پروستەيەۆ قالاسىندا (چەحيا) 14 جاسقا دەيىنگىلەر اراسىندا كوماندالىق الەم چەمپيوناتى (2022 ITF World Junior Tennis Finals) جالعاسۋدا، دەپ حابارلايدى اlmaty-akshamy.kz قازاقستان تەننيس فەدەراسياسىنىڭ باسپا ءسوز قىزمەتىنە سىلتەمە جاساپ.
جارىستىڭ ەكىنشى كۇنى قازاقستاندىق جاسوسپىرىمدەر 2016 جىلعى الەم چەمپيونى – ارگەنتينا قۇراماسىن ۇتتى. قازاقستان قۇراماسىنىڭ كاپيتانى سەرگەي كۆاك بۇل جولى بەندجامين چەلياعا قارسى قۇرامانىڭ ءۇشىنشى ءنومىرلى ويىنشىسى دانيەل تازابەكوۆتى شىعاردى. بەندجامين كەشە 2021 جىلعى الەم چەمپيونى يتاليامەن وتكەن ماچتا كومانداسىنا ماڭىزدى ەكى ۇپايدى اپەردى. اۋەلى جەكەلەي، سوسىن جۇپتىق باسەكەدە ۇتتى. تازابەكوۆ ويىن تىزگىنىن ۋىسىنان شىعارماي، 7:5، 6:2 ەسەبىمەن جەڭىسكە جەتتى. سودان كەيىن زاڭعار نۇرلان ۇلى ارگەنتينا قۇراماسىنىڭ كوشباسشىسى دانتە پاگانيمەن وينادى. ءبىرىنشى پارتيادا زاڭعار 6:2 ەسەبىمەن باسىم ءتۇستى. الايدا قالعان ەكى سەتتە ارگەنتينالىق تەننيسشى ءساتتى ونەر كورسەتتى – 6:1، 6:1. ماچ تاعدىرى جۇپتىق باسەكەدە شەشىلدى. دامير جالعاسباي مەن دانيەل تازابەكوۆ دانتە پاگاني – بەندجامين چەليانى تىزە بۇكتىردى – 6:1، 6:4.
وسىلايشا، قازاقستاندىقتار قارسىلاس كوماندانى 2:1 ەسەبىمەن قاپى قالدىردى. شيرەك فينالعا شىعۋ ءۇشىن قازاقستاندىقتار ەرتەڭ يتاليا قۇراماسىن جەڭۋى كەرەك.