن بارىسىن بۇرمالاۋعا جول بەرمەيدى. سونداي-اق، تەرگەۋشىلەردىڭ قۇزىرىن اسىرا پايدالانۋىنا جول بەرمەيدى. تەحنولوگيالاردى كەڭىنەن قولدانۋ قۇقىق قورعاۋ ورگاندارىنىڭ جۇمىسىنداعى قارا داقتاردى جارىققا شىعارادى دەپ توپشىلايمىن»، - دەدى ەرلىك كەنەنبايەۆ.